تاۋەلسىزدىگىمىزدىڭ 25 جىلدىعى مەن الماتى قالاسىنىڭ 1000 جىلدىعى قارساڭىندا بيبىگۇل تولەگەنوۆا ۆوكاليستەرىنىڭ حالىقارالىق سەگىزىنشى بايقاۋى وتەدى. بۇل شارا تاۋەلسىز قازاقستان جاس انشىلەرىنىڭ بيىك تالعامىن، ونەرگە دەگەن تەرەڭ تۇسىنىگىن قالىپتاستىرۋدى ماقسات ەتەدى. حالىقارالىق بايقاۋ جاس ونەرپازداردىڭ نازارىن كلاسسيكالىق جانە حالىق اندەرىنە اۋدارىپ، ولاردى ناعىز ونەردىڭ بۇلاعىنان سۋسىنداۋعا شاقىرادى. ءان سايىسى جاڭا تالانتتاردىڭ ەسىمىن انىقتاپ، قازاق كلاسسيكالىق ونەرىن اسقاقتادى ءارى جاستاردىڭ رۋحاني كەمەلدەنۋىنە كومەكتەسەدى. حالقىمىزدىڭ مادەنيەتى مەن ونىڭ جان-دۇنيەسىن قالتقىسىز تانۋعا جول اشاتىن تاڭداۋلى تۋىندىلار ورىندالادى. وعان قوسا، قازاقستان كومپوزيتورلارى شىعارماشىلىعىنان دا حالىق اندەرىنە ۇقساس تۋىندىلار ۇسىنىلادى.

ءداستۇرلى تۇردە ۇيىمداستىرىلاتىن بيبىگۇل تولەگەنوۆا ۆوكاليستەرىنىڭ حالىقارالىق بايقاۋى تەك قانا ونەر سايىسى ەمەس. ول الماتى قالاسى مەن قوناقتارى اسىعا كۇتەتىن ءان مەرەكەسىنە اينالىپ كەتكەن.

كونكۋرسقا 1984 جىلدىڭ 1 قازانى مەن 1997 جىلدىڭ 1 قازانى ارالىعىندا ومىرگە كەلگەن ونەرپازدار قاتىسا الادى. بايقاۋ ىرىكتەۋ جانە اقتىق كەزەڭنەن تۇرادى. بارلىق تىڭدالىم ەل الدىندا وتەدى. انشىلەردىڭ ساحناعا شىعۋ رەتى جەرەبە ارقىلى انىقتالادى. ال سوڭعى اقتىق كەزەڭدە 12-14 قاتىسۋشى ب ا ق سىناپ، سايىسقا تۇسەدى.