قىرعىزستان مەكتەپتەرىندەگى وقۋشىلاردىڭ تاماقتانۋ ءتارتىبى قانداي؟

قىرعىزستاندا بۇگىندە 2018 مەكتەپ تىركەلگەن. مەملەكەتتىك باعدارلاما بويىنشا باستاۋىش سىنىپتىڭ 442 مىڭ وقۋشىسى كۇندەلىكتى ىستىق تاماقپەن قامتاماسىز ەتىلگەن. جىل سايىن وسى ماقساتتا 430 ميلليون سوم جۇمسالادى.

مەملەكەتتە مىڭداعان بالا ارنايى ستاندارتقا سايكەس تاماقتانادى. ماماندار تاماقتانباي ءجۇرۋدىڭ ادام دەنساۋلىعىنا زيان ەكەنىن ءجيى قايتالاپ وتىرادى.

بيلىك باستاۋىش سىنىپ وقۋشىلارىنىڭ تاماقتانۋى ءۇشىن ءار وقۋشىعا كۇن سايىن 7 سومنان بولگەن. ءتىپتى بالانىڭ قالىپتى تۇردە بوي جەتىلۋىن ەسكەرۋ ماقساتىندا ازىق-تۇلىك تە ارنايى تاڭدالىنادى.

وسى ورايدا مەملەكەت بيلىگى بۇۇ-نىڭ ازىق-تۇلىك قاۋىپسىزدىگى باعدارلاماسىنىڭ كومەگىنە جۇگىنگەن. 2013 جىلى قىرعىزستاندا اتالمىش باعدارلاما جۇزەگە اسا باستادى.

ءوز كەزەگىندە قىرعىزستانداعى جاپونيا ەلشىلىگى دە مەملەكەتكە قولداۋ تانىتتى. ەلشىلىك قىرعىزستاننىڭ شۋ جانە ىستىقكول وبلىستارىنىڭ 16 مەكتەبىنە اسحانا جابدىقتارىن سىيلادى.

بۇۇ-نىڭ ازىق-تۇلىك قاۋىپسىزدىگى باعدارلاماسى ءتوراعاسىنىڭ ورىنباسارى كەيكو يزۋشي بالانىڭ دەنساۋلىعىنا بۇگىننەن باستاپ ءمان بەرۋ كەرەك ەكەنىن ەسكەرتتى. سەبەبى بالا – ۇلتتىڭ بولاشاعى.

«تۇرمىس-جاعدايىنىڭ تومەندىگىنە قاراماستان قىرعىزستاندا ءار مەكتەپ وقۋشىسى ىستىق تاماقپەن قامتاماسىز ەتىلگەن. قارنى توق بالانىڭ وقۋ ۇلگەرىمى دە جاقسى بولادى، ءبىلىمدى بالا مەملەكەتى ءۇشىن تەر توگەدى. بۇگىنگى وقۋشىلار – ەرتەڭ مەملەكەتتىڭ تۇتقاسىن ۇستايتىن ءىرى تۇلعالار. ولارعا قامقور بولۋ – ءبىزدىڭ مىندەتىمىز».

قارجى جەتىسپەۋشىلىگىنىڭ كەسىرىنەن قۇدايبەردييەۆ اتىنداعى مەكتەپ ۇجىمى باستاۋىش سىنىپ وقۋشىلارىنىڭ ىستىق تاماقپەن قامتاماسىز ەتىلۋىن ءوز قارجىلارىنا ۇيىمداستىرعان جانە وقۋشىلاردىڭ كۇندەلىكتى تاماقتانۋىن ءجىتى باقىلايدى. ماسەلەن، مەكتەپتە 21 جىل بويى قىزمەت اتقارىپ كەلگەن شارۋا مەڭگەرۋشىسى وقۋشىلاردى ءوز باقشاسىنىڭ جەمىستەرىمەن تاماقتاندىرادى. اعاشتى ەر ادام ءوز قولىمەن وتىرعىزعان.

ال بيولوگيا ءپانىنىڭ وقىتۋشىسى تالانتبەك الييەۆ حالىقارالىق دونورلار مەن جەرگىلىكتى بيلىكتىڭ كومەگىمەن قيارلاردى ساقتايتىن جىلىجاي سالدىردى.