سارسەنبى كۇنى «مەگا اقتوبە» كينوپاركىندە جاس رەجيسسەرلار ءنازيا نازاربەك پەن مەيىرىم ارعىنبايەۆا تۇسىرگەن «مەن سەنى سۇيەمىن، اقەركە!» كوركەم ءفيلمىنىڭ پرەمەراسى ءوتتى دەپ جازادى aktobegazeti.kz.

جاڭا كينوكارتينانىڭ سەنارييىنە استانا قالاسىنداعى ونەر ۋنيۆەرسيتەتىنە وقۋعا تۇسكەن ستۋدەنت قىزدىڭ اۋىر دەرتكە شالدىعىپ، ونىڭ ساۋىعىپ كەتۋى ءۇشىن دوستارىنىڭ قالاي كومەكتەسۋگە تىرىسقانى تۋرالى شىنايى ومىردەن الىنعان وقيعا ارقاۋ بولعان.

فيلمگە باستى كەيىپكەر بولىپ الىنعان اقەركە جۇرىمبايەۆا 1993 جىلى اقتوبەنىڭ ايتەكە بي اۋدانىندا دۇنيەگە كەلگەن. جاستايىنان ونەرگە جانى قۇمار دارىندى جاس كوپتەگەن ءان بايقاۋلارىنا قاتىسىپ، جۇلدەگەر اتاندى. مەكتەپتى ۇزدىك اياقتاپ، استاناداعى ونەر ۋنيۆەرسيتەتىنە وقۋعا ءتۇستى. اقەركەنى بىلەتىندەر ستۋدەنتتىك شاعى باستالعاننان-اق كوپتەگەن ۇلكەن ساحنالاردا، قالقامان ءساريننىڭ جىر كەشىندە ونەر كورسەتكەنىنەن حاباردار. الايدا، جۇلدىزى جارقىراي جانىپ كەلە جاتقان جاس قىزعا كەنەتتەن قان راگى دياگنوزى قويىلىپ، شەتەلدە وتا جاساۋ ءۇشىن قوماقتى قاراجات تالاپ ەتىلگەن.

ءفيلمنىڭ رەجيسسەرى ءنازيا نازاربەكتىڭ ايتۋىنشا، قۇربىسىنىڭ سىرقاتىن بىلگەننەن كەيىن بۇكىل ۋنيۆەرسيتەت بولىپ جۇمىلىپ، جاستار ونى ەمدەتۋگە اقشا جيناۋعا كىرىسكەن. ستۋدەنتتەر استانانىڭ ءىرى ساۋدا ورتالىقتارىندا قايىرىمدىلىق كونسەرتتەرىن قويىپ، دونور بولۋعا قان تاپسىرىپ، بارىنشا قول ۇشىن بەرۋگە تىرىسقان. كوپ ۇزاماي اقەركەگە تۇركيادا وتا جاساۋعا كەزەكتەن تىس كۆوتا بەرىلىپ، وتا ءساتتى اياقتالادى. وكىنىشكە قاراي، اۋرۋ بويىن مەڭدەپ العان بويجەتكەن 20 جاسقا تولار-تولماس شاعىندا 2013 جىلى كوز جۇمادى.

— وقيعانىڭ نەگىزگى جەلىسىن ەش وزگەرىسسىز قالدىردىق. اقەركە ومىردەن وتكەننەن كەيىن ءۇش ايدان سوڭ فيلم ءتۇسىرۋدى قولعا الدىق. ءوزىمىز ونەر ۋنيۆەرسيتەتىن بىتىردىك. مەن رەجيسسەرلىق ماماندىقتا ءبىلىم الدىم. سەنارييىن دە ءوزىم جازىپ شىقتىم. ءفيلمدى ءتۇسىرۋ ءۇشىن ارنايى دەمەۋشىلەر مەن كاسىپكەرلەردى ىزدەستىرە باستادىق. وكىنىشكە قاراي، قولداۋ بىلدىرەتىن ادامدار تابا المادىق. نەسيە الىپ، ازىن-اۋلاق اقشامەن 2015 جىلى ءوز كۇشىمىزبەن تۇسىرەمىز دەپ ۇيعاردىق. سونداي-اق قارجىنى جيناۋعا اقەركەنىڭ اتا-اناسى مەن تۋىسقاندارى، دوستارى كومەكتەستى. اقەركەنىڭ ەڭ سوڭعى كۇنىنە دەيىن جانىنان تابىلىپ، قولداۋ كورسەتكەن ازامات ەسىمدى سۇيگەنى بولدى. ول وعان اۋرۋمەن كۇرەسۋىنە سەپتىگىن تيگىزدى. فيلمدە وسى شىنايى سەزىمگە دەگەن ادالدىق، ومىرگە دەگەن قۇشتارلىق سۋرەتتەلەدى، — دەيدى ءنازيا.

