قازاقستاندا زەينەتاقى جانە الەۋمەتتىك تولەمدەر مولشەرىنىڭ جىل سايىنعى ارتۋى ءداستۇرلى ۇردىسكە اينالدى.

جاڭا جىلدان كەيىن مەملەكەت باسشىسىنىڭ تاپسىرماسىنا سايكەس كوپتەگەن قازاقستاندىقتار زەينەتاقىنىڭ 20%-عا ارتۋىن كۇتكەن بولاتىن. 2017 جىلعى زەينەتاقى تولەمىندەگى جاڭاشىلدىقتار تۋرالى رrimeminister.kz سايتىنا ق ر ەڭبەك جانە حالىقتى الەۋمەتتىك قورعاۋ ۆيسە-مينيسترى سۆەتلانا جاقىپوۆا ايتىپ بەردى.

تۇراقتى تۇردە ارتتىرۋ

ەسكە سالساق، قازاقستان تاۋەلسىزدىگىنىڭ 25 جىلدىعىنا ارنالعان سالتاناتتى جيىندا مەملەكەت باسشىسى نۇرسۇلتان نازاربايەۆ ق ر ۇكىمەتىنە 2017 جىلى زەينەتاقى كولەمىن 2016 جىلعى دەڭگەيدەن 20%-عا ارتتىرۋدى، سونداي-اق 2017 جىلعى 1 شىلدەدەن باستاپ بالا تۋۋىنا بايلانىستى ءبىر رەتتىك مەملەكەتتىك جاردەماقى مولشەرىن 20%-عا ۇلعايتۋدى تاپسىرعان بولاتىن. بۇل ارتتىرۋ جالپى 2 ملن 100 مىڭ قازاقستاندىقتى قامتيتىنىن ايتا كەتكەن ءجون.

زەينەتاقىنى ارتتىرۋ جايلى ايتا وتىرىپ، الەمدىك ەكونوميكاداعى داعدارىس قۇبىلىستارىنا قاراماستان قازاقستان الەۋمەتتىك تولەمدەرىن، ونىڭ ىشىندە زەينەتاقى مولشەرىن ارتتىرۋ بويىنشا الەۋمەتتىك مىندەتتەمەلەردى تولىق كولەمدە ورىنداۋدا.

زەينەتاقى ۋاقتىلى تولەنەدى. ونىڭ مولشەرى، جۇمىس ىستەيتىن حالىقتىڭ جالاقىسىنا قاراعاندا، تۇراقتى تۇردە جىل سايىن، وعان قوسا ينفلياسيا دەڭگەيىنەن 2% العا كەتۋمەن ارتىپ كەلەدى، بۇل 2014 جىلى قابىلدانعان 2030 جىلعا دەيىن زەينەتاقى جۇيەسىن ودان ءارى جاڭعىرتۋ تۇجىرىمداماسىنا سايكەس كەلەدى.

ءار جارتى جىل سايىن ارتتىرۋ

زەينەتاقىنى ارتتىرۋ بويىنشا جۇمىس جوسپارلى تۇردە، سايكەسىنشە بيۋدجەتتىڭ ناقتى مۇمكىندىكتەرىن ەسكەرە وتىرىپ جۇرگىزىلىپ كەلە جاتقانىن ايتا كەتكەن ءجون.

سونىمەن، ىنتىماقتى جانە بازالىق زەينەتاقى تولەمىنە شىعىن 2016 جىلى 1،3 ترلن تەڭگەدەن استامدى قۇرادى، اعىمداعى جىلى ولار 1،5 ترلن تەڭگەدەن استامدى قۇرايدى.

«بازالىق زەينەتاقى تولەمىنىڭ مولشەرى 2017 جىلعى 1 قاڭتاردان باستاپ 7%-عا ارتتى، ال 2017 جىلعى 1 شىلدەدەن باستاپ مەملەكەت باسشىسىنىڭ تاپسىرماسىن ورىنداۋ ماقساتىندا تاعى 13%-عا ارتادى. جالپى العاندا بۇل ونىڭ 2016 جىلعا قاتىناسى بويىنشا 20%-عا دەيىنگى ءوسىمىن قامتاماسىز ەتەدى»، - دەدى س.جاقىپوۆا.

وسىلايشا، 2016 جىلى بازالىق زەينەتاقى مولشەرى 11 965 تەڭگەنى قۇراسا، 2017 جىلعى 1 قاڭتاردان باستاپ، 7% ارتۋدى ەسەپكە العاندا، ونىڭ مولشەرى 12 802 تەڭگەگە تەڭ بولدى، ال 2017 جىلعى 1 شىلدەدەن باستاپ 13%-عا ارتۋدى ەسەپكە العاندا 14 466 تەڭگەنى قۇرايدى.

ۆيسە-مينيستر تۇسىندىرگەندەي، زەينەتاقى مولشەرىن 20%-عا دەيىن ارتتىرۋدى ەسەپكە العاندا، بازالىق زەينەتاقىنى ەسەپكە العاندا زەينەتاقىنىڭ ورتاشا مولشەرى 2016 جىلعى 55 117 تەڭگەدەن 66 676 تەڭگەگە دەيىن، ەڭ از مولشەرى 2016 جىلعى 37 789 تەڭگەدەن 45 711 تەڭگەگە دەيىن ارتادى.