بيىل مەملەكەتتىك ءبىلىم گرانتتارىنىڭ يەگەرلەرى جاريالانعان سوڭ، گرانتسىز قالعان تالاپكەرلەر مەن اتا-انالار تاراپىنان كوپتەگەن سۇراق تۋىندادى. وسىعان وراي، 13 تامىزدا «اتامەكەن» ۇكپ، ءبىلىم سالاسى قىزمەتكەرلەرىنىڭ كاسىپوداقتارىنىڭ، جوو قاۋىمداستىعىنىڭ، سونداي-اق اتا-انالار قاۋىمى وكىلدەرىنىڭ قاتىسۋىمەن وتكەن مەملەكەتتىك ءبىلىم گرانتتارىن بەرۋ جونىندەگى رەسپۋبليكالىق كوميسسيانىڭ وتىرىسى وتكەن ەدى. ناتيجەسىندە، گرانتتار ءتىزىمى 3،5% نەمەسە 1487 گرانتقا ۇلعايتىلدى دەپ حابارلايدى Qamshy.kz اقپارات اگەنتتىگى. 

بۇگىن ورتالىق كوممۋنيكاسيالار قىزمەتى الاڭىندا كوميسسيانىڭ جۇمىس توبى مەن قورىتىندىسى بويىنشا ق ر ءبىلىم جانە عىلىم مينيسترلىگىنىڭ وكىلدەرى جۋرناليستەرمەن باسپا ءسوز كونفەرەنسياسىن وتكىزدى. 

– «التىن بەلگى» يەگەرلەرىنە ءبىلىم گرانتتارى تيەسىلى بولعاندىقتان، رەسپۋبليكالىق كوميسسيا بۇل ساناتتاعى تالاپكەرلەردى گرانتتارمەن ۋنيۆەرسيتەتتەردىڭ، سونداي-اق ءبىلىم جانە عىلىم مينيسترلىگى مەن دەنساۋلىق ساقتاۋ مينيسترلىگى قاراجاتتارى ەسەبىنەن قامتاماسىز ەتەتىن بولادى. بۇل «التىن بەلگى» يەگەرلەرىنىڭ ءبىلىم دەڭگەيىنىڭ نەگىزىنەن جوعارى ەكەندىگىنىڭ تاعى ءبىر كورسەتكىشى. سوندىقتان دا «التىن بەلگى» يەگەرلەرى گرانتسىز قالدىرىلمايدى، –  دەدى جوو قاۋىمداستىعىنىڭ پرەزيدەنتى، كوميسسيا مۇشەسى راحمان الشانوۆ.

سونىمەن قاتار، كوميسسيا جۇمىسىنىڭ وتىرىسىنا اتا-انالاردىڭ وكىلى دە قاتىستىرىلعان. ولاردى ۇلتتىق تەستىلەۋ ورتالىعىندا گرانتتاردى بولەتىن اۆتوماتتاندىرىلعان جۇيە جۇمىسىمەن تانىستىرعان.

– گرانتتاردى ءبولۋ پروسەسسىنىڭ اشىقتىعىنا جانە وندا ادامي فاكتوردىڭ جوقتىعىنا كوزىمىز جەتتى. مۇنداعى جۇيە بويىنشا ءبىرى تومەن باللمەن سۇرانىسقا يە ماماندىققا تاپسىرادى، ەندى ءبىرى جوعارى باللمەن تومەن نەمەسە ورتاشا ماماندىقتاردى تاڭدايدى. سوندىقتان دا ۇبت-نىڭ ناتيجەسى وسىلاي شىققانىن تۇسىندىك، –  دەدى باسپاسوز-كونفەرەنسياعا قاتىسقان اتا-انالار قاۋىمىنىڭ وكىلى نۇرلىگۇل اقاشوۆا   

ءوز كەزەگىندە مينيسترلىك الداعى اپتادا «التىن بەلگى» يەلەنىپ، ءبىراق ۇبت بارىسىندا تومەن ناتيجە كورسەتكەن تۇلەكتەردىڭ مەكتەپتەرىندە تەكسەرۋ جۇرگىزەتىنى تۋرالى مالىمدەدى. ونىڭ ناتيجەسى تۇلەكتەرگە اسەر ەتپەيتىنىن حابارلاعان سپيكەرلەر «التىن بەلگىنى» تاعايىنداۋ بارىسىندا قۇجاتتاردى بۇرمالاۋ  فاكتىلەرى انىقتالعان جاعدايدا مەكتەپ باسشىلىعىنا قاتاڭ شارالار قولدانىلاتىنىن ەسكەرتتى.