1982 جىلى باتىرحان شۋكەنوۆ ساكسوفونشى رەتىندە «اراي» توبىنىڭ قۇرامىنا كىرەدى. بۇل توپتىڭ نەگىزىن قازاقستاننىڭ حالىق ءارتىسى روزا رىمبايەۆا قالاعان. «اراي» توبىمەن قاتار، باتىرحان شۋكەنوۆ ءوزىنىڭ جەكە شىعارماشىلىعىمەن اينالىسىپ، ءتىپتى 1983 جىلى بۇكىلوداقتىق فەستيۆالدىڭ لاۋرەاتى اتاندى. وسىلايشا ءوزىن كاسىبي ساكسافونشى رەتىندە تانىتادى. 1985 جىلى كونسەرۆاتوريانى اياقتاپ، ءوزىن ءانشى رەتىندە سىنادى. 1987 جىلى توپ روزا رىمبايەۆادان كەتۋدى شەشەدى. توپتىڭ اتىن «الما-Aتا ستۋديو» دەپ وزگەرتەدى. باتىرحان شۋكەنوۆ توپتىڭ فرونتمەنى اتانادى. 1989 جىلى توپ العاشقى «دجۋليا» اتتى حيت ءانىن جازادى. توپپەن اللا پۋگاچيەۆا تانىسادى جانە بىردەن ءوزىنىڭ ءان تەاترىنا شاقىرادى. كەيىننەن اللا پۋگاچيەۆانىڭ كەشىندە ءان شىرقاعاننان كەيىن «ا-ستۋديو» توبىن بۇكىل ەل تانيدى. وسىدان توپ جاڭا ءان، جاڭا بەينەبايان، جاڭا البوم جازادى. الايدا 11 جىلدان كەيىن باتىرحان شۋكەنوۆ جەكە انشىلىكتى قولعا الادى. REAL Records كومپانياسىمەن كەلىسىم شارتقا وتىرىپ، پاۆەل ەسەنينمەن جۇمىس جاسايدى. جاڭادان «دۋشا» اتتى انىنە بەينەكليپ تۇسىرەدى. ءبىراق تۇسىنىسپەۋشىلىكتەرگە بايلانىستى بەينەبايان جارىق كورمەيدى. وسىدان كەيىن باتىرحان شۋكەنوۆ قازاقستانعا ورالدى. 2002 جىلى ءوزىنىڭ العاشقى «وتان انا» 2013 جىلى «دۋشا» اتتى البومدارىن شىعاردى.
«ميۋزيكولا» توبى 1993 جىلى قۇرىلدى. توپ ەۆرو-پوپ ستيلدە ونەر كورسەتۋدى ءجون كوردى. 1996 جىلى توپ العاشقى «ديەۆوچكا ۆ پلاتيسە بەلوم» اتتى البومىنىڭ جۇمىسىن باستاعان. البوم سول جىلدىڭ اياعىندا، «Polygram-Russia» كومپانياسىنىڭ قولداۋىمەن شىقتى. وعان 10 ءان كىردى. 2003 جىلى دۇكەندەردە توپتىڭ «مەجدۋ الماتوي ي موسكۆوي»، 2004 جىلى «گوركيي شوكولاد»، 2007 «پيەۆيسا ي ساكسوفون»، 2008 جىلى «كاك ۆسەگدا» اتتى البومدارى شىقتى. ءقازىر توپتىڭ رەپەرتۋارىندا 100 استام ءان بار. بولات پەن كارينانى قازاقستانمەن قاتار، قىرعىزستان، رەسەي، يسپانيا، اقش ەلدەرىندە قۇشاق جايا قارسى الادى.
