اتىراۋ وبلىسىندا اۋىل اكىمى پارانى تەزەكپەن الدى دەپ حابارلايدى Qamshy.kz  اقپارات اگەنتتىگى اتىراۋ وبلىستىق سوتتىڭ باسپا ءسوز قىزمەتىنە سىلتەمە جاساي وتىرىپ.

سوتتا انىقتالعانداي، ازامات ي. اقساي سەلولىق وكرۋگىندە جەكە تۇرعىن ءۇي قۇرىلىسىن جۇرگىزىپ، جەر ۋچاسكەسىن الۋعا رۇقسات قۇجاتتارىنا قول قويدىرۋ ءۇشىن اقساي سەلولىق وكرۋگىنىڭ اكىمىنە جۇگىنگەن. ءبىراق اكىم ونىڭ جەكە كاسىپكەر ەكەنىن، جۇك كولىگىمەن تەزەك ساتىپ، تاسىمالدايتىنىن ءبىلىپ، ءوزىنىڭ ەگىندىگىنە 30 قاپ تەزەك اكەلىپ بەرۋدى سۇراعان. سودان كەيىن عانا قۇجاتتارىنا قول قويىپ بەرۋگە ۋادە ەتكەن.

كاسىپكەر سەلولىق اكىمنىڭ ايتقان شارتتارىن ورىنداعان. ءبىراق تاعى دا اكىمنەن قاجەت ءتيىس قوسىمشا قۇجاتتار الۋ كەرەك بولعان. ول ءۇشىن اكىم ودان تاعى 50 قاپ تەزەك اكەلىپ بەرۋدى سۇراعان. ءسويتىپ اكىمگە بەرىلگەن پارانىڭ كولەمى اقشاعا شاققاندا 206 750 تەڭگەنى قۇراعان.

ءىستى قاراۋ بارىسىندا قالا پروكۋرورى مەن سوتتالۋشى جانە ونىڭ قورعاۋشىسىنىڭ اراسىندا كىنانى مويىنداۋ تۇرىندەگى پروسەستىك كەلىسىم بەكىتىلگەن.

اتىراۋ قالاسىنىڭ №2 سوتىنىڭ ۇكىمىمەن دوسقالييەۆ پارانىڭ 30 ەسەلەنگەن مولشەرى، ياعني 6 202 500 تەڭگە ايىپپۇلعا تارتىلدى. ول ءومىرباقي مەملەكەتتىك قىزمەتتە بولۋ قۇقىعىنان ايىرىلىپ، قىلمىستىق جولمەن تابىلعان مۇلكى تاركىلەندى.