بۇۇ-دا اقش-تىڭ تۇراقتى وكىلى نيككي حەيلي رەسەيگە قارسى سانكسيا قىرىمدى قايتارىپ بەرگەنگە دەيىن  جويىلمايتىنىن مالىمدەدى. حەيلي ۋكراينانىڭ شىعىسىنداعى اۋىر جاعدايعا رەسەيدى كىنالادى دەپ حابارلايدى bbc.com.  

«ءبىز شىنىمەن دە رەسەيمەن قارىم-قاتىناسىمىزدى جاقسارتقىمىز كەلەدى. الايدا ۋكرايناداعى اپاتتى جاعداي ناقتى جانە قاتاڭ تۇردە رەسەيدىڭ ىس-ارەكەتىن جازالاۋدى تىلەنىپ وتىر» دەدى نيككي حەيلي ءوزىنىڭ بۇۇ قاۋىپسىزدىك كەڭەسىندە سويلەگەن سوزىندە.

حەيلي ۆاشينگتوننىڭ ءالى كۇنگە دەيىن قىرىمدى ۋكرايناعا تيەسىلى دەپ ەسەپتەيتىنىن ايتىپ، رەسەيدى باسقىنشىلىق ارەكەتىن توقتاتۋعا شاقىردى.

ال رەسەيدىڭ بۇۇ-عى تۇراقتى  وكىلى ۆيتاليي چۋركين قىرىم تۇرعىندارىنىڭ رەسەي قۇرامىنا كىرۋگە داۋىس بەرگەنىن العا تارتتى.

سوڭعى كەزدەرى دونباستا قايتا قارۋلى قاقتىعىستار ورىن العانىن ەسكە سالامىز. ەكى تاراپ شيەلەنىستىڭ تۋۋىنا ءبىر-بىرىن كىنالاۋدا.

2016 جىلدىڭ جەلتوقسان ايىندا ۆاشينگتون حاكەرلىك شابۋىل تۋرالى شۋعا قاتىستى رەسەيگە جاڭا سانكسيا سالدى. قاڭتار ايىنىڭ ورتاسىندا باراك وباما رەسەيگە قاتىستى سانكسيانى تاعى ءبىر جىلعا ۇزارتقان.

دونالد ترامپ پرەزيدەنت قىزمەتىنە كىرىسكەلى بەرى، ونىڭ رەسەيگە قارسى سانكسيالاردىڭ كۇشىن جوياتىنى تۋرالى بىرنەشە مارتە حابار تارادى. ترامپ سۇحباتتارىنىڭ بىرىندە رەسەيمەن قارىم-قاتىناستى جاقسارتۋ ءۇشىن، يادرولى ارسەنالدى قىسقارتۋ تۋرالى شارت قويعانىن ايتقان. الايدا كوپ ۇزاماي ول جاقىن ۋاقىتتا سانكسيانىڭ كۇشىن جويمايتىنىن حابارلادى.