«ال داۆاي» توبى 1998 جىلى الماتى قالاسىندا قۇرىلعان. جوبا ەلىمىزدەگى شوۋ-بيزنەستىڭ تاريحىنداعى جىگىتتەردەن قۇرالعان ەڭ تانىمال توپتىڭ ءبىرى بولدى. 2000 جىلى ەڭ بەدەلدى توپتاردىڭ ءبىرى سانالدى. 10 البوم، 10 بەينەكليپتەرى بار. سونداي-اق، «ال داۆاي» توبى «زولوتوي ديسك»، «گولوسۋي سترانا» جانە بىرنەشە ءان بايقاۋدىڭ لاۋرەاتى اتانعان.
توپ 15 جىلدان استام ۋاقىت بويى ەلىمىزدەگى اتاقتى ەڭ العاشقى بويزبەندتەردىڭ ءبىرى. 15 جىل ەسترادامىز ءۇشىن ۇزدىك كورسەتكىش. مۋزىكالىق توپتىڭ قۇرامىندا العاش جاقسىبەكوۆ تيمۋر، ابەنوۆ ەدىل، وزبەكوۆ دانيار، شوقان مارات ۇلى سىندى ازاماتتار ونەر كورسەتكەن. بۇل ازاماتتاردىڭ ءبارى ءبيشى جانە بىرنەشە بايقاۋلاردىڭ جەڭىمپازى بولعان.
2002 جىلى «گولوسۋي سترانا» بايقاۋىندا «جىل حيتى» نوميناسياسىنا يە بولدى. 2005 جىلى جىگىتتەر پروديۋسەرى مارلەننەن كەتەدى. 2013 جىلى توپقا 15 جىل تولدى. وسى ورايدا توپ ماسكەۋدە جاڭا البوم جازدى.
توپقا «ال داۆاي» اتاۋىن بۇرىنعى پروديۋسەرى مارلەن نۇرماعامبەتوۆ بەرگەن. بۇلاي اتالۋ سەبەبى، رەسەيدە «پولنىي ۆپەرەد» اتتى توپ بولعان، وسى توپقا ۇقساتىپ «ال داۆاي ديسكوتەكا» دەپ اتادى، كەيىننەن قىسقارتىپ «ال داۆاي» دەپ قويدى.
مۇرات ناسىروۆ مۋزىكالىق ۋچيليششەنىڭ ۆوكال بولىمىندە ءبىلىم العان. «يالتا-91» بايقاۋىندا باس جۇلدەگە يە بولعان. وعان يگور كرۋتوي بىرگە جۇمىس جاساۋعا ۇسىنىس بىلدىرەدى. الايدا مۇرات كەلىسپەدى. سەبەبى كەلىسسە، ءوزىنىڭ جەكە اندەرىن ايتا المايمىن دەگەن ويدا بولادى. 1995 جىلى مۇرات ناسىروۆ اندەرىن «سويۋز» ستۋدياسىنا اكەلەدى. ءانشىنىڭ داۋسى پروديۋسەرلەرگە ۇناپ، «ەتو ليش سون» اتتى سينگل جازادى. «شاگ» ءانى راديوەفيردىڭ حيتىنا اينالدى. 1996 جىلى الەنا اپينوۆانىڭ كۇيەۋى بىرگە جۇمىس جاساۋعا ۇسىنىس بىلدىرگەن. مۇرات پەن الەنا بىرگە گاسترولدىك ساپارعا شىعادى. 1999 جىلى ءانشى اعىلشىن تىلىندە ءان ايتا باستايدى. 2002 جىلى «رازبۋدي مەنيا» اتتى البومى جارىق كورگەن. البومداعى ءبىرىنشى ءان ۇلى اكيم ناسىروۆقا ارناپ جازىلعان. 1997 جىلى «زولوتوي گرامموفون» سىيلىعىنا يە بولادى.
2007 جىلى 37 جاسىندا ماسكەۋدەگى ءۇيىنىڭ تەرەزەسىنەن قۇلاپ قايتىس بولدى. وقيعانىڭ نەگىزگى سەبەبى تولىق اشىلمادى. الماتى قالاسىندا جەرلەندى.
