كوكشەتاۋدا ارىپتەسى دارحان ەلامانوۆتى تاپانشامەن اتىپ ءولتىردى دەگەن كۇدىكپەن پوليسيا قىزمەتكەرى تۇتقىنعا الىندى دەپ حابارلايدى 31.kz. مۇنداي قىلمىسقا بارۋى مۇمكىن دەگەن جانىبەك بايمۋرزين ءوز كىناسىن تولىق مويىنداپ، ءقازىر قاماۋعا الىندى. ال، قايعىدان قان جۇتقان مارقۇمنىڭ جاقىندارى كۇدىكتى ءتيىستى جازادان قۇتىلىپ كەتە مە دەپ الاڭدايدى.

جەكسەنبى. كەشكى ساعات توعىزعا بەس مينۋت قالعان ءسات. وسى ۋاقىتتا جۇمىستان شىققان دارحان ەلامانوۆ ايەلىمەن تەلەفون ارقىلى سوڭعى رەت سويلەسكەن. اتا-اناسى مەن ۇيلەنگەندەرىنە ءۇش اي عانا بولعان سۇيىكتى جارى ۇيدە اسىعا كۇتىپ وتىرعان ەدى. الايدا، ءتارتىپ ساقشىسى وتباسىنا ورالمادى. حابار دا ۇزىلگەن. ىشكى ىستەر قىزمەتى ءبىر تاۋلىكتەن سوڭ  ىزدەۋ جاريالادى. تۋىس-تۋعاندارىمەن بىرگە دارحاندى تانىعان 100-گە  جۋىق جورا-جولداستارى دا ىزدەۋگە شىعادى. ارادا ەكى كۇن وتكەندە ەلامانوۆتاردىڭ شاڭىراعىنا سۋىق حابار جەتەدى. كريمينالدىق پوليسيادا نەبارى 2 جىل ىستەگەن ءتارتىپ ساقشىسىنىڭ ءمايىتى تابىلىپتى.

مۇرات ەلامانوۆ، دارحاننىڭ اكەسى:

- مىنا مويىن مەن باس جاعىندا جاراقات بار. سرازۋ ناسمەرت سول جەردە اتقان. كيىمىن ءبارىن شەشىپ العان. ششۋچينسكىنىڭ تراسساسىنا الىپ شىعىپ، ءوزىن قارعا جاپقان. نەكە ساقيناسىن العان، دوكۋمەنتتەرىن العان، تابەلنىي پيستولەتىن العان. قالعان كيىمى مەن سوتكاسىن ورتەپ جىبەرگەن.

دارحاننىڭ دەنەسى تابىلعاننان كەيىن كوپ ۋاقىت وتپەي قىلمىسقا باردى دەگەن كۇدىكتىنىڭ ەسىمى دە بەلگىلى بولدى. ول وزگە ەمەس، ءبىر سالادا يىق تىرەسە جۇمىس ىستەپ جۇرگەن اقمولا وبلىستىق ىشكى ىستەر دەپارتامەنتىنىڭ كريمينالدىق پوليسيا قىزمەتكەرى، 10 جىلدىق ءوتىلى بار، مايور جانىبەك بايمۋرزين.

گۇلنار پينچۋك، اقمولا وبلىسى ءىىد باسپا ءسوز قىزمەتىنىڭ جەتەكشىسى:

- كۇدىكتى ۇستالىپ، قىلمىستىق پروسەسۋالدىق زاڭناماعا سايكەس ۋاقىتشا قاماۋعا الىندى. ءوزىنىڭ كىناسىن مويىنداپ وتىر. ولتىرۋگە اراداعى الاۋىزدىق سەبەپ بولعان.

الاۋىزدىقتىڭ نەدەن تۋىنداعانى تۋرالى ازىرگە ىشكى ىستەر قىزمەتكەرلەرى ءتىس جارماي وتىر. ال، مارقۇمنىڭ تۋىسقاندارى جانىبەك ءبايمۋرزيننىڭ سوتتا  جانە وزگە دە قۇزىرلى ورگانداردا ىستەيتىن  بەدەلدى جاقىندارىنىڭ ارقاسىندا ول جازادان قۇتىلىپ كەتە مە دەپ الاڭدايدى.

نۇربەك ەلامانوۆ، دارحاننىڭ اعاسى:

- ءبىز ءادىل شەشىم سۇرايمىز. ءوز كىناسىنا لايىقتى جازاسىن السىن. جاۋىپ تاستاپ، جاسىرىپ ونداي بولماسىن. قانداي جاقسى بالا ەدى. جاقىندا 16 جەلتوقساندا ۇلگىلى قىزمەتى ءۇشىن دەپارتامەنت باسشىسىنىڭ قولىنان العىس حات العان. ارىپتەستەرى دە، بارلىعى شوك بولىپ وتىر. ەشقانداي جامان مىنەزىن بايقاماعان.

كۇدىكتىگە قىلمىستىق كودەكستىڭ 99-بابى بويىنشا ادام ولتىرگەنى ءۇشىن سوت ءىسى تاعايىندالدى. دەنەسىندەگى جاراقاتتار مەن دايەك زاتتاردى ەسكەرە وتىرىپ، بىرنەشە ساراپتاما جۇرگىزىلۋدە.ال، ارىپتەسى تاپانشامەن اتىپ ءولتىرۋى مۇمكىن دارحان ەلامانوۆتى جاقىندارى ەرتەڭ اقتىق ساپارعا شىعارىپ سالماقشى.