ق ر ينۆەستيسيا جانە دامۋ ءمينيسترى جەڭىس قاسىمبەك وتاندىق كولىك ءوندىرۋ تۋراسىندا ەسەبىن جاريالادى دەپ حابارلايدى Qamshy.kz.

ماشينا جاساۋ سالاسى قازاقستاننىڭ ەكونوميكالىق دامۋىنىڭ ماڭىزدى قوزعالتقىشىنا اينالدى. يندۋستريالدى-يننوۆاسيالىق دامۋ باعدارلاماسىنىڭ العاشقى بەسجىلدىعىن جۇزەگە اسىرۋ بارىسىندا ماشينا جاساۋ ەلىمىزدەگى ەڭ قارقىندى دامىعان سالا بولدى. بۇرىن-سوڭدى ەلىمىزدە شىعارىلماعان جاڭا جوعارى تەحنولوگيالى ونىمدەر پايدا بولدى: لوكوموتيۆتەر، ەلەكتروۆوزدار، جولاۋشىلار ۆاگوندارى، تىكۇشاقتار، اۆتوكولىكتەر. 
اتالعان سالانى جان-جاقتى دامىتۋ ءۇشىن جىل سايىن قازاقستان ماشينا جاساۋشىلارىنىڭ فورۋمىن وتكىزۋدى داستۇرگە اينالدىردىق. وتكەن جىلدىڭ قىركۇيەك ايىندا الەمنىڭ 20 ەلىنەن 100-دەن استام دەلەگات قاتىسىپ، وتاندىق ماشينا جاساۋ سالاسىن دامىتۋ تۋرالى كەلەلى جيىن بولدى. بۇل سالادا شەتەلدىك مايتالمان ماماندارمەن تاجىريبە الماسۋ ءبىز ءۇشىن اۋاداي قاجەت. 
سوڭعى جىلدارى وسى سالاداعى ءوندىرىس كولەمى تومەندەگەن، ءبىراق تومەندەۋ قارقىنى بىرتىندەپ باياۋلاپ كەلەدى. 2015 جىلمەن سالىستىرعاندا نەگىزگى ءونىم تۇرلەرىندەگى ءوندىرىس كولەمى ءبىرشاما ارتقان. ماسەلەن، جۇك اۆتوكولىكتەرى، تىركەمەلى جۇك ۆاگوندارى، ەلەكترلى ترانسفورماتورلار مەن كوندەنساتورلار، تالشىقتى وپتيكالىق كابەل جانە اككۋمۋلياتور وندىرىسىندە ءوسىم بار.