نۇرلان ابدۋللين الماتى قالاسىندا دۇنيەگە كەلگەن. ارحيتەكتۋرا ينستيتۋتىنىڭ تۇلەگى. كىشكەنتاي كۇنىندە ۇشقىش بولۋدى ارمانداعان. 35 جاسىندا بيزنەسىن تاستاپ، ونەرگە اياق باسادى. سول ساتتەن باستاپ ءوزىنىڭ ناعىز قالاۋىن تابادى. اسكەردە جۇرگەندە ءان ايتىپ ءجۇرىپ، ارنايى وقۋ وقىماسا دا، مىڭداعان ادامنىڭ جۇرەگىنەن ورىن العان. نۇرلان ءابدۋلليننىڭ ءان قورجىنىندا بىرنەشە ءان جانە 8 البومى بار. ءانشى ءوزىنىڭ جەكە ءومىرى جايلى حالىققا ايتۋدى ۇناتپايدى. ءبىراق جارى جانە ۇلى، ەكى قىزى بارى بەلگىلى.
پارۆيز نازاروۆ ماسكەۋدە دۇنيەگە كەلگەن. دۋشانبە قالاسىندا بالالىق شاعىن وتكىزگەن. نەگىزگى ماماندىعى بويىنشا سۋرەتشى. ەكى جىل «تادجيكفيلم» كينوستۋدياسىندا مۋلتيپليكاتور قىزمەتىن اتقارعان. 1993 جىلى الماتى قالاسىنا كەلگەن. كەيىن جەكە ءانشى رەتىندە تانىلا باستادى. «بەلىە وبلاكا»، «كرەستنايا مات»، «بەرەگ»، «ديەۆوچكا مويا» سياقتى بىرنەشە ءان جازدى. 1994 جىلى پارۆيز بەن سيتورا دۋەت قۇردى. دۋەت ەكى جىل بىرگە ونەر كورسەتتى. كەيىننەن ەكەۋى جەكە ءانشى رەتىندە بولەك شىقتى. 2010 جىلى پارۆيز «يا نە ۋمەيۋ يگرات نا گيتارە» اتتى ءان جازدى. ارتىنشا بۇل ءان حيتقا اينالدى.
«راحات لۋكۋم» توبى شوۋ-بيزنەسكە كەلە سالا، وزىندىك ورنىن الدى. العاشقى البومدارى دۇكەنگە ساتىلىمعا شىققان كەزدە، بىردەن ساتىلىپ كەتكەن. كەيىننەن توپتىڭ العاشقى قۇرامىنان دانا كەتكەننەن كەيىن، ارتىنشا كسيۋشا دا كەتەدى. كسيۋشا جەكە ءانشى رەتىندە Xenia دەگەن اتپەن شىقتى. ال توپقا نۇرعايشا جانە كامشات ەسىمدى ەكى قىز كەلدى. جاڭا قۇرامنىڭ «تانسى س تەنيۋ» اتتى بەينەكليپى بىردەن كوپشىلىككە ۇنادى. نۇرعايشا سكريپكادا ويناپ، توپقا جاڭاشا ستيلدەگى اندەر جازدى. كەيىننەن نۇرعايشا «ۇلىتاۋ» توبىنىڭ مۇشەسىنە اينالدى. وسىنداي وزگەرىستەردەن كەيىن توپتا لەنارا، يۋليا، Xenon اتتى قىزدار ونەر كورسەتتى.
راحات تۇرلىحانوۆ ءان ايتۋدى كىشكەنتاي كۇنىنەن باستاعان. 1999 جىلى 10 جاستاعى «بولاشاق» مەكتەبىنىڭ وقۋشىسى «زولوتوي ديسك» بايقاۋىندا «جىلدىڭ ۇزدىگى» نوميناسياسىنا يە بولدى. 2000 جىلى ءانشى العاشقى «ر.ا.م.ا.ن» دەگەن اتاۋمەن البومىن شىعاردى. البومنىڭ تۇساۋكەسەرى ماسكەۋ جانە الماتى قالالارىندا ءوتتى. ونەرگە كەلگەلى ءبىر جىل ىشىندە راحات رەسەي، بىشكەك، تاشكەنت قالالارىندا جۇزدەن اسا جەكە ءان كەشىن بەرىپ ۇلگەرگەن. 2001 جىلى «ا1» مۋزىكالىق ارناسى ءانشىنى «ۇزدىك ءانشى» اتادى. ال «زولوتايا مونەتا» بەينەكليپى «جىلدىڭ ۇزدىك بەينەكليپى» اتاعىنا يە بولدى. 2003 جىلى «گولوسۋي سترانا» ءان بايقاۋىندا «ۇزدىك ەر ءانشى» اتاندى. «جۇرەك ءۇنى» ءانى ۇزدىك اندەردىڭ ۇشتىگىنە كىردى.
