اشىق عارىشقا العاشقى بولىپ ۇشقان عارىشكەر يۋريي گاگاريننىڭ ءمۇسىنى سارسەنبى كۇنى مەكسيكا استاناسىنداعى مۋزەيدىڭ «جەر ءجۇزى» («ۆسەلەننايا») زالىندا اشىلدى، دەپ جازادى Qamshy.kz اقپارات اگەنتتىگى.

جەرگىلىكتى باق-تىڭ مالىمەتىنشە، اشىلۋ راسىمىنە مەكسيداعى رەسەي ەلشىسى ەدۋارد مالايان، مەكسيكا عارىش اگەنتتىگى جانە مەحيكو قورشاعان ورتانى قورعاۋ مينيسترلىگىنىڭ باسشىلىعى، سونداي-اق رەسەي ىنتىماقتاستىق وكىلى قاتىستى. ال «بىرىككە الەم – مادەنيەتتەر ديالوگى» قورعا باستاماشى بولدى.

«عارىشقا العاش ۇشقان ۇشقىشتىڭ قۇرمەتىنە قور مەحيكو قالاسىنا بۇل ءمۇسىندى سىيعا تارتادى. اتالمىش ءراسىم حالىقتاردى جاقىنداستىراتىنىنا سەنەمىز. باتىس جارتى شارىندا اشىلعان التىنشى ءمۇسىن رەسەي مەن مەكسيكانىڭ ىنتىماقتاسىعىن نىعايتا تۇسپەك»، - دەدى قور باسشىسى رۋسلان بايراموۆ.

«گاگارين رەسەي ءۇشىن عانا ەمەس، الەم بويىنشا اڭىزعا اينالعان تۇلعا. ول ادامزات تاريحىندا الەمنىڭ جاڭا پاراقشاسىن اشقان. سول سەبەپتى ءمۇسىننىڭ اشىلۋىنا سەبەپ بولعان مەكسيكالىقتارعا العىسىمىزدى بىلدىرەمىز»، - دەدى ەلشى مالايان.

مەحيكو قورشاعان ورتا ءمينيسترى تانيا ميۋللەر گارسيا جاراتىلىستانۋ مۇراجايىنىڭ 50 جىل بويى حالىق ءۇشىن تىنىمسىز جۇمىس ىستەپ كەلە جاتقانىن ەسكەرىپ، بىلاي دەدى: «گاگاريننىڭ عارىشقا ساپارى 56 جىل بۇرىن ورىندالعان. ءدال سول ءساتتىڭ عىلىم ءۇشىن، جاراتىلىستانۋ سالاسى ءۇشىن ماڭىزى زور بولعانى ايقىن. ال بۇگىنگى ۇرپاق ماڭىزدى تاريحي ساتتەردى ءبىلۋ ءۇشىن ءبىزدىڭ مۇراجايعا ءجيى كەلىپ تۇرادى».