شىمكەنتتە قاراپايىم ينجەنەر مەن دانەكەرلەۋشى سيىردىڭ قيىنان بيوگاز الاتىن ءمودۋلدى جۇيەنى جاساپ شىقتى دەپ حابارلايدى 24.kz.

وزگە جوبالاردان ەرەكشەلىگى، قوندىرعى تولىقتاي قولمەن قۇراستىرىلعان. وعان قوسا، قيدى جەيتىن باكتەريانى دا وزدەرى تاپتى.

قوس ونەر يەسى 30 توننالىق العاشقى رەاكتوردى اشىق اسپان استىندا قۇراستىرىپتى. قوندىرعى اۋا رايىن تالعامايدى. ياعني جىل 12 اي جۇمىس ىستەي بەرەدى. ءبىر ەرەكشەلىگى، شيكىزات رەتىندە تەك ءىرى قارا مالدىڭ قيىن عانا قولدانادى. ويتكەنى ودان بولىنەتىن مەتان ءقومىرقىشقىل گازىنا قاراعاندا قورشاعان ورتاعا الدەقايدا زياندى ەكەن.

سالاۋات داۋىلبايەۆ، ينجەنەر-ەلەكترونشى:

 - ورتا ەسەپپەن 30 توننادان كۇنىنە 480 كۋب تازا مەتان اۋاعا كەتەدى. ول جوعارى ازون قاباتىن بىلعاپ، قورشاعان ورتاعا زيانى وتە كۇشتى. مەتان كومىرقىشقىل گازىنا قاراعاندا 28 ەسە قورشاعان ورتاعا زياندى. سوندىقتان مالاقتى پايدالانىپ جاساپ جاتىرمىز.

قوندىرعىنىڭ قۇرىلىمى وتە قاراپايىم. كادىمگى قيعا سۋ قوسىلىپ، جابىق بوشكەنىڭ ىشىندە ارالاستىرىلادى. سول كەزدە ونىڭ قۇرامىنداعى مەتان بولىنەدى. 1 توننا بيوماسسادان 27 كۋب مەتان الىنادى ەكەن. بوشكەدەگى گاز 18 كۇن بويى جانىپ تۇرادى. «ءمودۋلدى جۇيە شاعىن اۋىل مەن ءوندىرىستى تۇتاستاي گازبەن قامتۋعا جەتەدى»، - دەيدى ونەرتاپقىشتار.

سالاۋات داۋىلبايەۆ، ينجەنەر-ەلەكترونشى:

 - مەتاننىڭ تازالىعى 75-80%. وڭايلىقپەن كوزگە كورىنبەيدى. سىزدەرگە قاعازدى وتالدىرۋ ارقىلى كورسەتەيىن. اراسىندا كىشكەنە كومىرسۋتەك بار. بايقاعان شىعارسىزدار، قىزىل بولىپ جانىپ تۇرعان سول كومىرسۋتەك. ودان كەيىن اممياك بولادى. ولاردى ارنايى قوندىرعى ارقىلى الىپ تاستاي الامىز. جاڭا جۇيەنىڭ سىزباسىن وزدەرى جاساعان. سيستەرنانىڭ ىشىنە قيدى ارالاستىراتىن ۇزىندىعى 8، ەنى ەكى مەتر بولاتىن بىلتە تەمىرى مەن قالاقشا ورناتىلعان. كوبىنە شىرىمەيتىن تەمىر قولدانىلعان. دانەكەرلەۋ جۇمىسى اسقان ۇقىپتىلىقتى قاجەت ەتەدى. «سەبەبى ينەنىڭ جاسۋىنداي تەسىك قالسا، بار جۇمىس زايا كەتەدى»، - دەيدى اسلان تۇرسىنحانوۆ.

اسلان تۇرسىنحانوۆ، دانەكەرلەۋشى:

 - وسى بيوماسسانى بولاشاقتا وزىنەن شىققان گازدان جانە وزىنەن شىققان جارىقپەن ءوزىن-وزى قامتاماسىز ەتەتىن جاعدايعا جەتكىزەمىز. جانە نەگىزگى ماقساتىمىز – بيوماسسانى اۋىل شارۋاشىلىعىندا جانە جىلىجاي شارۋاشىلىعىندا قولدانۋ.

30 كۇن بويى بوشكەدە تۇرعان بيوتىڭايتقىش جەردىڭ قۇنارىن 25-30%-عا ارتتىرادى. قۇرامىنداعى زياندى زاتتارى الىنعان قي سەبىلگەن جەرگە ءارامشوپ تە شىقپايدى ەكەن. ول عىلىمي تۇرعىدا دالەلدەگەن. ونەرتاپقىشتار «جاسىل» ەكونوميكالىق جوبانى تولىقتاي ينتەرنەت ارقىلى باسقارۋ جۇيەسىن ەندىرىپ جاتىر. جوبا قولداۋ تاپسا، وندىرىسكە شىعارۋعا ءازىر. «باعاسى دا شەتەلدىكىنەن الدەقايدا ارزان»، - دەيدى ونەرتاپقىشتار.