«اۆك» توبى ءالى كۇنگە قازاقستاندىقتاردىڭ جۇرەگىندە ەرەكشە ساقتالعان. توپتى كوپشىلىك امەريكالىق «Boyz II Men» توبىمەن سالىستىرعان. الايدا ەرلان كوكەيەۆ بۇل ويمەن كەلىسپەيدى. «ءبىز ۇشەۋمىز ءۇش ءتۇرلى جانردى ۇناتتىق. ءقىدىرالى حالىق اندەرىن، مەدەۋ كلاسسيكانى، ال مەن دجازدى ۇناتتىم. وسىدان جاقسى توپ قۇرىلدى. 2002 جىلى مەن العا قاراي جىلجۋ كەرەك ەكەندىگىن ءتۇسىندىم جانە توپتان كەتتىم. كەيىننەن مەدەۋ مەن ءقىدىرالى دۋەت بولىپ ونەر كورسەتىپ ءجۇردى. ءبىراق سوسىن توپ تارادى»، — دەيدى ەرلان كوكەيەۆ.
«ULYTAU» توبى 2001 جىلى قۇرىلعان. توپ «اۆك» توبىنىڭ پروديۋسەرى ءقىدىرالىنىڭ باستاماسىمەن جينالعان. بۇل توپ وزگە توپتاردان ەركشە بولدى. ولارعا ۇقساس توپ بولمادى. توپ مۇشەلەرى قۇرمانعازى، تاتتىمبەت، داۋلەتكەرەي، پاگانين، ن.تىلەندييەۆ سياقتى ۇلى تۇلعالاردىڭ اندەرىن شىرقاعان. دومبىرا، سكريپكا، گيتارامەن توپ مۇشەلەرى ونەر كورسەتەدى جانە توپتىڭ باسقالاردان باستى ەرەكشەلىگى وسىندا. 2001 جىلى گولليۆۋدتا وتكەن جاس مۋزىكانتتار بايقاۋىندا باس جۇلدەنى يەلەنىپ، التىن مەدال الدى.
قايرات نۇرتاس تۇركىستان قالاسىندا دۇنيەگە كەلگەن. العاش ساحناعا ون جاسىندا بايقوڭىر قالاسىندا شىققان. سول كەزدىڭ وزىندە بىرنەشە اتاقتى ونەر ادامدارىمەن جۇمىس جاساعان. ءانشىنىڭ پروديۋسەرى، مەنەدجەرى، جەتەكشىسى ءوزىنىڭ اناسى گۇلزيرا ايداربەكوۆا. اناسىنان بولەك العاش ونەر جولىنا اياق باسقاندا م.بەسپايەۆ، ن.ونەربەكوۆ، ت.سەرىكوۆ سياقى ساحناداعى ارىپتەستەرى قولداۋ كورسەتكەن. 18 جاسىندا جاس ءانشى العاش رەت شىمكەنتتە ءان كەشىن بەرگەن. كەش كورەرمەندەرى بۇكىل زالدى العان. سونىمەن قاتار تۋعان كۇنىندە ءان كەشىن بەرۋ ءانشى ءۇشىن ادەتكە اينالعان. كوپتەگەن ونەر جۇلدىزدارىمەن بىرگە دۋەتتە دە ونەر كورسەتىپ ءجۇر. جاستىعىنا قاراماستان قازىرگى تاڭدا 3 بالانىڭ اكەسى.
