قازاق ەستراداسىنىڭ 99 پايىزى فونوگراممامەنەن ءان سالىپ، توي بيزنەسپەن جان باعادى. شىندىقتى سايراتساق، ءون بويى شىندىقتان ادا  قالعان ءبىزدىڭ قوعام جالعاندىقتار مەن وتىرىكتىڭ وتانىنا اينالعان. ءوزىمىزدى-وزىمىز وتىرىك قامشىلاپ، جالعاندىقتارىمىزعا جانتالاسا جۇگىرەمىز دە جۇگىنەمىز. ساقىلداپ ءجۇرىپ تۇرعان ۋاقىت ماشيناسى ادام، قوعام، زامان دەگەن سياقتى ولشەمدەردى جۇكتەپ الىپ زىرلاپ بارادى. سوعان ىلەسەمىز دەپ ءبىز نە ىستەمەي جاتىرمىز. ءبىز ءبارىن ىستەپ جاتىر ەكەنبىز. وتىرىك ەڭبەك ەتەدى ەكەنبىز، وتىرىك اتاق الادى ەكەنبىز، وتىرىك كونكۋرس وتكىزەدى ەكەنبىز، وتىرىك ونەر كورسەتىپ، وتىرىك ءان ايتادى ەكەنبىز. وتىرىك ءمۇشايرا وتكىزىپ، وتىرىك اقىندار ايتىسىن وتكىزەدى ەكەنبىز. وتىرىك سايلاۋدى باستاپ، وتىرىك ۇتادى ەكەنبىز... وتىرىك، وتىرىك... وسىلاي وتىرىك ءورىپ تۇرعان ورتادا ءجۇرىپ «91» دەگەن توپ شىعىپ ەدى، «ويباي، قۇرتتى ءبىزدى دەپ» جاڭاعى وتىرىكشىلەر جاپا تارماعاي ۇلتشىل، سالتشىل، ءدىنشىل بولا قالىپتى. سالتىن ساقىرلاتىپ ۇستاپ جۇرگەن قازاقتى كورمەدىم. سالت دەگەن قازاققا تويدا عانا كەرەك. ءدىن بولسا ولگەندە عانا كەرەك. ۇلتشىلدىق نامىس بار ما بىزدە؟!

      ەي، دۇرىستاپ ءبىر ءان تىڭداي المايتىن بولدىق قوي! فونوگراميستەردەن جۇرەك اينىيدى. قالاي دەسەڭدەر دە «91» زامانىمەن كەلگەن ۇزدىك توپ. جۇرەكتى تەربەگەن ونەر، ونەر بولماعانى ما قازاق ءۇشىن. «91» بىزدە بوستىقتى تولتىردى. ءبىزدىڭ قىزار شەتەلدىڭ سونداي البا-جۇلبا جىگىتتەرىنە «ولگەنشە»، ءوزىمىزدىڭ اۋىلدىڭ سار باستارى مەن تەسىك قۇلاقتارىنا «ءولسىن»! وبال-ساۋابى بولسا، كۇنا-ازابى بولسا اركىم ءوزى تارتار. «91» دەگەن توپ كەلىپتى دەپ، سونشاما وتىرىك پەن جالعاندىقتان ازباعان حالىق، ەندى ازا قالا ما؟ قالاي دەسەك تە 2016-نىڭ ۇزدىك ءانى دە، ورىنداۋشىلاردى دا وسىلار. وتىرىك پاتريوت بولا قالعاندى قويايىق. ءوز باسىم ناماز وقيتىن اداممىن، ءبىراق بۇل توپتى قولدايمىن!

جاقسىبەك قاقان