قازاقستاندىق تانىمال جۇلدىز قايرات نۇرتاس شىمكەنتتەگى «نازار-تەكستيل» توقىما كىلەم فابريكاسىندا بولدى، - دەپ حابارلايدى Qamshy.kz Korrespondent.kz  -كە سىلتەمە جاساپ.

ءوندىرىس ورنىنىڭ جۇمىس بارىسىمەن تانىسقان جۇلدىز شىمكەنتتىك كىلەمدەردى كورىپ، قۋانعانىن ءارى تاڭ قالىپ وتىرعانىن جاسىرمادى. ءوز سوزىندە ءانشى وتاندىق ءونىمدى ءارقاشان قولدايتىنىن جانە ءوزى دە ءجيى تۇتىنىپ جۇرگەنىن العا تارتتى.

فابريكانىڭ اتقارۋشى ديرەكتورى ياكۋب دۋماننىڭ ايتۋىنشا، ءوندىرىس ورنىنداعىلار قازاق ەستراداسىنىڭ ون شاقتى جۇلدىزىنا ارنايى حابارلاسىپ، ءوز ونىمدەرىن قولداۋعا شاقىرعان ەكەن. الايدا ازىرگە قايرات نۇرتاستان وزگەلەرى وڭ جاۋاپ بەرمەپتى. ديرەكتور مۇنداي باستاما ارقىلى الدىمەن وتاندىق ونىمگە دەگەن سۇرانىستىڭ ارتارىنا سەنىمدى. ودان وزگە قاراپايىم جۇمىسشىلار سۇيىكتى انشىلەرىن ءوز كوزدەرىمەن كورىپ، كوپتەن بەرگى ارماندارى ورىندالعانىن دا جاسىرمادى.  

«فابريكا باسشىلىعى مەنىڭ ديرەكتورىما حابارلاسىپ، وسىنداي ۇسىنىستارىن ايتىپتى. قازاق ازاماتتارىنىڭ ەشبىر شەتەلدىك ينۆەستورلاردىڭ كومەگىنسىز اشىپ وتىرعان مۇنداي جۇمىسىن ءبىز قولداۋىمىز قاجەت قوي. ۇسىنىستى ەستي سالا، قۋانا كەلىستىم. ءوندىرىس ورنىنىڭ جۇمىسىمەن تانىسىپ، تاڭ قالىپ وتىرمىن. نەگىزى شىمكەنتتە زاۋىتتار كوپ قوي. اسىرەسە جىلىجاي» دەگەن قايرات نۇرتاس ءوزى دە وتاندىق ءونىمدى ءجيى تۇتىناتىنىن جاسىرمادى.

«وزدەرىڭىز بىلەسىزدەر، مەنىڭ «KN» دەگەن اتاۋمەن  كيىم سەحىم بار. وتىز شاقتى قىزمەتكەرىم بالاباقشالار مەن انشىلەرگە كيىمدەر تىگەدى. مەنىڭ دە كوپ كيىمدەرىم سول سەحتىڭ ونىمدەرى. سونىمەن قاتار  ءوز اۋلامدا جىلىجاي ادىسىمەن قىزاناق پەن قيار ەگىپ، سونى قىس بويى جەپ شىقتىق» دەپ اعىنان جارىلدى ونەر يەسى.

تانىمال جۇلدىزبەن كەزدەسكەن فابريكا قىزمەتكەرلەرى سۇيىكتى انشىلەرىنە ارناپ «اۋىرمايدى جۇرەك» ءانىنىڭ اۋەنىمەن ءان شىرقاپ بەردى. ءوز كەزەگىندە ءانشى دە قىزمەتكەرلەرمەن بىرگە ءان ايتىپ، ەستەلىككە سۋرەتكە ءتۇستى. مۇنان سوڭ فابريكا ۇجىمى نۇرتاستىڭ بەينەسى بەينەلەنگەن كىلەم سىيلادى. 

ايتا كەتەيىك، قازاقستاندىق جۇلدىزدار اراسىندا قالاماقىسى جاعىنان كوش باستايتىن ونەر يەسى فابريكاعا جاساعان ساپارىنا ەشقانداي گونورار الماعان. «وتاندىق ءونىمدى قولداۋعا شاقىرىپ، باستاما كوتەرگەن فابريكادان قالايشا اقشا الۋىم كەرەك؟ مەن ءجۇز ەمەس، ەكى ءجۇز پايىز قولدايمىن مۇنداي جۇمىستى» دەگەن ءانشى بۇعان دەيىن اتالعان ءوندىرىس ورنىنان قوس كىلەم ساتىپ الىپ ۇلگەرگەن.