Reseı Qaýipsizdik Keńesinde egemen elderdiń ishki isterine qol suqpaý týraly qaǵıdany quptaıtyn deklarasıa qabyldaýǵa nıetti ekenin bildirdi. Muny RF Syrtqy ister mınıstri Sergeı Lavrov venesýelalyq VTVCanal8 telearnasyna bergen suhbatynda málimdedi. Bul týraly «Qamshy» portaly gordonua.com-ǵa silteme bere otyryp habarlaıdy.

RF Syrtqy ister mınıstri Sergeı Lavrov AQSH-tyń Sırıadaǵy qımyl-áreketin ortaq kelisimniń qalyptasýyna paıdasy joq «birjaqty amal» ǵana dep sanaıdy.

«Dál qazirgi kezeńde amerıkandyqtar jeke ózindik koalısıany qalyptastyryp otyr, olar eshbir Qaýipsizdik Keńesine júginbegen. Iraktaǵy terrorısterdi Baǵdad úkimetiniń kelisimimen bombalaıtynyn jarıalady. Biraq, Sırıa aımaǵyndaǵy terrorısterge shabýyl jasaý úshin olarǵa Damask ruqsatynyń qajeti shamaly eken. Menińshe, bul birjaqty amal-qareket!» - dep málimdedi Lavrov myrza.

Sonymen qatar, mınıstr Reseıdiń Qaýipsizdik Keńesinde memleketterdiń ishki isterine aralaspaý máselesin kótergisi keletinin aıtty: «Aıtqandaı, qazirgi tańda venesýelalyq jáne qytaılyq áriptesterimizben, jáne ózge de memleketter tobymen birge egemen elderdiń ishki máselelerine qol suqpaý taqyrybyn talqylaǵaly jatyrmyz. Bul, óz kezeginde, BUU-nyń negizgi jarǵylarynyń biri».

Nú-Iorkta ótken BUU-nyń Jalpy Assambleıasynda kóptegen memleketter Qaýipsizdik Keńesine reforma engizý kerektigi týraly usynysqa qoldaý bildirgen bolatyn. BUU-daǵy Ýkraınanyń turaqty ókili Iýrıı Sergeevtiń sózin arqaý etsek, Qaýipsizdik Keńesinde veto quqyǵyn shekteý týraly bastamany 73 memleket qoldaǵan eken.

5-qyrkúıekte Petr Poroshenko Reseı memleketiniń Qaýipsizdik Keńesi quramynda qala berýine bolady, biraq ózi qatysyp otyrǵan qaqtyǵystar men daý-damaılarda veto quqyǵynan aıyrylýǵa tıis dep, málimdeme jasaǵan edi.

Búginde veto quqyǵyna Reseı, Qytaı, AQSH, Fransıa jáne Ulybrıtanıa syndy BUU Qaýipsizdik Keńesiniń bes turaqty múshesi ıe bolyp otyr.

Nazgúl Nazar