«قامشى.كز» پورتالىندا «اقىسىز ۆيزا ءۇشىن 68 مىڭ تەڭگە تولەگەن قازاق ادىلدىكتى «قامشىدان» تاپتى» اتتى ماقالا جاريالانعاننان كەيىن، رەداكسيامىزعا ەتنيكالىق قازاقتارعا ۆيزانى تەگىن ۇزارتۋعا قاتىستى ساۋالدارمەن حابارلاسقانداردىڭ سانى ارتتى.

سوندىقتان، «قامشى» پورتالى ۆيزانى بەرۋ جانە ۇزارتۋ قازاقستان رەسپۋبليكاسى ىشكى ىستەر مينيسترلىگىنىڭ قۇزىرەتىندە بولعاندىقتان قوعام كوكەيىندە جۇرگەن ساۋالداردى مينيسترلىككە جولدادى.

كوپ كۇتتىرتپەي جاۋابى دا كەلدى. وعان سايكەس، ەتنيكالىق قازاقتاردىڭ قازاقستان رەسپۋبليكاسىنىڭ ۆيزالارىن بەرگەن، قالپىنا كەلتىرگەن نەمەسە ۇزارتقان كەزدە باج تولەۋدەن بوساتىلادى دەپ تاسقا تاڭبا باسقانداي كورسەتىلگەن.

ياعني، قازاقستان رەسپۋبليكاسىنىڭ سالىق سالۋ جانە كەدەندىك اكىمشەلەندىرۋ ماسەلەلەرىنە بايلانىستى وزگەرىستەر مەن تولىقتىرۋلار ەنگىزۋ تۋرالى قازاقستان رەسپۋبليكاسىنىڭ 2016 جىلعى 30 قاراشاداعى № 26-VI ق ر زاڭىنىڭ 544-1-بابىنا سايكەس قازاقستان رەسپۋبليكاسىنىڭ ۆيزالارىن بەرگەن، قالپىنا كەلتىرگەن نەمەسە ۇزارتقان كەزدە مەملەكەتتىك باج تولەۋدەن ەتنيكالىق قازاقتار بوساتىلادى. وسىنداي قىزمەتتەر ءۇشىن ەتنيكالىق قازاقتار ەشقانداي اقى تولەمەيدى.

ۆيزانى تەگىن ۇزارتۋ ءۇشىن قولىڭىزدا قازاق ەكەنىڭىزدى  دالەلدەيتىن قۇجات بولۋى قاجەت.

كوشى-قون زاڭىن بىلمەستىكپەن ۆيزانى ۇزارتۋعا تولەنەتىن  68 مىڭ تەڭگە كولەمىندەگى مەملەكەتتىك باجدى تولەپ قويعان جاعدايدا، قولما-قول نەمەسە اۋدارىم ارقىلى تولەم جۇرگىزگەن ەكىنشى دەڭگەيدە بانككە نەمەسە بانك وپەراسيالارىنىڭ جەكەلەگەن تۇرلەرىن جۇزەگە اسىراتىن ۇيىمعا جازباشا تۇردە ارىزدانادى دەپ جازىلعان حاتتا.

بۇعان دەيىن دە ءبىز سولتۇستىك قازاقستان وبلىسىنىڭ كوشى-قون پوليسياسىنا حابارلاسىپ، ۆيزانى ۇزارتۋعا تولەنگەن قارجىنى قالاي قايتارىپ الۋعا بولاتىنى بىلدىك. سولتۇستىك قازاقستان وبلىسىنىڭ اعا ينسپەكتورى راشيد جۇسىپبەكوۆ ول ءۇشىن كوشى-قون باسقارماسىنا بارىپ، «تۇبىرتەك قولدانىلمادى» دەگەن انىقتامانى الىپ، ونىمەن سالىق دەپارتامەنتىنە بارۋى قاجەت ەكەنىن جانە سول كەزدە اقشاسى قايتارىلىپ بەرىلەتىنىن جەتكىزدى.

ق ر ىشكى ىستەر مينيسترلىگىنە جانە كوشى-قون پوليسياسىنىڭ بەرگەن مالىمەتىنە سايكەس ەتنيكالىق قازاقتار ۆيزانى تەگىن ۇزارتادى. كوشى-قون باسقارماسىندا ۆيزانى ۇزارتۋعا تولەنەتىن 68 مىڭ تەڭگەنى سۇراۋعا ەشقانداي قۇقىعى جوق. ەگەر اتالمىش سوممانى تولەپ قويعان جاعدايدا، قارجىڭىزدى وڭاي قايتارىپ الا الاسىز.

دايىنداعان: اسەم المۇحانبەت