رەداكسيامىزعا بۇگىن  شوقان ءۋاليحانوۆ اتىنداعى كوكشەتاۋ مەملەكەتتىك ۋنيۆەرسيتەتىنىڭ دايىندىق ءبولىمىنىڭ ادىسكەرى ديانا قۇرمانوۆا حابارلاستى. ول اتالمىش ۋنيۆەرسيتەتتە دايىندىق كۋرسىندا وقىپ جۇرگەن فاتيحا مامىتاقىن ەسىمدى جۇڭگو ازاماتشاسىنىڭ ماسەلەسىمەن حابارلاستى. جۇڭگو ەلىندە تۋىپ-وسكەن قازاق قىزىنىڭ ۆيزاسى 2017 جىلدىڭ 20-شى قاڭتارىندا بىتكەن ەكەن. الايدا قاڭتاردىڭ 11ء-ى كۇنى ۆيزا ۋاقىتى 20-شى قاڭتاردا بىتەتىنى ەسكەرتىلگەن. ۆيزانى ۇزارتۋ ءۇشىن كوكشەتاۋ قالاسىنىڭ كوشى-قون دەپارتامەنتىندە زاڭ بويىنشا 30 اەك، ياعني 68 مىڭ تەڭگە تولەۋ كەرەكتىگىن ايتقان.

«فاتيحا مامىتاقىن اتتى تىڭداۋشىمىز ۆيزاسىن ۇزارتۋ ءۇشىن 68 مىڭ تەڭگە تولەۋ كەرەكتىگىن، الايدا ونداي اقشاسى جوق ەكەنىن ايتىپ كومەك سۇرادى. ءبىز ءوز تاراپىمىزدان كوكشەتاۋ قالاسىنىڭ كوشى-قون باسقارماسىنا ءوتىنىش حات جازدىق. شوقان ءۋاليحانوۆ اتىنداعى كوكشەتاۋ مەملەكەتتىك ۋنيۆەرسيتەتىنىڭ پرورەكتورى فاتيحا مامىتاقىنمەن بىرگە ءوتىنىش حاتتى الىپ باردى. الايدا وندا كوپ رەتتى ۆيزانى الۋ ءۇشىن 68 مىڭ تەڭگەنى زاڭ بويىنشا تولەۋ كەرەكتىگىن جانە زاڭعا قارسى كەلە المايتىنىن ايتىپ، شىعارىپ سالعان. وسىدان كەيىن اتالمىش سوممانىڭ جارتىسىن ۋنيۆەرسيتەت قىزمەتكەرلەرى جيناپ بەردى، قالعانىن فاتيحا مامىتاقىننىڭ ءوزى تولەدى. الايدا، ءدال وسىنداي جاعدايدا ۆيزانى تەگىن ۇزارتقان تىڭداۋشىنىڭ بار ەكەنىن ەستىدىك. سوندىقتان، ماسەلەنىڭ انىق-قانىعىن انىقتاپ، 68 مىڭ تەڭگەنى قايتارىپ الۋىنا كومەكتەسسەڭىزدەر» دەدى ديانا قۇرمانوۆا.

وسىدان كەيىن رەداكسيا تىلشىلەرى كوشى-قون پوليسياسىنا حابارلاسىپ، قازاقستانعا وقۋعا كەلگەن شەتەلدىك قازاقتارعا ۆيزا تەگىن  ۇزارتىلاتىنىن انىقتادى.  

«زاڭ بويىنشا ۇلتى قازاق شەتەلدىك ازاماتتارعا ۆيزا تەگىن ۇزارتىلادى. ول ءۇشىن كۋالىگىندە ۇلتى قازاق دەپ كورسەتىلسە بولعانى. ال بىلمەستىكپەن 68 مىڭ تەڭگە تولەگەن جاعدايدا، كوشى-قون باسقارماسىنا بارىپ، «تۇبىرتەك قولدانىلمادى» دەگەن انىقتاما الادى. ونىمەن  سالىق دەپارتامەنتىنە بارۋى قاجەت. سول كەزدە اقشاسى قايتارىلىپ بەرىلەدى» دەدى سقو وبلىسىنىڭ اعا ينسپەكتورى راشيد جۇسىپبەكوۆ.

ياعني زاڭ بويىنشا تەگىن ۇزارتىلۋى ءتيىس ۆيزانى فاتيحا مامىتاقىن 68 مىڭ تولەپ العان. ەگەر «قامشىعا» حابارلاسپاعان جاعدايدا، بالكىم اتالمىش زاڭ تۋراسىندا بىلمەس پە ەدى. بىلمەستىكپەن قانشا قانداسىمىز 68 مىڭ تەڭگەسىن جەلگە ۇشىرعانى بەلگىسىز. بۇل رەتتە كوشى-قون باسقارماسى قىزمەتكەرلەرىنىڭ سالعىرتتىعىندا ەكەنىن اتاپ ءوتۋ كەرەك.

ءبىز كوكشەتاۋدىڭ كوشى-قون باسقارماسىنا حابارلاستىق. اقنۇر ەسىمدى قىزمەتكەر اتالمىش زاڭدى بىلمەگەندەرىن جانە تولەم جاسالىپ بولعاننان كەيىن عانا باسقارماعا شەتەلدىك قازاقتارعا ۆيزا تەگىن ۇزارتىلاتىنىن ايتتى دەپ اقتالدى. الايدا فاتيحا مامىتاقىننىڭ 68 مىڭ تەڭگەسىن قايتارىپ الۋىنا كومەكتەسەتىنىن جانە وسى ءىستى اياعىنا دەيىن جەتكىزەتىنىن حابارلادى.

«قامشى» پورتالى  وسى ءىستى اياعىنا دەيىن نازارىندا ۇستايدى جانە  فاتيحا مامىتاقىننىڭ ماسەلەسى زاڭدى تۇردە وڭ شەشىمىن تابۋىنا ات سالىساتىن بولادى. 

قامشىگەر: اسەم المۇحانبەت