Shymkentte úsh aýysymmen oqıtyn mektep sany bıyl 15-ke jetti. Qalada myń balaǵa shaqtalǵan mektepterde tórt-bes myń oqýshy bilim alady. Mektepter oqý kabınetteri jetpegendikten qosymsha sabaqtardy alyp tastaǵan dep jazady Qamshy.kz aqparat agenttigi Azattyq radıosy aqparatyna súıenip. 

 Shymkenttegi Saıram yqshamaýdanynda ornalasqan №65 mektep-gımnazıasy eki jyldan beri úsh aýysymda oqıdy. Mektep dırektorynyń mindetin ýaqytsha atqarýshy Aıgúl Kerimbaevanyń Azattyqqa aıtýynsha, 1250 balaǵa shaqtalǵan gımnazıada jańa oqý jylynda oqýshy sany 3700-ge jetken. Oqý kabınetteri az, al synyptaǵy oqýshy sany kóp.

– Bizdegi qıyndyq sol – bala sany kóp, ata-ananyń suranysy joǵary. Keıbir synyptarda oqýshy sany qyryqtan asady, – deıdi ol. 

Respýblıkalyq "Zıatker – Ustaz" qoǵamdyq birlestiginiń tóraǵasy Ómir Shynybekulynyń pikirinshe, Qazaqstanda úsh aýysymdy mektepter problemasynyń paıda bolýy – absýrd

– 20 ǵasyrdyń alǵashqy jartysynda bala týý kóbeıdi. Medısına damyp, bala ólimi azaıdy. Sodan beri demografıa ósti. 2018 jyly Shymkent qalasynda 22 myńǵa jýyq bala 1-synypqa bardy. Qazir mektep tapshy. Úsh aýysymdy mektepterdegi keıbir synyptarda 45 oqýshyǵa deıin otyr. Synypta oqýshy sany 25-ten artyq bolsa, bilim sapasy tómendeıdi. Muǵalim 40 mınýt ýaqytynyń bir bóligin balalardy tynyshtandyrýǵa jumsaıdy. Bul – durys jospardyń bolmaýynan paıda bolǵan másele, – deıdi mektep muǵalimi Azattyq tilshisine bergen suhbatynda.