9 شىلدەدە قازاقستاننان قىرعىزستانعا جولعا شىققان «مەموريال» قۇقىققورعاۋ ورتالىعىنىڭ باسشىسى ۆيتاليي پونوماريەۆتى كەشكى 18:30-دا ەلگە كىرگىزبەي قويعان، دەپ جازادى قامشى اقپارات اگەنتتىگى. بۇل تۋرالى پونوماريەۆ قىرعىزستانداعى «ازاتتىققا» ءوزى حابارلاعان.

«قىرعىزستانعا كىرەردىڭ الدىندا ءتولقۇجات باقىلاۋىنا كەلگەنىمدە، شەكارا كۇزەتشىلەرى قۇجاتىمدى تارتىپ الدى. بىرەر مينۋتتان سوڭ قۇجاتىمدى قايتارىپ، ەلگە كىرە المايتىنىم جونىندە اكت تابىستادى. اكتىدە كورسەتىلگەندەي، «مەملەكەت شەكاراسى» زاڭناماسىنىڭ 43-بابى مەن «ىشكى ميگراسيا» زاڭناماسىنىڭ 7-بابىنا سايكەس ماعان قىرعىزستانعا كىرۋگە تىيىم سالىنعان. بولدى. مۇنداي شەشىمدى قاي ورگان قابىلدادى، قاي ۋاقىتقا دەيىن جارامدى – بۇل جايىندا اقپارات كورسەتىلمەگەن».

ۆيتاليي پونوماريەۆتىڭ ايتۋىنشا، 29 ماۋسىمدا ول ماسكەۋدەن قىرعىزستانعا «ەكسترەميزممەن كۇرەس» فورۋمىنا قاتىسۋ ءۇشىن بارعان. فورۋم 1 شىلدە مەن 3 شىلدە ارالىعىندا ءوتتى. 4 شىلدە كۇنى استاناعا جول تارتتى. ۇشاققا وتىرماي تۇرىپ شەكاراشىلار ونى 50 مينۋتتاي ۇستاپ، كەيىن جىبەرگەن.

سونداي-اق، بىشكەكتە پونوماريەۆتىڭ زاتتارى قالىپ قويعان ەكەن. ول زاتتارىن الىپ، 10 شىلدەدە ماسكەۋگە قايتا ۇشپاق بولعان.

«مەموريال» قۇقىققورعاۋ ورتالىعىنىڭ باسشىسىن قۇرمانبەك باكييەۆ قىرعىزستان پرەزيدەنتى بولعان كەزدە دە ەلگە كىرگىزبەگەن. 2009 جىلى «ماناس» اۋەجايىندا شەكاراشىلار رەسەيلىكتىڭ جولىن بوگەگەن.

شولۋشى: گۇلىم جاقان