بالاعا ات بەرۋگە قاتىستى بۇرىن-سوڭدى بولماعان جاعداي تالدىقورعاندا قىلاڭ بەردى.

اتالعان قالادا تۇراتىن ەرلى-زايىپتى الەكساندر كلياسكو مەن قۇرالاي ءسىلامجان قىزى ءبىر جىلدان استام ۋاقىتتان بەرى كىشكەنتاي قىزىنا وزدەرى قالاعان فاميليانى بەرە الماي ءجۇر، دەپ جازادى قامشى اقپاراتتىق اگەنتتى kaz.caravan.kz-كە سىلتەمە جاساپ. 

«ساشا ەكەۋمىز ۋنيۆەرسيتەتتە وقىپ جۇرگەن كەزدەن بىرگەمىز. ال 2015 جىلدىڭ تامىز ايىندا ۇيلەندىك. كەيىن قىزىمىز تۋىلدى. كۇيەۋىم اتىن قازاقشا ءماريام دەپ قويدى. تالدىقورعان پەريناتالدىق ورتالىعىنداعى تىركەۋ جۋرنالىنا ونىڭ فاميلياسىن اكەسىنىڭ اتىمەن الەكساندروۆا دەپ جازدىرعان ەدىك. ءبىراق حالىققا قىزمەت كورسەتۋ ورتالىعىنداعىلار سول فاميليامەن تۋۋ تۋرالى كۋالىك بەرۋدەن باس تارتتى. ولاردىڭ ايتۋىنشا، جەرگىلىكتى ەمەس ۇلتتان تۋعاندارعا تەك اكەسىنىڭ فاميلياسى بەرىلەدى ەكەن. ياعني قىزىمنىڭ ءاتى-جونى ءماريام كلياسكو عانا بولۋى كەرەك» دەيدى قۇرالاي.

زاڭ بويىنشا، جاڭا تۋىلعان بالاعا تۋۋ تۋرالى كۋالىك الۋدى 2 ايدان كەشىكتىرمەۋ كەرەك. ايتپەسە، ايىپپۇل سالىناتىنىن بىلگەن ەرلى-زايىپتىلار ءماريامعا كلياسكو دەگەن فاميليانى بەرۋگە ءماجبۇر بولعان. ءبىراق ءوز ويلارىنان ءالى دە اينامىعان ولار بۇل ماسەلەنى ەندى سوت ارقىلى شەشۋدى ءجون كورىپ وتىر.

شولۋشى: ايگەرىم تاۋباي