تانىمال پروديۋسەر، ءانشى، تەلەجۇرگىزۋشى بايان ەسەنتايەۆا سوققىعا جىعىلىپ، اۋرۋحاناعا تۇسكەنىن بۇعان دەيىن حابارلاعانبىز. انشىگە اۋىر دەنە جاراقاتىن سالدى دەپ ونىڭ كۇيەۋى باقىتبەك ەسەنتايەۆ ايىپتالۋدا. كۇدىكتى تەرگەۋ يزولياتورىنا قامالدى. بۇگىن سوت وعان تەرگەۋ كەزىندە قولدانىلاتىن بۇلتارتپاۋ شاراسىن انىقتايدى، - دەپ حابارلايدى Qamshy.kz.

پروديۋسەردىڭ سوققىعا جىعىلۋعا اقپارات قۇرالدارى مەن الەۋمەتتىك جەلىدە ۇلكەن رەزونانس تۋعىزدى. قايعىلى وقيعانى تالقىلاعانداردڭ قاي-قايسىسى بولسا دا بايان ەسەنتايەۆانىڭ تەز ايىعۋىنا تىلەكتەستىك تانىتىپ، قول جۇمساعان كۇدىكتىنىڭ ارەكەتىن اشىق ايىپتاۋدا. جەلى قولدانۋشىلارىنىڭ دەنى كەلىنشەگىنە قول جۇمساپ، دەنە جاراقاتىن سالعان ادام زاڭعا ساي ءتيىستى جازاسىن الۋى كەرەك دەيدى. قوعامداعى وسى تاقىلەتتەس تۇرمىستىق كيكىلجىڭدەردى العا تارتىپ، «باياننىڭ كۇيەۋى اۋىر جازادان قۇتىلىپ كەتۋى مۇمكىن» دەيتىندەر دە بار.

زاڭگەر دجوحار وتەبەكوۆ informburo.kz سايتىنا وسى ماسەلەگە وراي تۇسىنىك بەرىپتى. ونىڭ ايتۋىنشا، ەگەر قۇققورعاۋ ورگاندارى باقىتبەك ەسەنتايەۆتىڭ كىناسىن تولىق دالەلدەپ، الايدا، كەلىنشەگى كۇيەۋىنە كەشىرىم بەرسە باقىتبەك ەسەنتايەۆتىڭ بوستاندىقتا قالۋى مۇمكىن كورىنەدى.

«ەگەر ايىپتاۋعا قاتىستى قانداي دا ءبىر وزگەرىس بولماسا، ق ر قك-نىڭ 106-بابى (دەنساۋلىققا قاساقانا اۋىر دەنە جاراقاتىن سالۋ) قولدانىلاتىن بولادى. ول باپ 3 جىلدان 7 جىلعا دەيىن باس بوستاندىعىنان ايىرۋ نەمەسە بوستاندىعىن شەكتەۋ جازاسى كوزدەلگەن. ءىس جۇزىندە ەگەر تاراپتار ىمىراعا كەلسە، كوبىنەسە باس بوستاندىعىن شەكتەۋ قولدانىلىپ جاتادى. سوتتالۋشىنى سوت زارداپ شەگۋشىمەن تاتۋلاسقانى ءۇشىن قىلمىستىق جاۋاپكەرشىلىكتەن بوساتپايدى. ياعني، بۇل قۇقىقتىق-قىلمىستىق ماعىناداعى تاتۋلاسۋ بولىپ تابىلمايدى، سوعان قاراماستان زارداپ شەگۋشىنىڭ ءوتىنىشى ءىس جۇزىندە مىندەتتى تۇردە ەسكەرىلەتىن بولادى»، - دەگەن زاڭگەر كۇدىكتىگە ناقتى باس بوستاندىعىنان ايىرۋ جازاسى بەلگىلەنبەۋى مۇمكىن ەكەنىن ايتادى. ونىڭ ويىنشا، سوت ايىپتالۋشىعا 3-4 جىلعا باس بوستاندىعىن شەكتەۋ جازاسىن قولدانۋى مۇمكىن.

زاڭگەر سونداي-اق، سوت پروسەسىنىڭ جابىق تۇردە وتۋىنە دە ەشقانداي سەبەپ كورىپ تۇرماعانىن ايتادى.

ەستەرىڭىزگە سالساق، پروديۋسەر بايان ەسەنتايەۆا وتكەن جۇما كۇنى الماتى وبلىسى تالعار اۋدانى اۋماعىندا سوققىعا جىعىلىپ، ءقازىر اۋرۋحانادا جاتىر. ال، ونىڭ كۇيەۋى باقىتبەك ەسەنتايەۆتى پوليسيا كۇدىكتى رەتىندە قاماۋعا العان. تالعار اۋداندىق ءىىب حابارلاۋىنشا، كيكىلجىڭ كەزىندە پروديۋسەردىڭ كۇيەۋى ىشىمدىككە ماس بولعان كورىنەدى.   

دارىگەرلەر جابىق باس-مي جاراقاتى، پاراوربيتالدى گەماتوما، بىرنەشە ىشەكتى زاقىمداعان قارىن تۇسىنىڭ پىشاق جاراقاتى سىندى دياگنوز قويعان پروديۋسەردىڭ دەنساۋلىعى تۇراقتى اۋىر كۇيدە قالىپ وتىر. دارىگەرلەر ونىڭ باسى مەن كەۋدەسىن توموگرافياعا تۇسىرگەن. اق حالاتتىلار ءقازىر جانساقتاۋ بولىمىندە جاتقان بايان ەسەنتايەۆا اۋرۋحانادا كەمى 10 كۇن بولاتىنىن ايتۋدا.