بۇگىن پورتال بەتىندە «ءوزىن داۋلەت تۇرلىحانوۆ دەپ تانىستىرعان ادام ەربولاتقا «Ninety One» توبى ءۇشىن سوگىس ايتتى (اۋديو)» دەگەن ماتەريال جارىق كورگەن بولاتىن.  قامشى پورتالى ماسەلەنىڭ انىق-قانىعىن انىقتاۋ ماقساتىندا داۋلەت تۇرلىحانوۆقا قوڭىراۋ شالعانىن، الايدا داۋلەت مىرزامەن بايلانىس ورناتىلماعاندىعىن تىلگە تيەك ەتكەن ەدى. بىرەر مينۋت بۇرىن ۇلت ماقتانىشىنىڭ ءوزى پورتال ءتىلشىسى جازيرا بايدالىعا كەرى قوڭىراۋ شالىپ، ءوز شىندىعىن باياندادى.

داۋلەت تۇرلىحانوۆ:

«بۇل بىرەۋدىڭ جاساعان ينتريگاسى. اۋديوجازبادا ءوزىن داۋلەت تۇرلىحانوۆ دەپ تانىستىرعان داۋىستىڭ يەسى مەن ەمەسپىن. ەربولات بەدەلحانمەن بۇل ماسەلە بويىنشا سويلەسكەن جوقپىن. كىم نە ءۇشىن، قانداي ماقساتتا مەنىڭ اتىمدى پايدالانىپ وتىر تۇسىنبەدىم. شىن ايتسام، «Ninety one» دەگەن توپ بارىن دا بىلمەپپىن. جاڭا عانا مادەنيەت جانە سپورت ءمينيسترى ارىستانبەك مۇحامەدي ۇلى ورىن العان جايتتى جوققا شىعارۋىمىز قاجەت دەپ حابارلاسقان بولاتىن. مەن تاعى دا قايتالاپ ايتايىن، بۇل بىرەۋدىڭ ينتريگاسى، قاتتى تاڭىرقاپ وتىرمىن».

قامشىگەرلەر اتىشۋلى توپتىڭ پروديۋسەرى ەربولات بەدەلحانعا قوڭىراۋ شالدى. ەربولات مىرزانىڭ ۇيالىسى ءوشىرۋلى.