گاز باللونى مەن قۇتىعا بەنزين قۇيىپ الىپ دالاعا شىققان تۇرعىندار تۋرا پوليسەيلەردىڭ كوزىنشە، ۇستەرىنە ءورت قويماقشى بولدى. اشۋلى جۇرت ءتىپتى وقيعا ورنىنا جەتكەن شەنەۋنىكتەرمەن توبەلەسۋگە شاق قالدى. حالىقتىڭ بار كىناسى – ەلوردادا جاڭادان سالىنىپ جاتقان تەمىرجول ۆوكزالىنا جاقىن تۇرۋى. ويتكەنى، استانا اكىمدىگى ۆوكزالدىڭ كوركىن كەتىرىپ تۇرعان 40-قا تارتا جەر ءۇيدى قيراتىپ، ورنىنا ءزاۋلىم عيمارات پەن جول سالماقشى، - دەپ حابارلايدى Qamshy.kz كتك-عا سىلتەمە جاساپ. 

استانادا جىلدام سالىنىپ جاتقان جاڭا ۆوكزالعا كورشىلەس ساياجاي تۇرعىندارى شەنەۋنىكتەردى سەسكەندىرۋ ءۇشىن ابدەن دايىندالىپتى. ايەلدەر كانيستر، پلاستيك بوتەلكەگە بەنزين قۇيىپ كوتەرىپ ءجۇر. ەر-ازاماتتار بولسا، ۇيدەگى پايدالانىپ وتىرعان گاز باللونىن دالاعا شىعارىپ العان. ءسويتىپ، وزدەرىن جارىپ جىبەرمەك. ال قاپتاعان پوليسەيلەر نارازى توپتى قىزىل لەنتامەن قورشاپ قويىپ، اينالانى كۇزەتىپ تۇر.

سوت بۇل ازاماتتاردىڭ قالا ىشىندەگى ساياجايعا سالىپ العان باسپانالارى ءسۇرىلسىن دەگەن شەشىم شىعارعان. ءبىراق، جۇرت ۇيرەنىپ قالعان ۇيلەرىن وڭايلىقپەن بوساتىپ بەرگىسى جوق. ورنىنا پاتەر سۇراپ وتىر.

جاڭابەك سۋانبەكوۆ، استانا قالاسىنىڭ تۇرعىنى:

-مەن جارىلامىن، ولەمىن، باسقا نە ىستەيمىن؟ قايدا بارامىن؟ بارار جەر، باسار تاۋىم جوق. اقشاسى كەرەك جوق، پاتەر  بەرسىن. جارىقتى قيامىز كەتىڭدەر دەپ جاتىر.

نەگىزى، بۇل ساياجايداعى 40-قا جۋىق ءۇي ءسۇرىلۋى ءتيىس. جارتىسىنا 2 ميلليوننان 8 ميلليون تەڭگەگە دەيىن اقشالاي وتەماقى تولەنگەن، ال قالعاندارىنا استانادان 5 شاقىرىم جەردەگى الەكساندروۆكا ەلدى مەكەنىنەن جەر تەلىمدەرىن ۇسىنعان. تۇرعىندار كۇن سۋىپ كەتكەندىكتەن ول ۋچاسكەلەرگە ءۇي سالىپ ۇلگەرمەيمىز دەپ وتىر. ءارى ورتالىقتان الىستاعىسى دا كەلمەيدى.

ەرلان ەسەنوۆ، استانا قالاسىنىڭ تۇرعىنى:

-بىلگەندەرىن ىستەپ جاتىر. بىرەۋىنە «كوش» ال  ەكىنشىلەرىن قالاسىڭ دەپتى.  نە الالاۋ بۇل؟

وزدەرىن ورتەمەككە بەل بۋعانداردىڭ قاسىنا اكىمدىكتەگىلەر دە شۇعىل جەتتى. «قالالىق جىلجىمايتىن مۇلىك» كوممۋنالدىق كاسىپورنىنىڭ باسشىسى اشۋلى تۇرعىنداردى باسۋدىڭ ورنىنا، كەلىنشەكتەرمەن سالعىلاسىپ، ودان سايىن ىزالاندىردى.  

-اۋزىڭدى جابا تۇرشى.

-مەنىڭ ءبىر جىل بويى اۋزىما قاقپاق بولىپ كەلەسىڭ .

-ۇياتسىزسىڭ سەن.

ء-وزىڭ ۇياتسىز.  

وسىلايشا، شەنەۋنىك ايەلدەرمەن ابدەن ايتىسىپ بولعان سوڭ، ۇيلەرى سۇرىلگەندەرگە اكىمدىك تاراپىنان جاسالعان شارالاردى ءتىزىپ، اقتالۋعا كىرىستى.

الەكساندر ستروچكوۆ، «قالالىق جىلجىمايتىن مۇلىك» مكك باسشىسى:

-بۇل مەملەكەتتىڭ مەنشىگىندەگى جەر. نەگىزى تۇرعىنداردىڭ سالىپ العان ۇيلەرىنە عانا وتەماقى بەرىلەدى. ال ولار 10 ميلليون تەڭگەدەن تالاپ ەتىپ وتىر. ۋچاسكە بولدىك، بارعىلارى جوق.

ۇيلەردىڭ جاپپاي سۇرىلۋىنە – بۇل ماڭنان تەمىرجول ۆوكزالىنىڭ  سالىنۋى سەبەپ. كەلەسى جىلى جازدا «ەكسپو» قارساڭىندا قۇرىلىسىن ءبىتىرۋ كەرەك بولعاندىقتان بۇندا قىزۋ جانتالاس. تۇرعىنداردىڭ كۇنى ەرتەڭ ناعىز ورتالىققا اينالاتىن بۇل ماڭنان كەتكىسى كەلمەيتىنى تۇسىنىكتى. ال قيراتىلعان باسپانالاردىڭ ورنىنا كوپقاباتتى ءزاۋلىم عيماراتتار مەن بىرنەشە جولاقتى اسفالت توسەلمەك. ءبىراق، وتەماقىعا دا، بولىنگەن جەر تەلىمىنە دە كوڭىلى تولماعان جۇرتتىڭ ولىسپەي بەرىسكىسى جوق.

استاناداعى باسپانا داۋى مۇنىمەن شەكتەلمەيتىن سىندى. ويتكەنى، ەلوردادا ءالى 16 مىڭنان استام ساياجاي سۇرىلمەك. قيراتىلعان ۇيلەردىڭ ورنىنا كوپقاباتتى نىساندار، مىڭ جىلدىق اللەياسى، گاز قۇرىلعىلارىن شىعاراتىن زاۋىت سالىنادى. ال باسپانالارى سۇرىلگەندەرگە پاتەر بەرىلمەيدى، تەك  باسقا اۋدانداردان جەر تەلىمى قاراستىرىلعان.