پاۆلودارلىق كەلىنشەك ولەسيا پۋشكينانىڭ جۇرەگىمەن ءومىر ءسۇرىپ جاتقان الماتى وبلىسىنىڭ تۇرعىنى وزىنە ءومىر سىيلاعان جاننىڭ تۋعاندارىنا العىس ايتىپ، ۆيدەوۇندەۋ جاسادى، - دەپ حابارلايدى Qamshy.kz Tengrinews.kz – كە سىلتەمە جاساپ.

ۆيدەوۇندەۋ اۆتورى تۋعان قىزىنىڭ جۇرەگىن وزىنە بەرگەن نادەجدا بەلايا مەن ولەسيانىڭ ارتىندا قالعان قىزى اريناعا العىس ءبىلدىردى.

«نادەجدا، ءسىزدىڭ قىزىڭىز ولەسيا قاشان دا مەنىڭ كەۋدەمدە ءومىر سۇرەدى. سىزدەر ماعان ءومىر سىيلادىڭىزدار. مەن قانشا ءومىر سۇرەتىنىمدى بىلمەيمىن، ءبىراق، مەن ونى ءومىر بويى قاستەرلەپ وتەم. ءارقاشان دا قىزدارىڭىز ءتىرى دەپ ويلاڭىزدار»، - دەيدى ول.

اتىن ەلگە تانىتۋدان باس تارتقان الماتى وبلىسىنىڭ تۇرعىنىنا وسى جىلدىڭ اقپان ايىندا وپەراسيا جاسالىپ، ميدىڭ گەمورراگيالىق ينسۋلتىنان كوز جۇمعان 37 جاستاعى ولەسيا پۋشكينانىڭ جۇرەگى قوندىرىلعان. و. پۋشكينانىڭ ارتىندا 18 جاسار قىزى قالعان. وپەراسيا ءساتتى اياقتالىپ، اۋىر ناۋقاسقا شالدىققان ازامات اياققا تۇرعان.

ەلىمىزدە مۇنداي سيپاتتاعى دونورلىق كومەك ءبىر بۇل ەمەستىگىن ەستەرىڭىزگە سالامىز. قىركۇيەك ايىندا 20 جاستاعى تاعى ءبىر پاۆلودارلىق جىگىتتىڭ ورگانلارى بەس ادامنىڭ ءومىرىن قۇتقارعان بولاتىن. سكەيتبوردپەن سىرعاناپ ءجۇرىپ، اۋىر جاراقات العان ول پاۆلودارلىق جىگىت تە اۋرۋحانادا كوز جۇمعان. مارقۇمنىڭ تۋىستارى ونىڭ ىشكى ورگاندارىن مۇقتاج جاندارعا بەرۋ جونىندە شەشىم قابىلداعان. سول دونورلىق كومەكتىڭ ارقاسىندا امان قالعانداردىڭ ىشىندە 14 جاستاعى اقمولالىق وقۋشى قىز بەن 67 جاستاعى استانالىق زەينەتكەر دە بار.

اۋىر سوققىدان كوز جۇمعان تاعى ءبىر دونور پاۆلودارلىق 32 جاستاعى جىگىتتىڭدە جۇرەگى باسقا ءبىر ادامعا ءومىر سىيلاعان.