«نۇرلان مەن مۇرات» توبى 1996 جىلى اتىراۋ قالاسىندا قۇرىلدى. توپتى العاشىندا كوپشىلىك ۇزدىك توپ دەپ باعالادى. العاش رەت اندەرىندە قازاقشا رەپ ايتتى جانە «قىز جىبەك» وپەراسىنداعى «گاككۋ» ارياسىن قوسقان. «ماحاببات» اتتى انىنەن كەيىن «لەيلا» اتتى اندەرى جارىق كورىپ، دۋەت ەندى پوپ-فورماتقا كوشەدى. «جۇلدىزىم» بەينەبايانى كوپشىلىكتىڭ كوڭىلىنەن شىقتى.
«مۋزارت» توبى 2001 جىلى قۇرىلعان. توپتىڭ انشىلەرى مەيرامبەك بەسپايەۆ، ساكەن مايعازييەۆ، كەنجەبەك ءجانابىلوۆ. ءبىر-بىرىنىڭ تالانتىن بايقاعان جىگىتتەر توپ قۇرۋدى ءجون كوردى. بۇگىندە ەلىمىزدە تريولار وتە كوپ. الايدا بۇل توپ ەسترادادان وزىندىك ەرەكشە ورنىن تابا ءبىلدى. قۇرىلعان جىلدىڭ وزىندە توپتى ءتۇرلى كەشتەرگە، بايقاۋلارعا ءجيى شاقىرعان. ن.ءابىش ۇلى جازعان «ءۇش قوڭىر» ءانىن جىگىتتەرگە ايتۋعا سەنىپ تاپسىرعان. 2003 جىلى توپ «ءوز ەلىم» اتتى ءان كەشىن بەردى. قازاقستاننان بولەك، شەت ەلدەردە دە ءان كەشتەرىن بەرگەن. 2006 جىلى تۇركيانىڭ ستامبۋل جانە انكارا قالالارىندا وتكىزگەن. 2008 جىلى تىڭدارماننىڭ سۇرانىسى بويىنشا ەلدە جەكە كەشتەرىن وتكىزدى.
«جىگىتتەر» كۆارتەتى 2003 جىلى ءتورت جىگىتتەن قۇرالعان توپ. پروديۋسەرلەرى ەرعالي ابدرايموۆتىڭ ارقاسىندا جىگىتتەر ءبىرىنشى جىلدىڭ وزىندە «اراي 2003»، «مەنىڭ قازاقستانىم» سياقتى ءان بايقاۋلارعا قاتىسقان. 2004 جىلى العاشقى «ەركە قىز» اتتى بەينەبايانى جارىققا شىقتى. 2006 جىلى الماتىدا العاشقى جەكە ءان كەشتەرىن بەردى. ءبىراز ۋاقىتتان سوڭ «باقىتتى بول» اتتى ەكىنشى البوم جازىپ شىقتى. توپتىڭ ءبىرىنشى قۇرامىندا ەرسىنبەك بايجانوۆ، ەردوس قانايەۆ، ەركىن نۇرجانوۆ، باعلان ابدرايموۆ سىندى جىگىتتەر بولدى. ەركىن نۇرجانوۆ كەيىننەن جەكە ونەر كورسەتۋگە بەل بۋدى. ونىڭ ورنىنا مىرزاحان ماحانوۆ كەلدى. 2011 جىلى توپ بىردەن ەكى البوم شىعاردى.
