Májilis depýtaty Asqat Aımaǵambetov Qazaqstan mektepterindegi qaýipsizdikti kúsheıtý qajettigin aıtyp otyr.

Depýtat Telegram-daǵy paraqshasyndaǵy jazbasynda birneshe jyl buryn quqyq qorǵaý organdarynyń bastamasymen mektepterdegi vahterlerdiń ornyna kásibı kúzet uıymdary engizilgenin eske saldy.

Rasynda, jasy kelgen adamdar tótenshe jaǵdaıda durys áreket ete almaıdy dedik. Biraq… Ne ózgerdi? Ashyǵyn aıtqanda, eshteńe. "Vahter" degen sózdi "kúzetshige" aýystyrdyq, al is júzinde kóbinese sol baıaǵy adamdar. Kóp jaǵdaıda – jasy alpystan asqan apa-atalar. Keıde tipti burynǵy vahterlerden de alshaq, mekteptiń ishki ómirinen beıhabar. Nege? Sebebi qarajat az. Tenderdi eń arzan baǵa usynǵan kompanıa utady. Al olar kimderdi jumysqa alady? Daıyndyǵy joq, jıi aýysatyn, keıde beıresmı túrde isteıtin adamdardy, - dep jazdy májilismen.

Májilis depýtatynyń sózinshe, vahterler muǵalimderdi tanymaıdy, mektep rejımin bilmeıdi, oqýshylarmen qalaı sóılesý kerek ekenin de túsinbeıdi.

Mektep – jaı ǵana ǵımarat emes, bul – balalarymyzdyń ekinshi úıi. Al ony qorǵaý – jaı ǵana "otyr" deı salatyn jumys emes. Kúzet uıymdaryna qoıylatyn talaptar da tym álsiz. Jasyna, densaýlyǵyna, kásibı daıyndyǵyna naqty talap joq. Qujatta bir adam kórsetiledi, al is júzinde basqa adam jumys istep júredi. Eshkim teksermeıdi. Kóbine bir ǵana kúzet postyna aqsha bólinedi. Al mektepte myń jarym, keıde eki myń bala bar. Kirip-shyǵatyn 2-3 esik, - dep atap ótti ol.

Asqat Aımaǵambetov osy máselege qatysty birqatar usynys tastady:

• İshki ister mınıstrligi kúzet uıymdaryna qoıylatyn lısenzıalyq talaptardy kúsheıtýi kerek;
• İİM el boıynsha biryńǵaı standart qabyldaýy tıis;
• İİM mekteptiń kólemi men oqýshy sanyna qaraı kúzet posttarynyń naqty normatıvin bekitýi qajet;
• Satyp alý tetikteri jetildirilýi tıis.