الماتىلىق "قايرات" كلۋبىنىڭ بۇرىنعى جاتتىقتىرۋشىسى الەكساندر بوروديۋك رەسمي تۇردە فۋتبولدان قازاقستان ۇلتتىق قۇراماسىنىڭ باس باپكەرى قىزمەتىنە تاعايىندالدى، دەپ حابارلايدى Vesti.kz.

رەسەيلىك مامان قازاقستان ۇلتتىق قۇراماسىن الداعى ءۇش جىل بويى باپتايدى. كەلىسىمشارت مەرزىمى وسى ۋاقىتقا جوسپارلانعان. الەكساندر بوروديۋكتىڭ ۇلتتىق قۇراما تىزگىنىندە جۇمىس ىستەۋ تاجىريبەسى بار. ول فۋتبولدان رەسەي قۇراماسىنىڭ باپكەرلەر قوسىنىندا بولىپ، بىرنەشە جاتتىقتىرۋشىنىڭ كومەكشىسى بولعان.

بۇعان دەيىن بوروديۋكتىڭ رەسەيدىڭ جاستار قۇراماسى مەن بەلارۋس ۇلتتىق قۇراماسىن جاتتىقتىرۋى ىقتيمال دەگەن مالىمەت شىققان ەدى.

ەسكە سالايىق، 54 جاستاعى مامان  "قايراتتى" 2016 جىلعى ماۋسىمنىڭ باسىندا جاتتىقتىرعان ەدى. ول الماتىلىق كلۋبپەن قازاقستاننىڭ سۋپەركوبوگىن جەڭىپ العانىمەن، ماۋسىم بارىسىندا كورسەتكەن ناتيجەسى كوڭىل كونشىتپەدى. سول سەبەپتەن رەسەيلىك مامان ءوز ەركىمەن قىزمەتىن بوساتتى.

وسى ۋاقىتقا دەيىن قازاقستان ۇلتتىق قۇراماسىنىڭ تىزگىنىن تالعات بايسۋفينوۆ ۇستاپ كەلگەن. ەندى ول قازاقستان فۋتبول فەدەراسياسىنىڭ ۇلتتىق قۇرامالار دەپارتامەنتىنىڭ تەحنيكالىق ديرەكتورى قىزمەتىن اتقارادى.