DEMOSCOPE قوعامدىق پىكىرگە جەدەل-مونيتورينگ جۇرگىزۋ بيۋروسى قازاقستان ازاماتتارى اراسىندا «مەديسينالىق قىزمەت كورسەتۋ. ق ر دەنساۋلىق ساقتاۋ جۇيەسى» تاقىرىبىندا ساۋالناما جۇرگىزدى.
ساۋالناماعا استانا، الماتى قالالارى مەن 14 وبلىس ورتالىعىنان 18 جاستان اسقان 1937 ادام قاتىستى. ايەلدەر – 82%، ەر ازاماتتار – 18%. ىرىكتەۋ ىقتيمالدىعى 90%، سوندىقتان ستاتيستيكالىق كورسەتكىش قاتەلىگىنىڭ شەكتى مولشەرى 0،97%-دان اسپايدى.
ساۋالناما ءادىسى – تەلەفون ارقىلى جۇرگىزىلگەن سۇحبات جانە ونلاين-ساۋالناما. زەرتتەۋ 2016 جىلى 21-30 جەلتوقسان ارالىعىندا جۇرگىزىلدى.
قازاقستاندىقتار مەديسينالىق قىزمەتتەردى اقىلى پايدالاناۋدان باس تارتپايدى. حالىقتىڭ 51%-ى تۇتىنۋشىلاردىڭ قالاۋىنشا اقىلى جانە تەگىن قىزمەتتەردى ەنگىزۋدى دۇرىس دەيدى. قازاقستان مەديسيناسىنا بەس بالدىق جۇيە بويىنشا «ءۇش نەمەسە ودان تومەن» دەپ باعا بەرگەن قازاقستاندىقتار – 65%.
باسقا ايماقتارعا قاراعاندا الماتى مەن سولتۇستىك قازاقستان تۇرعىندارىنىڭ كوبى مەديسينا ساپاسىن ناشار دەيدى. بۇل پىكىردى 38% الماتىلىقتار مەن 36% سولتۇستىك قازاقستاندىقتار ءبىلدىردى. جالپى، دەنساۋلىق ساقتاۋ جۇيەسىن «وتە جاقسى» دەپ باعالاعاندار نەبارى – 2،5%. سونداي-اق، 10،5% رەسپوندەنتتەر ەلىمىزدە مەديسينا سالاسىندا بولىپ جاتقان بىرنەشە جاعىمدى جاڭالىقتاردى اتاپ ءوتتى، ءبىراق سوڭعى ۋاقىتتا ناشارلاپ بارا جاتقانىن مويىنداۋ كەرەك دەيدى.
ساۋالناما بارىسىندا ەلىمىزدىڭ دەنساۋلىق ساقتاۋ جۇيەسىندەگى نەگىزگى ماسەلەلەر جايلى قازاقستاندىقتاردىڭ كوزقاراسى سۇرالدى. جاۋاپ بەرگەن ازاماتتاردىڭ 61%-ى بىلىكتى مامانداردىڭ جەتىسپەۋشىلىگى، مەديسينالىق ءبىلىمنىڭ تومەندىگى جانە مىقتى مامانداردىڭ شەت ەلدەرگە قونىس اۋدارۋى دەپ جاۋاپ بەردى. سونداي-اق، مەديسينا سالاسى قىزمەتكەرلەرى جالاقىلارىنىڭ ازدىعىن نەگىزگى پروبلەمالار قاتارىنا جاتقىزعاندار – 14%. 10% رەسپوندەنتتەر دارى-دارمەكتەر جەتىسپەيدى ءارى وتە قىمبات باعامەن ساتىلادى دەپ شاعىمداندى. سونىمەن قاتار، مەديسينالىق مەكەمەلەردەگى جەمقورلىق پەن ەمحانالاردىڭ جەتكىلىكتى دەڭگەيدە تەحنيكامەن جابدىقتالماۋىن 4% ازاماتتار اتاپ ءوتتى.
دەنساۋلىق ساقتاۋ سالاسىنداعى كەمشىلىكتەرگە بايلانىستى، كەيبىر ازاماتتار دارىگەرلەر كومەگىنە جۇگىنگەنشە، ءوز بەتىنشە ەمدەلگەندى ءجون كورەدى. ناقتى ايتار بولساق، 23% رەسپوندەنتتەر «تانىستارىمنىڭ كەڭەسىنە، حالىق ەمىنە جانە ينتەرنەتتەگى اقپاراتقا جۇگىنەمىن» دەپ جاۋاپ بەردى. بۇل جاۋاپتى تاڭداعاندارىڭ كوبى 60-69 جاس ارالىعىندا. شىعىس قازاقستان وبلىسى تۇرعىندارىنىڭ كوبى وسى جاۋاپتى تاڭدادى.
