قورداعى تريلليوندار تەككە كەتىپ جاتقان جوق! ۇلتتىق بانك ءتوراعاسى ءبىرىڭعاي زەينەتاقى قورىنداعى اقشا ءۇشىن ازاماتتارعا   ەش الاڭداماۋعا كەڭەس بەردى. دانيار اقىشيەۆتىڭ ايتۋىنشا، جۇرتتىڭ «قارتايعاندا قاجەت بولادى» دەپ جيعان تەڭگەلەرى ۇكىمەت سەنىم ارتقان بانكتەر مەن ءىرى جوبالاردى قارجىلاندىرۋعا جۇمسالۋدا، - دەپ حابارلايدى Qamshy.kz كتك ارناسىنا سىلتەمە جاساپ.

دانيار اقىشيەۆ، ۇلتتىق بانك ءتوراعاسى:

ء-بىرىڭعاي زەينەتاقى قورىنداعى ءار تيىنعا مەملەكەت تىكەلەي جاۋاپ بەرەدى. بۇل تالاپ زاڭدا دا جازىلعان. سوندىقتان، قوبالجۋعا ەش نەگىز جوق.

سونداي-اق، باس بانكير قورداعى قارجىنىڭ قايدا بولىنگەنىن جانە ودان تۇسكەن پايدا تۋرالى اقپاراتتى تۇراقتى جاريالايمىز دەپ سەندىرىپ وتىر. بۇعان دەيىن پرەزيدەنت زەينەتاقى قورىنداعى تريلليونداردى ەكىنشى دەڭگەيلى بانكتەرگە بەرىپ، شاعىن جانە ورتا بيزنەستى نەسيەلەندىرۋدى تاپسىرعان ەدى. ال قالعانىن شەتەلدەن قۇندى قاعاز ساتىپ الۋعا، اۋىل شارۋاشىلىعى سالاسىنا ارنالعان ءوندىرىس ورىندارىن اشۋعا جۇمسالۋى ءتيىس بولاتىن. ءبىراق، اقىشيەۆتىڭ ايتۋىنشا، ەلىمىزدەگى ەكىنشى دەڭگەيلى بانكتەر زەينەتاقى قورىنداعى قارجىعا اسا قۇمارتىپ وتىرعان جوق. 15 بانك نەبارى 112 ميلليارد سۇراپتى. ەسەسىنە، قوردىڭ 15 ميلليارد تەڭگەسى «ەكسپو» كورمەسى اۋماعىنان تۇرعىن ۇيلەر مەن ساۋدا ورتالىقتارىن تۇرعىزۋعا جۇمسالماقشى.