قازاقستاننان رەسەيگە كوشۋ 1970-1994 جىلدارى كوبەيىپ، ال 1995 جىلدان باستاپ تومەندەي بەردى. 1988 جىلدان باستاپ نەمىستەرگە گەرمانياعا كوشۋگە رۇقسات بەردى. قالاي بولسا دا بۇل دەموگرافيالىق ميگراسيالىق وتارسىزدانۋ. سوڭعى جىلدارى 2014-2016 جج. كوشۋ ءۇردىسى قايتا كوتەرىلدى. ماسەلەن، 2014 جىلى 24 مىڭ ادام، 2015 جىلى 32 مىڭ، 2016 جىلى 38 مىڭ ادام كوشكەن. قازاقستاننان كوشۋ 1970 جىلدان بۇگىنگى كۇنگە دەيىن تۇراقتى كەرى سالدو رەتىندە كەلەدى. ءبىر ميلليون نەمىستەن 130 مىڭ-اق قالدى، پولياكتار سانى ەميگراسيا سەبەبىنەن ازايدى دەسەم بولادى. كوشىپ بارا جاتقان نەمىس، پولياك، گرەكتەردىڭ وتباسىلارى ارالاس نەكەلەردەن قۇرالعان. 

ورىستىڭ سانى 1991 جىلعا دەيىن قازاقپەن تەڭ بولدى. ودان بۇرىن ءتىپتى قازاقتان سانى باسىم ەدى. ەندى  18 ميلليون جالپى تۇرعىننىڭ  71%-ى قازاق ، ال ورىس 19%-اق. 1999-2009 جىلداردا قازاقستانداعى قازاق 26.3%-عا ءوستى. كەلەسى ونجىلدىقتا، ياعني 2009-2019 جىلداردا 20-23% وسەر. ورىس، ۋكرايندەر، بەلورۋستار مەن تاتارلار 1992 جىلدان بەرى دەپوپۋلياسياعا ءتۇستى. ولاردا تۋعانداردان ولگەندەر سانى ارتىق. سەپاراتيزم ءقاۋپى سەيىلىپ كەلەدى.

ورىس پەن نەمىس اتامەكەنىن اڭسايدى. 1994 جىلى كەرى ميگراسيالىق سالدو 410 مىڭ بولدى، ەميگراسيا  كەيىن تومەندەي بەردى. سوڭعى ەميگراسيانىڭ ءورشۋى  2016 جىلدا بايقالدى. سولتۇستىك قازاقستانداعى كوكتەمدەگى سۋ تاسقىنىنىڭ زاردابى مەن ۇرەي اسەرى بولۋى مۇمكىن. پەتروپاۆل، قوستاناي، پاۆلوداردان دا كوشكەندەر كوپ. ەسەسىنە وڭتۇستىك پەن باتىس قازاقستاننان كوشىپ كەلگەندەر بار. ورالماندار لەگى نەگىزىنەن وزبەكستاننان - 61- 64%-عا   ارتتى، ەسەسىنە قىتايدان كوشىپ كەلۋ  ازايدى. الدىمەن قازاقستان جاعى كوپتەگەن  قۇجات تاۋقىمەتىن جاسادى. ەندى جۇڭگو جاعى قازاققا كوشىپ كەتۋگە كەدەرگى جاساپ وتىر. ۇزىن سانى قازاقستانعا ءبىر ميلليون ورالمان كەلدى دەپ ەسەپتەلەدى. سولتۇستىك جانە ورتالىق قازاقستان قازاقىلانىپ كەلەدى.

قازاق مەكتەبىندە وقيتىن قازاقتار ۇلەسى - 91%، ال ورىس مەكتەبىندەگى قازاق بالاسى - 9%. قازاقستاندا ميلليون تۇرعىننان اسقان ءۇش قالا بار: ول شىمكەنت، الماتى جانە استانا. قازاقتىڭ 60%-ى قالادا تۇرادى. قازاقتىڭ وسال جەرى ء-تىل ساياساتى تىم باسەڭ، ەكىنشى- اسسيميلياسيالىق ۇردىستەر ستيحيالىق تۇردە عانا جۇرەدى، ياعني ارنايى مەملەكەتتىك ساياسات  جوق، ءۇشىنشى كەمشىلىك - قازاقتىڭ ءبىر بولىگى ورىس ءتىلدى. ولاردىڭ جەكە جۇرت بولىپ ءبولىنۋ ءقاۋپى بار، بيلىك وسى ۇردىستەردىڭ ءقاۋىپتى باعىتىن بوگەۋ كەرەك.

 ءازىمباي عالي