Marqum ánshiniń artynan qalǵan jary men uly úısiz-kúısiz kún keship júrgeni týraly Batyrhannyń jaqyn dosy, jornalshy Otar Kýshanashvılı prozvezd.info portalyna málimdegen.

            «AQSH-ta onyń áıeli men eresek balasy qaldy. Aqıqatyn basynan ashyp alaıyq. Katá da, olardyń uly da Otanyna qaıtýdan úzildi-kesildi bas tartyp otyr. Olardyń úıleri salynyp bitýge taıaý. Taıaý, biraq úı sońyna deıin salynbaǵan. Al AQSH-ta aqshań bolmasa taıyp tur deıtin qaǵıda bar. Olar qazir dostarynyń úıin panalaýda»,-dedi reseılik shoýmen.

            Alǵashynda Batyrhan Shúkenov jubaıy men balasynyń shyǵynyn ózi tólep otyrǵan. Dál qazir onyń otbasynda ondaı múmkindik joq eken. Bul aqparatty «Qamshy» portaly NUR.KZ-ke silteme jasaı otyryp habarlaıdy. Qazirgi tańda bul máseleni Batyrhan Shúkenovtyń dırektory sheshýge tyrysyp jatyr.

            Qazirgi tańda Batyrdyń 14 jastaǵy uly Maqsut Shúkenov pen Katá AQSH-tyń Florıda shtatyndaǵy Sarasota qalasynda turady. Batyrhan óziniń ulyna úlken úı salyp bergisi kelgen eken. Tipti qurylysqa aqsha da salǵan. Biraq ol mezgilsiz ómirden ótip ketkenine baılanysty, qurylys jumystary toqtap qalǵan.

            «Biz qazir bul máseleni sheshýge tyrysyp jatyrmyz. Batyrhan Shúkenov atyndaǵy qoǵamdyq qor arqyly birneshe jobalardy júzege asyryp, sál de bolsa Batyrdyń otbasyna kómektespek oıymyz bar. Úlken úı ala almasymyz anyq. Biraq shaǵyn páter alyp bersek pe deımiz. Qazir ánshiniń atyndaǵy qoǵamdyq qor jumys jasap jatyr. Alaıda, eshkim qoldaý kórsetpeýde. Demeýshi de joq, mesenattar da kórinbeıdi. Tek 40 shaqty qarapaıym adamdardyń arqasynda 1600 AQSH dollaryn jınaǵanymyz bolmasa»,-dedi marqum ánshiniń dırektory Oljas Baıkanov.

            Dırektordyń sózine sensek,  ol Batyrhannyń ántaspasyn qaıta shyǵarýǵa múddeli. Onyń ústine eske alý konsertteri de bar.

            Esterińizge sala keteıik, elimizdiń eń beldi mýzykanttarynyń biri Batyrhan Shúkenov osy jyldyń sáýir aıynda júrek talmasynan marqum bolan.

            P.S. Batyrhan Shúkenov ómirden ótkende el dúr silkingeni esimizde. Qazaqstan men Reseıdiń barlyq jerinde ánshige duǵa baǵyshtalyp,  ony qabyrǵasy qaıysa joqtaǵandar kóp boldy. Ánshiniń dosy men dırektory qandaı emeýrin bildirip otyr?Artynda qalǵan shańyraǵy elge amanat degeni me? Endeshe olar nege Otanyna oralmaıdy? Biz úshin ardaqty esimge aınalǵan ánshiniń atyn qoldanyp, aqshaǵa aınaldyrý qanshalyqty durys?

Aıan Meırash