Arabsha jazý jazylǵan Qazaqstan týymen sýretke túsip, ony áleýmettik jeli arqyly taratqan 3 turǵyn ákimshilik jaýapkershilikke tartyldy.

Atyraý qalasynyń ákimshilik quqyq buzýshylyqtar jónindegi mamandandyrylǵan sotynda Qazaqstan Respýblıkasynyń ÁQBtKniń  434-babynyń 1-bóligi boıynsha quqyq buzýshylar N., A., H.-ǵa qatysty ákimshilik quqyq buzýshylyq týraly ister qaraldy.

2025 jylǵy 23 naýryzda azamatshalar N., A. jáne kámeletke tolmaǵan H. Atyraý qalasyndaǵy muz aıdyny ǵımaratynda arab tilindegi jazýy bar Qazaqstan Respýblıkasynyń týymen sýretke túsip, ony áleýmettik jeli arqyly taratyp, usaq buzaqylyq jasaǵan, - delingen jazbada.

Quqyq buzýshylardyń ákimshilik quqyq buzýshylyq jasaýdaǵy kinási ákimshilik quqyq buzýyshylyq týraly hattamamen, fotosýretpen, baıanatpen jáne basqa da is materıaldarymen tolyq dáleldendi.

ÁQBtK-niń 434-babynyń 1-bóliginiń sanksıasynda 20 aılyq eseptik kórsetkish mólsherinde aıyppul salý ne 5-ten 15 táýlikke deıingi merzimge ákimshilik qamaqqa alý túrindegi ákimshilik jaýaptylyq kózdelgen.

Sot qaýlysymen quqyq buzýshylar ÁQBtK-niń 434-babynyń 1-bóliginde kózdelgen ákimshilik quqyq buzýshylyq jasaǵandary úshin kináli dep tanyldy.

N.-ǵa jaýaptylyǵyn aýyrlatatyn mán-jaıdy eskere otyryp (kámeletke tolmaǵan adamdy ákimshilik quqyq buzýshylyqqa tartý; adamdar tobynyń ákimshilik quqyq buzýshylyq jasaýy), 15 táýlikke ákimshilik qamaqqa alý túrindegi ákimshilik jaza qoldanyldy.

A.-ǵa ákimshilik jaza retinde 78 640 teńge ákimshilik aıyppul salyndy.

Kámeletke tolmaǵan H.-nyń zańdy ókiline ákimshilik jaza retinde 39 320 teńge ákimshilik aıyppul salyndy.

Sot qaýlylary zańdy kúshine engen joq.