قۇرمەتتى اتىراۋ وبلىسى اكىمى نۇرلان نوعايەۆ مىرزا! بىزدەر ءسىزدى ىسكەر باسشى، ىسكەر ازامات رەتىندە تاني باستادىق. سوندىقتاندا، ويىمىزدى ەش بۇكپەسىز ايتۋعا بەل شەشتىك. بىزدەر، 300 - گە جۋىق جۇمىسشىلار، سىزگە ايتار ۇلكەن ءۋاجىمىز بار ەدى. بىزدەر، «پروەكت تەڭىز، كومپانيا سي-سي-سي دە جۇمىس جاسايمىز. باسشىمىز ياعني، باس ادمينيستراتورىمىز (1976 جىلى، جەلتوقساننىڭ 2 ءشى جۇلدىزىندا دۇنيەگە كەلگەن) قازاقستان ازاماتتىعىن العان، اتىراۋلىق فادي ءال-مۇستافا دەگەن اراب جىگىتى. بۇل جىگىت وسى كومپانيادا 18 جىل قىزمەت ەتكەن. مىنەزى اقجارقىن، ادام بالاسىنا دەگەن ەش جاماندىعى، ەش زىمياندىعى جوق. ەشكىمدى ۇلتقا، رۋعا، اۋىل-اۋىلعا بولمەيدى، ەشكىمدى ءتۇر-سيپاتىنا، حال-احۋالىنا بايلانىستى كەمسىتپەيدى. بۇل باسشىمىزدىڭ بۇل سالاعا قوسىپ وتىرعان ۇلەسى وتە زور. ەڭبەك ءوتىلى، تاجىريبەسى مول، الىپ جۇرگەن ءوز قىزمەتىنىڭ قىر-سىرىن، بۇگە-شۇگەسىنە دەيىن تۇگەل بىلەتىن، ءوز ماماندىعىن ابدەن، جەتىك، ەركىن مەڭگەرگەن دۇرىس جىگىت. جۇمىسشىلارمەن ەركىن ءتىل تابىسا الادى، شەبەر جۇمساي الادى، جاعدايلارىنا قارايلاسادى، مۇڭ-مۇقتاجىن تۇسىنەدى. ءبىز بىر-بىرىمىزبەن ازاماتتىق تۇرعىدا العاندا وتە جاقسى، وتە ساليحالى ماملەدەمىز. سول سەبەپتى كومپانيادا جۇمىس بارىسى ويداعىدان دا ارتىق جۇرۋدە. تاماعىمىز توق، تازا ءارى مول، جاتىن بولمەلەرىمىز، توسەك-ورىندارىمىزعا دەيىن مۇنتازداي تاپ-تازا، سپەس كيىمدەرىمىزگە دەيىن ءبۇتىن، دەر كەزىندە قويمادان جاڭاسىن الدىرتىپ اۋىستىرتىپ وتىرادى. جالاقى ماسەلەسى دە ءبىزدى قاناعاتتاندىرادى. ءبىز ءقازىر مۇنداي باسشىمىزدىڭ ارقاسىندا تىنىش، ءارى باقىتتى كۇن كەشۋدەمىز. بۇل باسشىمىز استاناداعى ءبىر بوكس فەدەراسياسىنىڭ قارىشتاپ دامىپ وسۋىنە دە اتسالىسىپ، سپونسور بولىپ قارجى اۋدارىپ وتىرعان. وسى جاقىن ارادا «سي-سي-سي» كومپانياسىنىڭ استاناداعى ۇلكەن باسشىسى گازي اننۋتي دەگەن مىرزا اۋىسىپ ورنىنا ديرەكتور بولىپ حيشان حاۋاش دەگەن اراب ازاماتى كەلگەن. ەندىگى ماسەلە، حيشان حاۋاش ءبىزدىڭ قازىرگى باسشىمىز فادي ءال-مۇستافانىڭ ورنىنا ءوزىنىڭ تۋىسى (1981 ءشى جىلى دۇنيەگە كەلگەن، بۇل پروەكتىدەن مۇلدەم حابارى جوق، بىلەتىندەردىڭ ايتۋى بويىنشا قازىرگى تاڭدا استانا قالاسىندا ىشىپ-شەگىپ، ءومىر راحاتىنا بولەنىپ جۇرگەن، كەلسە بۇل كومپانيانى جالعاستىرۋشى ەمەس، كەرىسىنشە قوقىتاتىن) مۋحاممەد حاۋاش دەگەن ازاماتتى قويماقشى. سەبەبى، فادي ءال-مۇستافانىڭ وسى اقپاننىڭ سوڭىندا كەلىسىم شارتى بىتەدى. حيشان حاۋاش سول كەلىسىمشارتتى ۇزارتىپ سوزۋدىڭ ورنىنا، سىبايلاستىقپەن ونىڭ ورنىنا مۋحاممەد حاۋاش دەگەن ءوز تۋماسىن ءىز باسار رەتىندە بەكىتىپ قويماقشى. بۇلاردىڭ كوزدەگەندەرى تىنىش، بەيبىت تۇردە جۇمىستىڭ ءجۇرۋى ەمەس، تەك قانا اقشا جاساۋ عانا ماسەلەسى دەپ بىلەمىز. بۇلاردىڭ كوزقاراسىندا «ءار باسشىنى 3 جىلدان ارتىق وتىرعىزباۋ كەرەك، سەبەبى، حالىقپەن تىم جاقىن ارا-قاتىناستا بولىپ كەتەدى». سوندا قارا حالىق، وسى جەردىڭ يەسى قازاق حالقى قۇل رەتىندە مە؟ بولاشاقتا وسىنداي نارسەلەردىڭ ورىن الاتىنىن بىلگەننەن سوڭ ءبىزدىڭ كوڭىل-كۇيىمىز ءتۇسىپ، نارازى بولا باستادىق. 300-گە جۋىق جۇمىسشى قول قويىپ، تشو باسشىسىنا حات جولدادىق، الايدا، ءالى جاۋاپ كەلگەن جوق. جازباشا جاۋاپ كەلمەسە دە بۇلار اۋىزشا: «ءبىز بۇل ىسكە ارالاسا المايمىز» دەپ وتىر. مىسالى، وسى كومپانيانىڭ مەنەدجەر تب، جاسى 70-كە كەلگەن اعىلشىن، قالتىراپ، بالتاققا سۇيەنىپ زورعا جۇرگەن كەن-حاتسون دەگەن كارى شالىنىڭ ۇستىنەن جۇمىستان شىعارۋ تۋرالى شاعىم تۇسكەن. سوندا ەلىنە قايتپاق بولعان الگى شال تشو باسشىسىنا ءبىر پاراق حات جولداعان. حاتىنا بايلانىستى كەن-حاتسون ءوز جۇمىس ورنىندا ماڭگىلىك قالدى. دەمەك، جاسايمىن دەسە قولدان كەلەتىن جۇمىستار! الدە، بىزدە اركىمنىڭ قۇقى ءارتۇرلى قورعالا ما؟ ءبىزدىڭ اۋىزبىرىكتىرىپ ءوز ءۋاجىمىزدى ايتقانىمىز حيشان حاۋاشقا ۇناماي قالدى. حيشان حاۋاش ءوزى كورىنبەي، قول استىنداعى باسشىلارى ارقىلى بىزگە قوقان-لوقى جاساي باستادى. ورىنباسارى ەتىپ سيساتوۆ رىسقالي دەگەن 70 كە كەلگەن ازاماتتى الدى. (بۇل كىسى اتىراۋ وبلىسىندا اكىمدىك قىزمەتتەرىن اتقارعان ەكەن). وسى رىسقالي قازىرگى تاڭدا بار بولعانى (دەموكراتيالى ەلدە زاڭ بويىنشا ايتۋعا قۇقىسى بار) ءوز ۋاجدەرىن ايتقانداردى جۇمىستان شىعارىپ، كومپانيانى تازالاۋعا بەلسەنە كىرىسىپ كەتتى. وسى جەرى ءبىزدى قاتتى الاڭداتۋدا، ءبىزدىڭ اشۋىمىزدى تۋعىزۋدا. ەستۋىمىز بويىنشا، قازاققا بولماسىن دەگەن، تاپا-تالتۇستە قىزىل كىتاپقا ەنگەن ۇرپاق مۇراسى بولىپ سانالاتىن كيەلى قۇستارىمىزدى اۋلاپ ساتىپ كەلگەن سيريالىق ارابتاردى دا قولعا تۇسكەندە كومەك بەرىپ بوساتىپ جىبەردىك ەمەس پە؟ ال قازاققا بولسىن دەيتىن مىنانداي فادي ءال-مۇستافا سەكىلدى ءبىرتۋار ازاماتتاردى باعالاي الماعانىمىز، ورنىنا وزگەنى قويىپ شەتكە ىسىرىپ تاستاعانىمىز ۇياتتاۋ بولىپ قالار دەپ ويلايمىز. قۇرمەتتى نۇرلان نوعايەۆ مىرزا! ءبىزدىڭ وسى تولقۋىمىزدى دۇرىس باعىتتا ءتۇسىنىپ، بىزگە ۇيرەنگەن، قولىنان ءىس كەلەتىن، باسشىمىز فادي ءال-مۇستافانىڭ كەلىسىم شارتىن سوزدىرىپ، وسى سالادا باسشى بولىپ قالا بەرۋىنە بۇيرىق بەرۋىڭىزدى سۇرايمىز! قولىنان ءىس كەلمەيتىن، ەرتەڭگى كۇنى قاپ ۇرعىزىپ، جارعا سوقتىرار، ەڭبەك ءوتىلى جوق، بولاشاقتا دا جۇمىسشىلارمەن ءتىل تابىسا المايتىن، حيشان حاۋاشتىڭ تۋىسى مۋحاممەد حاۋاشتى بۇل جەرگە باسشىلىققا لايىقسىز دەپ ەسەپتەيمىز. سوعان جول بەرگىزبەۋىڭىزدى سۇرايمىز! ءبىز، قازاق ەلىنىڭ مەيىلىنشە دامۋىنا، گۇلدەنۋىنە، تۇراقتى تىنىشتىقتى ۇستاپ تۇرۋىنا، ۇلتتىڭ ۇلت بولىپ ساقتالۋىنا، وزگەلەرمەن دە ءتۇسىنىسىپ باقىتتى عۇمىر كەشۋىمىزگە ءوز ۇلەسىمىزدى قوسىپ، اتسالىساتىن جاستارمىز! بىزدەر: «اقشانى كوتەرىڭدەر، بىزگە ءويت، بىزگە ءبۇيت» دەۋدەن اۋلاقپىز، ءبىز بار بولعانى باسشىمىز فادي ءال-مۇستافانى بۇل سالادان وزگەرتپەۋىڭىزدى سۇرايمىز! ءبىر مەزگىل جۇمىسشىلار ۇنىنە دە قۇلاق اسساڭىزدار دەمەكپىز!
قۇرمەتپەن، «سي-سي-سي» كومپانياسىنىڭ 300-گە جۋىق جۇمىسشىلارى!
1.02.2017.
