اقتوبەدەگى تەراكتىدەن سوڭ تۋرا ءۇش اي توعىز كۇننەن كەيىن وبلىستىق ىشكى ىستەر دەپارتامەنتى سوت الدىنا كەلدى.  ءتارتىپ ساقشىلارىنىڭ قاتەلىگى سالدارىنان "تەرروريستەردىڭ" تىزىمىنە  كىرىپ كەتكەن اعايىندى سامات پەن تاڭات قوجانيازوۆتار وسى ۋاقىت ىشىندە بيلىكتەن بىردە-بىر ادام كەلىپ كەشىرىم سۇرامادى دەيدى. پوليسيانى جاۋاپقا تارتۋدى كوزدەگەن ولار ءتىپتى مورالدىق شىعىن رەتىندە 10 ميللون تەڭگە تالاپ ەتىپ وتىر، - دەپ حابارلايدى Qamshy.kz 31-ارناعا سىلتەمە جاساپ.

سوت زالىنداعى ايىپتالۋشى وتىراتىن ورىن بۇگىن بوس. ءبىراق بۇل جاۋاپ بەرۋشى تاراپ جوق دەگەندى بىلدىرمەيدى. بۇل جولى سوت الدىندا بۇتىندەي ءبىر اقتوبە وبلىستىق ىشكى ىستەر دەپارتامەنتى. قۇزىرلى ورگاننىڭ ۇستىنەن ارىز جازعان اعايىندى سامات پەن تاڭات قوجانيازوۆتار. 5 ماۋسىمدا اقتوبەدە تەراكت جاساپ، اسكەريلەر مەن بەيبىت تۇرعىندارعا اياۋسىز وق جاۋدىرعان تەرروريستەردىڭ تىزىمىنە قوجانيازوۆتاردى ەنگىزىپ جىبەرگەندەرى ءۇشىن دەپارتامەنت قىزمەتكەرلەرى كىنالى دەيدى. ناقتىراعى، تاڭاتتى ولتىرىلگەن لاڭكەستەردىڭ، ال ساماتتى ىزدەۋ سالعان تەرروريستەردىڭ قاتارىنا قوسىپ، جالعان اقپارات تاراتقاندارى ءۇشىن جاۋاپ بەرىپ، ءتىپتى كەشىرىم سۇراۋلارىن تالاپ ەتەدى. 

تاڭات قوجانيازوۆ  جاعابۇلاق اۋىلىنىڭ تۇرعىنى:

  - مەن 9-ى كۇنى كوردىم. 10-ى كۇنى اشۋمەن كەلدىم جەڭگەمدى ەرتىپ. اعام بارا المادى داۆلەنيە بولىپ، ۇيدەن شىققىسى كەلمەدى. ءبىر جەتى كۇتىڭىز، ءبىر جەتىدەن كەيىن حابار بەرەمىز، كەشىرىم سۇرايمىز دەدى. ءبىر اي ءوتتى، ەكى اي ءوتتى، ءۇشىنشى ايعا كەتتى كەشىرىم سۇراعان جوق.

ال، اقتوبە وبلىستىق ىشكى ىستەر دەپارتامەنتى اعايىندىلاردان كەشىرىم سۇراۋعا اسىقپايدى.

قارلىعاش قۇرمانعازينا، اقتوبە وبلىستىق ءىىد وكىلى:

 - كىنامىز بولسا، سۇرايمىز. كىنامىز بولماسا، سۇرامايمىز. ءقازىر كىنامىز جوق. نەگە دەسەڭىز ول «سوسيالنىي سەتتە» ايتىلعان انىقتاما. «سوسيالنىي سەتتتىڭ» بىزگە ەشقانداي قاتىسى جوق.

 - ول ادامداردىڭ ءتىزىمىن كىم شىعارىپ وتىر وندا؟

 -  بىلمەيمىن، ءبىزدىڭ ەش قاتىسىمىز جوق.

بۇگىنگى العاشقى سوتقا اعايىندى قوجانيازوۆتار اۋىلدارىنان كورشىلەرى مەن تۋما-تۋىستارىن ەرتە كەلىپتى. ولاردىڭ ءبارى  كۋاگەر رەتىندە تىڭدالدى. ال ساماتتىڭ جارى بۇل جاعدايدىڭ وتباسىنا اۋىر سوققى بولىپ تيگەنىن  ايتادى.

گۇلميزا قالبەكوۆا، سامات قوجانيازوۆتىڭ جارى:

 -  سترەسس بولدى مەنىڭ جولداسىمدا شىندىعى كەرەك. ءبىر ادام كەلگەن جوق ءبىزدىڭ الدىمىزعا. ءالى بۇل سپيسكادا ءجۇر دەگەن سوڭ ءبىز ماسەلەنى قوزعاپ تۇرمىز. قاي جەرگە بارساق تا الدىمىزدان شىقتى.

تەگىمىزگە قارا كۇيە بولىپ جاعىلعان بۇل جاعداي ءالى دە كەسىرىن تيگىزۋدە دەيدى ازاماتتار. ءتىپتى اۋىلداستارى دا ەكى جىگىتكە ازىلدەپ «تەرروريست، ۆاحابيست» دەپ  لاقاپ ات قويىپ ۇلگەرىپتى.

سامات قوجانيازوۆ، جاعابۇلاق اۋىلىنىڭ تۇرعىنى:

- شەت ەل تۇگىلى قازاقستاندا، مىنا بەينەۋدە وسى تۇرعاندا وريەنتيروۆكادا تۇرمىن.

جانار قوجانوۆا، تءىلشى:

- لاڭكەستەردىڭ تىزىمىنەن الىنسا دا قوجانيازوۆتاردىڭ تەگى ەلىمىزدەگى قىلمىسكەرلەردىڭ جالپى بازاسىندا ءالى تۇرعان كورىنەدى.  ەندى اعايىندى جىگىتتەر بۇل جاعداي  ءوسىپ كەلە جاتقان بالالارىمىزعا كەرى اسەرىن تيگىزەدى مە دەپ قورقادى. سول ءۇشىن دە ءوز تەكتەرىن اقتاپ العىلارى كەلەدى. سوتتىڭ كەلەسى وتىرىسى قىركۇيەكتىڭ 26-  نا بەلگىلەندى.