ەن دالانى ات تۇياعىمەن دۇبىرلەتكەن كونە تۇركىلىك ءالىپبي مەن تۇركى حالىقتارىنىڭ بۇگىنگى مادەنيەتىن ناسيحاتتاۋعا ارنالعان بۇل ءىس-شارادا تاۋەلسىز ەلىمىزدىڭ تۇتاستىعىن بەكىتە تۇسەتىن ماڭگىلىك مۇرامىز، ەجەلگى تۇركى جازۋىنىڭ كەشەگىسى مەن بۇگىنگىسى تالقىلانىپ، تۇركولوگياداعى قوردالانعان ماسەلەلەردىڭ شەشىمىن تابۋ جولدارى ىزدەستىرىلدى.مادەنيەت جانە سپورت مينيسترلىگىنىڭ تىلدەردى دامىتۋ جانە قوعامدىق-ساياسي جۇمىس كوميتەتىنىڭ تاپسىرىسى بويىنشا ش.شاياحمەتوۆ اتىنداعى تىلدەردى دامىتۋدىڭ رەسپۋبليكالىق ۇيلەستىرۋ-ادىستەمەلىك ورتالىعىنىڭ  ۇيىمداستىرۋىمەن ەل تاۋەلسىزدىگىنىڭ 25 جىلدىعىنا وراي ۇستىمىزدەگى جىلعى 20 مامىردا وسكەمەن قالاسىندا «تۇركى جازبالارى مەن مادەنيەتى كۇندەرى» اتالىپ ءوتتى، - دەپ حابارلايدى Qamshy.kz.

ءىس-شارا اياسىندا س.امانجولوۆ اتىنداعى شىعىس قازاقستان مەملەكەتتىك ۋنيۆەرسيتەتىنىڭ ءماجىلىس زالىندا  «تۇركى جازبا مادەنيەتى: تاريحي تاعلىم جانە تاۋەلسىزدىك مۇراتتارى» اتتى رەسپۋبليكالىق عىلىمي-تەوريالىق كونفەرەنسيا وتكىزىلدى. كونفەرەنسياعا ق ر مادەنيەت جانە سپورت مينيسترلىگى تىلدەردى دامىتۋ جانە قوعامدىق-ساياسي جۇمىس كوميتەتىنىڭ وكىلدەرى، جەتەكشى تۇركولوگ-عالىمدار،  ونەر جانە قوعام قايراتكەرلەرى مەن ب ا ق وكىلدەرى  قاتىستى. كونفەرەنسيانى س.امانجولوۆ اتىنداعى شمقۋ ستراتەگيالىق دامۋ جانە عىلىمي جۇمىس جونىندەگى پرورەكتور، فيلول.ع.د.، پروفەسسور ب.ا.ەردەمبەكوۆ قۇتتىقتاۋ سوزىمەن باستاپ، كونفەرەنسيانىڭ جۇمىسىنا ساتتىلىك تىلەدى.

تاريحىمىزدىڭ اسا قۇندى مۇراسى بولىپ سانالاتىن كونە تۇركى جازۋى مەن مادەنيەتىن ناسيحاتتايتىن رەسپۋبليكالىق عىلىمي-تەوريالىق كونفەرەنسيانىڭ پاتريوتتىق رۋح پەن ۇلتتىق قۇندىلىقتاردى كوتەرۋدەگى الاتىن ورنى بولەك. تۇركى جۇرتىنىڭ الەمدىك وركەنيەتتەگى ۇلى مۇراسى سانالاتىن كونە جازبا ەسكەرتكىشتەرىن زەردەلەۋ، كونە تۇركى تىلىنەن باستاۋ العان العاشقى جازۋدىڭ پايدا بولۋ تاريحىن كوپشىلىككە جەتكىزۋ، تۇركى دۇنيەسىنىڭ  ماسەلەلەرىن زەرتتەۋ، الەمدىك وركەنيەت ۇدەرىسىندەگى تۇركى حالىقتارىنىڭ مادەني جانە رۋحاني مۇرالارىن وقىپ-ۇيرەنۋ، دامىتۋ جانە تۇركى جازۋ مادەنيەتىنىڭ كەشەگىسى مەن بۇگىنگىسىن جاس ۇرپاق ساناسىنا تەرەڭ ءسىڭىرۋ ماسەلەسىنە ارنالىپ وتىرعان بۇل ءىس-شارانىڭ وتاندىق تۇركولوگيانىڭ كۇردەلى ماسەلەلەرىن ايقىنداۋداعى ماڭىزى زور.

 كونفەرەنسياعا قاتىسۋشىلار تۇركى جازبالارىنا قاتىستى تۇسىرىلگەن بەينەسيۋجەتتى تاماشالاپ، ل.ن. گۋميليەۆ اتىنداعى ەۋرازيا ۇلتتىق ۋنيۆەرسيتەتىنىڭ پروفەسسورى، ف.ع.د. قارجاۋباي  سارتقوجا ۇلىنىڭ «قادىم ۇيعىر گرافيكاسىمەن جازىلعان ءماتىن» اتتى بايانداماسىن قىزىعا تىڭدادى. ءىس-شارانىڭ ەكىنشى ءبولىمى شىعىس قازاقستان وبلىسىنىڭ ولكەتانۋ مۇراجايىنداعى  لەكتورييگە ۇلاستى. مۇندا ءتول مۇرامىز بولىپ تابىلاتىن جازبا ەسكەرتكىشتەردىڭ گەوگرافيالىق، مازمۇندىق جانە داۋىرلىك مانىنە ارنالعان عىلىمي-تانىمدىق سيپاتتاعى ءدارىس وقىلادى. كونفەرەنسيانىڭ جابىلۋ ءراسىمى رەتىندە ۇسىنىلعان كونسەرتتىك باعدارلاما تۇركى حالىقتارىنىڭ ونەرى مەن مادەنيەتىنە ارنالدى.