بۇگىندە ازامات تا مۋزىكالىق ماماندىقتى بىتىرگەن. «تۇنگى ستۋديا» باعدارلاماسىنداعى مۋزىكالىق توپتا ونەر كورسەتەدى ەكەن.

— اسىرەسە، قاراجات جاعىنان قيىندىقتار بولدى. كۇندەلىكتى تۇسىرىلىمگە اقشا قوسىپ وتىردىق. ءفيلمدى بۇدان دا جاقسى دەڭگەيدە الىپ شىعۋعا بولاتىن ەدى. الايدا، بىزگە كينو اپپاراتۋرالار جەتىسپەدى.

بۇگىن ءفيلمنىڭ پرەمەراسىن اقەركەنىڭ تۋعان جەرىندە ەڭ ءبىرىنشى اتا-اناسى مەن تۋىستارى كورسىن دەپ شەشتىك. 2 اقپاننان باستاپ، قازاقستاننىڭ بارلىق قالالارىندا كورسەتىلىمگە شىعادى، — دەيدى كينوتۋىندىنىڭ اۆتورى.

فيلمدە اقەركەنىڭ قۇربىسىنىڭ ءرولىن ءنازيانىڭ ءوزى وينايدى. ءارى ول دا اقتوبەلىك جەرلەسىمىز ەكەن. باسقا دا اكتەرلەر ونىڭ شىنايى جاناشىر دوستارى، بىرگە وقىعان كۋرستاستارى. تەك باس كەيىپكەرلەر اقەركە مەن ازاماتتىڭ رولىندەگى ءايسانىم قاستەيەۆا مەن نۇرلان ناۋرىزبايەۆ كاستينگ ارقىلى تاڭدالىپ الىنعان.

پرەمەراعا كەلگەن زال تولى كورەرمەننىڭ كوزىنە جاس ءۇيىرىلىپ، جاستاردىڭ ونەرىنە زور ريزاشىلىعىن ءبىلدىردى. فيلمدە ەشقانداي اسىرەلەۋ جوق. قاراپايىم ستۋدەنتتەردىڭ جاتاقحاناداعى ءومىرى مەن اۋرۋحاناداعى ورىن العان وقيعالارى سول قالپىندا بەرىلگەن.

— فيلم وتە ۇنادى. كەيىپكەردىڭ مەنىڭ قىزىممەن ۇقساستىقتارى وتە كوپ ەكەن. اقەركە بالاباقشاعا بارعان ساتىنەن باستاپ ءان ايتىپ، بي بيلەدى. مەكتەپتە قانداي دا ءبىر ءىس-شارا بولسا، سوندا جۇرەتىن. قىزىمنىڭ بارلىق ادال جۇرەكتى دوس-قۇربىلارىنا زور ريزاشىلىعىمدى بىلدىرەمىن. ەلىمىزدە وسىنداي جاستاردىڭ بارىنا قۋانامىن، — دەدى اقەركەنىڭ اناسى ءبيبىنۇر بەكەنبايەۆا.

ءبىز ءفيلمنىڭ سوڭىندا پرەمەراعا قاتىسقان باس كەيىپكەرلەردى دە اڭگىمەگە تارتتىق.

— كاستينگكە كەزدەيسوق ءتۇستىم. اقەركەنىڭ ءرولىن سومداۋ بارىسىندا قيىندىقتار تۋعانى راس. وبرازدى شىنايى ورىنداپ شىعۋ ءۇشىن، جۇرەگىڭمەن سەنۋ كەرەك. بارىنشا قويىلعان تالاپتاردى ورىنداۋعا تىرىستىم. نەگىزىنەن ديزاينەرلىك ماماندىقتى ءبىتىردىم. بۇگىندە ونەر ۋنيۆەرسيتەتىندە سۋرەتشى ماماندىعىندا وقىپ جاتىرمىن، — دەيدى ءايسانىم قاستەيەۆا. ايپاقشى، ءايسانىم قازاقتىڭ ايگىلى سۋرەتشىسى، بەينەلەۋ ونەرىنىڭ نەگىزىن سالۋشىلاردىڭ ءبىرى ءابىلحان قاستەيەۆتىڭ شوبەرەسى ەكەنىن دە بىلدىك.

ال ازاماتتىڭ رولىندەگى نۇرلاننىڭ ماماندىعى ارحيتەكتور. ەكەۋىنىڭ دە كينوداعى العاشقى قادامى. كاستينگتە كەزدەسىپ ءجۇرىپ، ءبىرىن-بىرى ۇناتقان عاشىقتار بۇگىندە وتباسىن قۇرعان ەرلى-زايىپتىلار ەكەن. ءبىر جاسار ۇلدارى بار.

فيلمنەن تۇسكەن قاراجات قاتەرلى دەرتكە شالدىققان جانداردىڭ ەمى ءۇشىن ۇسىنىلماق.

اقبوتا قالدىبەك