جانار دۇعالوۆا تۋعان كۇنىنە وراي سۇحبات بەردى (فوتو)

/uploads/thumbnail/20170708164444947_small.jpg

18 قاڭتار كۇنى «Turkvision-2014» ءان بايقاۋىنىڭ جەڭىمپازى، ءانشى، اكتريسا جانار دۇعالوۆانىڭ تۋعان كۇنى. تالانتتى ءانشى وسى كۇنى 28 جاسقا تولدى.

جانار دۇعالوۆا 1987 جىلى 18 قاڭتاردا قىزىلوردا قالاسىندا دۇنيەگە كەلگەن. پاۆلودار قالاسىندا وسكەن. دياپازونى كەڭ ءانشى. ءبىرىنشى ءمۇعالىمى — اناسى. سول ءۇشىن جانار جاستايىنان ءانشى بولۋدى ارمانداعان. التى جاسىندا ءبىرىنشى رەت جەتىستىككە جەتتى. ارى قاراي رەسپۋبليكالىق، قالالىق بايقاۋلاردان جەڭىسكە جەتكەن. 2001 جىلى «جاس قانات» بايقاۋىنىڭ جۇلدەگەرى اتاندى. مۋزىكالىق كوللەدجدىجانە گيتيس-تى موسكۆادا بىتىرگەن. ونەر جولىن العاش پروديۋسەر بايان ەسەنتايەۆامەن كەزدەسكەننەن كەيىن باستادى. ءانشى بولۋدان باسقا اكتەرلىك شەبەرلىگى دە جەتەرلىك. «عاشىق جۇرەك-2″، «ماحابباتىم جۇرەگىمدە» فيلمدەرىندە ويناعان.

جان-جاقتى تالانت يەسىن بۇگىنگى تۋعان كۇنىمەن قۇتتىقتايمىز. انشىگە زور دەنساۋلىق، بول باقىت، شىعارماشىلىق تابىستار تىلەيمىز!

وسى ورايدا جانار دۇعالوۆانىڭ سۇحباتتارىندا ايتقان قىزىقتى دا ماڭىزدى اڭگىمەلەرىن نازارلارىڭىزعا ۇسىنامىز.

جانار دۇعالوۆا ونەردى ەرەكشە باعالايتىن جان. كىشكەنتاي كۇنىنەن ءان ايتىپ وسكەندىكتەن، ءوزىنىڭ ساحناسىن، ونەرىن ۇنەمى ءبىرىنشى ورىنعا قويادى. وسى ورايدا ءبىر سۇحباتىندا «مەنىڭ ويىمشا، ەڭ ءبىرىنشى «تانىمال بولامىن» دەپ ەمەس، ونەرىمدى تانىتامىن دەگەن ماقسات قويۋ كەرەك. كەيبىرى دارىنىمەن، ەندى ءبىرى تەك تارتىمدىلىعىمەن ايگىلى بولادى. ەڭ باستىسى، ساحناعا دەگەن ماحاببات بولۋى كەرەك دەپ ويلايمىن. ال قىزدارعا ايتارىم، ەگەر بويىندا دارىنى بولسا، اللا جولىن اشادى. جەتىستىكتەرگە تەك ادال ەڭبەكپەن جەتۋگە بولاتىندىعىنا سەنىم كەرەك. مەن ءۇشىن تانىمال بولۋ ماقسات ەمەس. ءارى ول ونەرىڭنىڭ جالعىز كورسەتكىشى ەمەس دەپ ويلايمىن»

