قورعاۋشى سۇڭقار نۇرماعامبەتوۆ قىتايدا ءومىر بويىنا سوتتالعان قازاقستاندىق اقجارقىن تۇرلىبايدىڭ اقتالۋىنا ءۇمىت بار ەكەنىن ايتتى. بۇل تۋرالى قورعاۋشى قازاقپارات تىلشىسىنە بەرگەن سۇحباتىندا ءمالىم ەتتى. سونداي-اق رەسەي ازاماتى ماريا داپيركانىڭ دا تاعدىرىنا بايلانىستى بولجامىمەن ءبولىسىتى.  

«اقجارقىن ءوز كىناسىن مويىنداماي وتىر. سوندىقتان ول اقتالادى دەپ سەنىپ وتىرمىز»، – دەدى سۇڭقار نۇرماعامبەتوۆ سۇحباتىندا.

سونىمەن قاتار، نۇرماعامبەتوۆتىڭ رەسەيلىك ماريا داپريكانى دا قورعاپ جۇرگەنىن ايتا كەتەيىك. ونىڭ ايتۋىنشا، ءىس ماريانىڭ قىلمىستىق وي-پيعىلىن انىقتاۋ ءۇشىن حوشيمين پروكۋراتۋراسىنا جىبەرىلدى. سوت ۇكىمىنىڭ ورىندالۋى رەسەيدە بولۋى ىقتيمال. سونداي-اق اقجارقىننىڭ دا حالىقارالىق كەلىسىم بويىنشا قازاقستانعا بەرىلەتىنىن جەتكىزدى. الايدا ونىڭ بىرنەشە شارتى بولۋى مۇمكىن.

ايتا كەتەيىك، اقجارقىن مەن ماريا ەسىرتكى تاسمالدادى دەگەن ايىپپەن سوتتالدى. ەكى قىزدىڭ دا وقيعاسى 2014 جىلى بولعان. قىتايدىڭ گۋانچجوۋ اۋەجايىندا قازاقستاندىق اقجارقىن تۇرلىبايدىڭ سومكەسىنەن 4،5 كەلى ەسىرتكى تابىلعان. ال ۆەتنام پوليسياسى ماريانىڭ سومكەسىنەن 2،7 كەلى ەسىرتكى تاپقان.

ەسىرتكىمەن كۇرەس ورتالىق ازيا وڭىرلىك اقپاراتتىق ورتالىعىنىڭ حابارلاۋىنشا، اقجارقىن مەن ماريا داپريكا نيگەريالىق ناركومافيانىڭ قۇربانى بولعان.

«ەكى جاعدايدا دا ترانسۇلتتىق ەسىرتكى توبى جۇمىس ىستەگەنى كورىنىپ تۇر. ولار بۇرىنعى كەڭەس وداعى ەلدەرىندەگى ادامداردى ەسىرتكى بيزنەسىنە جەگۋمەن اينالىسىپ جۇرگەن. قىلمىسكەرلەر ادامنىڭ سەنىمىنە كىرەدى. ونىمەن ماحاببات قۇرۋى دا مۇمكىن. اقجارقىن الماتىداعى ءدامحانالاردىڭ بىرىندە داياشى بولىپ جۇمىس ىستەگەن. بارمەن دجونني دە وسى ءدامحانادا قىزمەت ەتكەن. دجونني اقجارقىنعا تاۋار جەتكىزىپ بەرشى دەپ وتىنەدى. اقجارقىنعا قحر قك 374 بابىمەن قىلمىس جاسادى دەگەن ايىپ تاعىلدى.

بۇل باپ بويىنشا، ول 20 جىلعا نەمەسە ءومىر بويىنا بوستاندىعىنان ايرىلىپ نەمەسە ءولىم جازاسىنا كەسىلۋى مۇمكىن. 2017 جىلدىڭ قازانىندا وسى ىسكە نۇكتە قويىلۋى ىقتيمال. ءبىراق ۋاقىتى وزگەرۋى دە عاجاپ ەمەس»، - دەدى سۇڭقار نۇرماعامبەتوۆ.