ەلوردا تۇرعىندارى مەن قوناقتارىنىڭ قاۋىپسىزدىگىن، سونداي-اق قالا تىنىشتىعىن كۇزەتەتىن جاۋىنگەرلەر سانى ارتا تۇسپەك دەپ حابارلايدى قامشى اقپاراتتىق اگەنتتىگى 

8 شىلدە كۇنى ساعات 10.00-دە قازاقستان رەسپۋبليكاسى ۇلتتىق ۇلانى 5573 اسكەري بولىمىندە 790 جاس سارباز سالتاناتتى جاعدايدا وتانعا انت ەتەدى.

استانا ىرگەسىندەگى تمد بويىنشا ەڭ ۇلكەن اسكەري قالاشىقتا قۇقىقتىق ءتارتىپ اسكەرىنىڭ جەدەل ماقساتتاعى قۇراماسى ورنالاسقان. بۇگىندە بۇل قالاشىقتا اتالمىش قۇرامانىڭ جەكە قۇرامىنان بىرگە، حالىقارالىق كورمە كەزىندەگى قاۋىپسىزدىكتى كۇشەيتۋ ماقساتىندا اسكەردىڭ باسقا وڭىردەگى اسكەر بولىمدەرىنەن ارنايى كەلگەن جاۋىنگەرلەر دە ءبىر وتباسىنداي بىرلىكتە قىزمەت اتقارىپ كەلەدى. ۇلاندىقتار اۋقىمدى شارانىڭ قاۋىپسىزدىگىنە باعىتتالعان كۇشەيتىلگەن رەجيمدەگى قىزمەتكە مامىردىڭ 29-ىنەن باستاپ كىرىسكەن بولاتىن. وسى ارالىقتا ءتۇرلى قىراعىلىق تانىتىپ، زاڭ بۇزۋشىلاردى قۇرىقتاپ، ۇلگىلى قىزمەتىمەن ەرەكشەلەنىپ كەلەدى. اپتا سايىن اسكەري ءبولىمنىڭ مادەني ورتالىعىندا قىزمەتىمەن ەرەكشەلەنگەن ۇزدىك اسكەري قىزمەتشىلەردى ماراپاتتاۋعا ارنالعان شارالار وتكىزىلىپ تۇرادى.

جاۋىنگەرلىك جولدىڭ جاقسى داستۇرلەرىنەن ساباق السىن دەگەن ماقساتتا، مامىردىڭ سوڭىندا وسى اسكەري ءبولىم تابالدىرىعىن اتتاعان جاس ساربازدار مۇنداي قۇرمەتتەۋ كەشتەرىنە ادەيىلەپ قاتىستىرىلادى. قىرىق كۇن ارنايى وقۋ پۋنكتتەرىندە جاتتىعىپ، اسكەري ءومىردىڭ كۇن تارتىبىنە داعدىلانىپ، ساپتىق دايىندىقتارىن شىڭداعان جاڭا شاقىرىلىم دا انت قابىلداۋ راسىمىنەن كەيىن قالا كوشەلەرىنىڭ تىنىقتىعىن كۇزەتۋ بويىنشا جاۋىنگەرلىك قىزمەتكە كىرىسەتىن بولادى.

انت قابىلداۋ سالتاناتىنا ۇلتتىق ۇلان باس قولباسشىلىعى، ءوزارا ىنتىماقتاستىق ەتەتىن ورگانداردىڭ، استانا قالاسى اكىمدىگىنىڭ جەتەكشىلەرى، سونداي-اق ءدىن وكىلدەرى، ارداگەرلەر مەن وقۋشىلار قاۋىمى جانە ساربازداردىڭ تۋعان-تۋىستارى قاتىساتىن بولادى.

شولۋشى: اسەم المۇحانبەت