اتاقتى فۋتبول قۇرامالارىنىڭ جاتتىقتىرۋشىcى بولىپ جۇرگەن حيدير اكباش قازاقستانعا كوشىپ كەلىپ، قازاقستاندىق فۋتبولدىڭ ورلەۋىنە اتسالىسپاقشى. بۇل جايىندا جاتتقىتىرۋشى Vesti.kz تىلشىسىنە بەرگەن سۇحباتىندا ايتىپ قالدى.
اكباش الەمدەگى ەڭ ۇلكەن Deutsche Sporthochschule سپورتتىق مەكتەپتى ءتامامداعان. دوكتورلىق دارەجەسى مەن الەمنىڭ كەز-كەلگەن نۇكتەسىندە جاتتىقتىرا الاتىن مۇمكىندىككە يە ۋەفا ليسەنزياسى بار.
بىرنەشە جىل تۇركيانىڭ فۋتبول كومانداسىن جاتتىقتىردى. گەرمانيادا جۇمىس ىستەپ جۇرگەن ۋاقىتتا الماتىلىق قازاق ارۋعا ۇيلەندى. بۇگىنگى كۇنى مەكتەپ وقۋشىلارىن جاتتىقتىرىپ ءجۇر.
«مەن الەمدىك ماسشتابتاعى فۋتبولعا قىزىعامىن. فۋتبول جايىندا بار اقپاراتتان حاباردارمىن. سونداي-اق، قازاقستانداعى فۋتبولدىڭ دارەجەسىن بەس ساۋساقتاي بىلەمىن جانە قازاقستاندىق قۇرامانى جاتتىقتىرعىم كەلەدى. نەگە دەسەڭىزدەر، ايەلىم قازاقستاندىق، سول جەردە جۇمىس ىستەگەن وزىمە دە ىڭعايلى بولادى. مەنىڭ اقپاراتىم بويىنشا، قازاقستاندا فۋتبول وتە تومەنگى دارەجەدە، ءتىپتى دامىماي ءبىر ورىندا قاتىپ قالعان. مەنىڭ ماقساتىم – ءالسىز كوماندالاردى العا سۇيرەپ، جەتىستىككە جەتەلەۋ. الايدا، پوتەنسيال بار، تەك مىقتى فۋندامەنت كەرەك. ايتا كەتەرلىگى، مەنىڭ ۇلتىم – تۇرىك. قازاقستاندىقتار نەمىس، گوللاند ماماندارىمەن جۇمىس ىستەگەندىكتەن ءبىر-بىرىن تۇسىنە قويماعان شىعار. ال، مەن قازاقتارعا ءبىر تابان جاقىنمىن. سونداي-اق، ۇلكەن تاجىريبەم بار. كەلندەگى ەڭ مىقتى سپورت مەكتەبىن بىتىرگەنمىن. كوپ ادامدارمەن جۇمىس ىستەدىم، كوپ كوماندالاردى جاتتىقتىردىم»، - دەپ پىكىرىن ءبىلدىردى گەرمانيالىق جاتتىقتىرۋشى.