سونداي-اق، ءانشى ماحابباتتىڭ قۇدىرەتىنە سەنەدى. ونىڭ ويىنشا ماحابباتسىز ءومىر ءسۇرۋدىڭ ەش ماعىناسى جوق. جانار دۇعالوۆا سۇحباتىندا «ماحابباتسىز ءومىر دە، ونەر دە جوق. قانداي ماحاببات بولسا دا، بۇرىنعى، قازىرگى ول ەشقايدا كەتپەيدى. ۇنەمى ادامعا شابىت بەرەدى. ونەر ادامى عاشىق بولماي تۇرا المايدى دەپ ويلايمىن. سەزىمسىز شابىت بولمايدى. سەبەبى، ءىشىڭ بوس بولىپ تۇرسا، كەرەمەت ءان جازۋ مۇمكىن ەمەس. ءتىپتى، ءاندى دە ادەمى جەتكىزە المايسىڭ. «ماحابباتسىز دۇنيە بوس» دەمەكشى، ءارقاشان عاشىقتىق سەزىمىن باستان كەشىرەمىن. ءارقاشان عاشىقپىن دەۋگە بولادى. ۇناتىپ جۇرگەن ادامىم بار. ال ءقازىر مەن ءۇشىن ونەرىم ماڭىزدى. اللاعا سەنەتىن، رۋحاني باي، اقىلدى، سابىرلى جىگىتتەر ۇنايدى. ال كوركى ءوزىم ءۇشىن تارتىمدى بولسا جەتكىلىكتى. وزگەلەردىڭ پىكىرى مەن ءۇشىن ماڭىزدى ەمەس. سوندىقتان، جۇرەك ۇنىمە عانا قۇلاق اسامىن. عاشىق بولۋ كەرەمەت نارسە. ونەرىمدى تۇسىنەتىن، باعالايتىن جىگىتكە قانا تۇرمىسقا شىعامىن. ويتكەنى، مەن ءۇشىن وتباسىلىق ءومىر دە، ونەرىم دە ماڭىزدى. مەن انا بولۋ باقىتىن سەزىنگىم كەلەدى جانە وسىنى ەرەكشە كۇتەمىن. وتە بالاجان اداممىن. مەن ءۇشىن انا بولۋ ۇلكەن باقىت. كەم دەگەندە ءۇش بالانىڭ اناسى بولۋدى ارماندايمىن. ەگەر مۇمكىندىگىم بولىپ جاتسا، جەتىم بالالالاردى دا اسىراپ الۋعا قارسى ەمەسپىن. قايىرىمدىلىق شارالارىنا ءجيى قاتىسىپ تۇرۋعا تىرىسامىن. اتا-اناسىز، قاراۋسىز قالعان سابيلەرگە جۇرەگىم قاتتى اۋىرادى. بارلىق ءسابي باقىتتى بولۋعا لايىق»

ءانشى ۇنەمى اتا-اناسىنا قاراپ بوي تۇزەيدى ەكەن. ومىرىندە اتا-اناسىنىڭ بارىنا، سونداي كەرەمەت جانداردى جاراتقان اللاعا ءاردايىم ريزاشىلىعىن بىلدىرەدى. وسى ورايدا سۇحباتىندا «كەرەمەت ادامداردىڭ قىزىمىن. وسى ەكى ادامنىڭ ماحابباتىنان دۇنيەگە كەلگەنىمە ريزامىن. كەيدە اللاما وسىنداي كەرەمەت ادامدار بەرگەنىنە قۋانامىن، جىلايمىن. ۇنەمى سول كىسىلەرگە قاراپ بوي تۇزەيمىن. انشىلىك قاسيەتىم انامنان دارىعان. اكەمنىڭ ەسىمى اسىلبەك. ەنەرگەتيكا سالاسىندا قىزمەت اتقارعان ادام. ال انامنىڭ اتى رايا. انشىلىك قاسيەتىم انامنان دارىعان. ءقازىر پاۆلودار قالاسىندا حور ديريجەرى رەتىندە جاس انشىلەرگە ۇستاز بولىپ ءجۇر. انام ءوزى جەتپەگەن بەلەستەردى مەنىڭ باعىندىرعانىمدى قالايدى. وسى ءۇمىتىن اقتاۋعا تىرىسىپ ءجۇرمىن. ارتىمنان ەرگەن ايجان ەسىمدى ءسىڭلىم بار»

جانار ادال دوستىققا سەنەدى. ءوزىنىڭ جانىنا جاقىن ءۇش قۇربىسى بار. «ارينە ادال دوستىققا سەنەمىن! ەڭ ءبىرىنشى دوستىققا ادال بولۋ ادامنىڭ نيەتىنە بايلانىستى دەر ەدىم. ەگەر دوسىڭا دەگەن كوڭىلىڭ اق، قۋانىشى مەن قايعىسىنا ورتاق بولا بىلسەڭ، ىشىڭدەگى سىرىڭمەن ەركىن بولىسە الساڭ، مىنە، بۇل ناعىز دوستىق. مەنىڭ دە جاقىن ارالاساتىن ءۇش قۇربىم بار. وسىنداي دوستارىمدى ماقتان تۇتامىن. ولار ءۇشىن ءاردايىم كومەككە دايىنمىن، ولار دا قاجەت كەزدە قاسىمنان ۇنەمى تابىلادى»

تالانتتى ءانشىنىڭ ويىنشا ادام ماڭدايىنا جازىلعان نارسەنى كورەدى. سونداي-اق، وزىندىك ومىرلىك ۇستانى بار. «ادام ماڭدايىنا جازىلعان نارسەنى كورەدى. ءوز باسىم تاعدىرعا سەنەمىن. ومىرلىك ۇستانىمىم — ادال، دۇرىس جولمەن ءجۇرۋ. ەشكىمگە جاماندىق جاساماۋ. مەن تاعدىرعا وتە قاتتى سەنەمىن. ادام بولىپ ومىرگە كەلگەننەن كەيىن، ادام بولىپ قالۋ»-،دەپ جاۋاپ بەردى سۇحباتتارىندا.