«دوم-2» (ءۇي-2) رەاليتي-شوۋىنىڭ ۇيىمداستىرۋشىلارى قازاقستاندا كاستينگ وتكىزەدى دەپ حابارلايدى vistanews.ru العاشقى ىرىكتەۋدى استانا قالاسىندا وتكىزبەك. ال كاستينگتى "دوم-2" جۇرگىزۋشىسى اندرەي چەركاسوۆ جۇرگىزەدى. اتالمىش سايتتىڭ مالىمەتىنە ساي، رەسەيلىكتەر «دوم-2» شوۋىنا قاتىسقىسى كەلمەيدى ەكەن. بۇعان تاڭ قالۋدىڭ قاجەتى جوق. سەبەبى «دوم-2» رەسەيلىكتەردىڭ اراسىندا ارزان، ەشقانداي سالماعى جوق جوبا رەتىندە قابىلدانادى. وسىندا «قازاقستاندىقتار ءۇشىن بۇل شوۋدىڭ نە قاجەت بار؟» دەگەن سۇراق تۋىندايدى. ەشقانداي تاربيەلىك ءمانى جوق، تەك رەيتينگكە عانا نەگىزدەلگەن جوبا العاش شىققاندا، وتاندىق تەلەارنالاردىڭ بىرىندە  كورسەتىلگەن. سوندا قازاقستاندىق كورەرمەن «قازاق مەنتاليتەتىنە جات» دەپ نارازىلىقتارىن بىلدىرگەن ەدى. كوپ ۇزاماي اتالمىش شوۋ ەفيردەن الىنىپ تاستالدى. قازاقستاندا كورسەتىلىمىن توقتاتقان شوۋ، رەسەيدە لاتىن امەريكانىڭ ۇزىن سونار تەلەحيكاياسى سەكىلدى  بىرنەشە جىلدان بەرى كورسەتىلىپ كەلەدى. وندا ساتقىندىق، كوزگە ءشوپ سالۋ، بالاعات سوزدەر، تەمەكىنى بۋداقتاعان جاستار، ءبىر-بىرىن الداعان قىزدار مەن جىگىتتەر، تۇراقسىز ماحابباتتى كورەسىڭ. قاراپايىم مادەنيەت، ادەپ سەكىلدى ۇعىمداردان ادا جوبادا قارا كوز قازاقتىڭ قىزدارى مەن جىگىتتەرىنىڭ جۇرگەنى جاراسپاس.