دەنساۋلىق ساقتاۋ سالاسىنىڭ باسىم باعىتتارىنىڭ ءبىرى – انا مەن بالا دەنساۋلىعىن قورعاۋ. دەموگرافيا دىمكاس بولماۋى ءۇشىن انا مەن بالا دەنساۋلىعىندا كىنارات تابىلماۋى شارت.
وسى ورايدا وبلىستاعى 24 مەديسينالىق ۇيىمدا وتباسىن جوسپارلاۋ كابينەتى جۇمىس جاسايدى. مۇندا ۇرپاق ءوربىتۋ جاسىنداعى 169256 قىز-كەلىنشەكتىڭ 75%-ى تىركەلگەن. بۇل كابينەتتە قىز-كەلىنشەكتەر جۇكتىلىكتى جوسپارلاۋ، ءتۇرلى تۇقىم قۋالايتىن اۋرۋلار، تۋا پايدا بولعان اقاۋلار، جۇقپالى جانە وزگە دە دەرتتەر بويىنشا كەڭەس الا الادى. سونداي-اق انا مەن ءسابي ساۋلىعى ءۇشىن ءقاۋىپتى جانە ءجيى كەزدەسەتىن ەكىنشى ماسەلە - قانازدىق دەرتى. بۇل جاعداي جۇكتىلىك كەزىندەگى جاس انالاردا ءجيى ورىن الادى. ياعني، انەميا - قان قۇرامىنداعى ەريتروسيتتەردە گەموگلابين مولشەرىنىڭ كەمىپ كەتۋى. بۇل دەرت دۇرىس تاماقتانباۋدان، ءتۇرلى كۇيزەلىستەن جانە يممۋنيتەتتىڭ تومەندەۋىنەن پايدا بولادى. قانى از ادامنىڭ تابەتى بۇزىلادى. بور، اقبالشىق سەكىلدى نارسەلەرگە اڭسارى اۋادى. بۇل زاتتار اسقازانعا اۋىر ءتيىپ، اعزاداعى زات الماسۋ پروسەسىنە كەرى اسەر ەتەدى. ءسويتىپ، ءتۇرلى دەرتتەردىڭ پايدا بولۋىنا اكەپ سوقتىرادى. سول سەبەپتى اتالعان بەلگىلەر پايدا بولعان جاعدايدا مىندەتتى تۇردە ەم العان ءجون. ەگەر ۇرپاق وربىتۋگە قابىلەتتى قىز-كەلىنشەكتەر I، II ساتىداعى تەمىر تاپشىلىعى انەمياسىنىڭ ۆەريفيكاسيالانعان دياگنوزىمەن ەسەپتە تۇراتىن بولسا، تەمىر سۋلفاتى پرەپاراتتارى، اسكوربين قىشقىلى، فولي قىشقىلى، سيروپتار، ەرىتىندىلەر تەگىن بەرىلەدى. جۇكتى كەلىنشەكتەر ءۇشىن قۇنارلى تاماقتىڭ ماڭىزدى ەكەنىن وبلىستىق سالاۋاتتى ءومىر سالتى ورتالىعىنىڭ مامانى ءمولدىر قۇرماشيەۆا بىلايشا تۇسىندىرگەن ەدى.
-جۇكتى ايەلدەرگە ارنالعان دارۋمەندەر مەن مينەرالداردى قابىلداۋمەن قاتار، سالاۋاتتى، تەڭگەرىمدى تاماقتانۋدىڭ ماڭىزى زور. بۇل اعزانى جۇكتىلىكتىڭ جاقسى ءوتۋى ءۇشىن قاجەت ءنارلى زاتتەكتەرمەن قامتاماسىز ەتۋگە كومەكتەسەدى. «ەكى ادام ءۇشىن تاماقتانۋ» دەگەن ءسوز تارەلكەڭىزدەگى تاماقتى ەكى ەسە كوپ جەڭىز دەگەن ەمەس، ۇزاعىراق شايناپ، ءسىڭىمدى تاعاممەن تاماقتانىڭىز دەگەندى بىلدىرەدى. جۇكتى ايەلدىڭ ورگانيزمىندەگى تەمىر نارەستەنىڭ قانىنىڭ قالىپتاسۋى ءۇشىن ماڭىزدى. مايسىز ەت، دارۋمەندەر قوسىلعان بوتقالار مەن شپينات – جۇكتى كەلىنشەكتەر ءۇشىن تەمىردىڭ قاينار كوزى. مۇزداتىلعان شپينات قىمبات ەمەس جانە ونى دايىنداۋ جولى دا وڭاي. سونداي-اق ءسۇت ونىمدەرى انانىڭ دا بالانىڭ دا دەنساۋلىعىنا پايدالى. ياعني ءسۇتتىڭ قۇرامىنداعى كالسيي نارەستە سۇيەگىنىڭ دامۋى مەن قالىپتاسۋىن رەتتەيدى. سونىمەن قوسا، جۇكتىلىكتى جوسپارلاعان جاندار جۇمىرتقا، جاڭعاق ونىمدەرىن، جەمىس-جيدەكتەردى جۇيەلى تۇتىنۋ كەرەك،- دەيدى ءمولدىر تايىر قىزى.
گۇلىم اقاپ،
باتىس قازاقستان وبلىسى
پىكىر قالدىرۋ