«Urker» توبى 1994 جىلى الماتى قالاسىندا قۇرىلدى. توپ ەتنو-پوپ ستيلدە ونەر كورسەتەدى. بىرنەشە رەت گەرمانيا، فرانسيا، تۇركيا، رەسەي ەلدەرىندە ءان بايقاۋلاردا ب ا ق سىناعان. توپتىڭ «ناۋرىز»، «تۋعان جەر»، «ءان مەكەن»، «تۋعان ەلىم»، «جانىم»، «پەرىشتە»، «ماحاببات ءانى» سياقتى اندەرى تانىمال بولدى. 2004 جىلى «Urker» توبى ونجىلدىق ءان كەشتەرىن بەردى. توپتا ول كەزدە 5 البوم، 17 بەينەكليپى بولدى. توپ «ازيا داۋسى»، «جاس قانات» بايقاۋلارىنىڭ لاۋرەاتى. گەرمانيا، اقش، گونكونگ، تۇركيا، تۇرىكمەنستان، رەسەي ەلدەرىنە گاسترولدىك ساپارلاردا بولعان. سونىمەن قاتار، الماتى قالاسىندا «Urker» توبىنىڭ اتىمەن كوشە بەرىلگەن.
«وردا» توبى 2000 جىلى قۇرىلعان. سەبەبى ءدال وسى جىلى اعايىندى ورازبەكوۆتەر مەن اعايىندى بەدەلحاندار بىرگە «باۋىرجان شوۋ» تەاترىندا ونەر كورسەتە باستاعان. العاش 9 مامىردا رەسپۋبليكا سارايىندا «بەلگىسىز جان» جانە «ماحابباتىم» اندەرىمەن ساحناعا شىققان. 2002 جىلى توپ تەاتردان جەكە شىعىپ، بيلەيتىن جانە ءان ايتاتىن توپ رەتىندە قۇرىلعان. وسى جىلى «كەش مەنى» اتتى اندەرى جارىق كورگەن. 2003 جىلى «وردا» ءبىرىنشى بەينەكليپتەرىن ءتۇسىرۋ ءۇشىن تاشكەنتتەگى «وزبەكفيلم» كينوستۋدياسىنا اتتانعان. جاڭا بەينەبايان بارلىق مۋزىكالىق ارنالاردان كورسەتىلىپ، جاقسى ناتيجەگە يە بولدى. «كەش مەنى» بەينەبايانىنىڭ جەتىستىگىنەن كەيىن توپقا الۋا قوناروۆا ەكى جىل پروديۋسەرلىك ەتەدى. توپ قازاقستاندا تانىمال بولدى. 2004 جىلى توپ بانگورمەن تانىسىپ، جەكە ستۋديا اشقان. وسى ستۋديادان العاشقى البومدارىنداعى اندەرىن جازدى. كەيىننەن جىگىتتەرگە ءان جازۋدا تانىمال باعىم حانىم كومەكتەسكەن. 2005 جىلعى شىمكەنت قالاسىنداعى كونسەرتتەن كەيىن توپقا «شىمكەنت پيۆو» كومپانياسىنىڭ ديرەكتورى توقتار تۋلەشيەۆ قىزىعۋشىلىق بىلدىرەدى جانە رەسمي تۇردە پروديۋسەرى بولادى. جاڭا پروديۋسەرمەن توپ الماتىداعى ستۋديانىڭ اپپاراتتارىمەن ماسكەۋدە ءان جازىپ، بەينەكليپ تۇسىرۋگە اتتانادى. 2007 جىلى توپ «قيلى زامان»، «Jam on» اتتى اندەرىنە ماسكەۋدە كليپ تۇسىرگەن. وسى جىلى توپتاعى داستان جاننات اتتى قىزبەن، ال ەربولات اسىل اتتى قىزبەن وتاۋ قۇردى.
«موتور-روللەر» توبى شىعارماشىلىعىن 1993 جىلى الماتى قالاسىنان باستادى. توپتىڭ نەگىزىن يلياس اۋتوۆ قالاعان. 2004 جىلى «وت بيشكەكا دو الما-اتى» انىنە تۇسىرىلگەن انيماسيالىق ۆيدەولارى بۇكىلالەمدىك انيماسيالىق فيلمدەر فەستيۆالىندە نەگىزگى جۇلدەلەردىڭ بىرىنە يە بولدى. 2006 جىلى «حرونيكا پرەدسكازاننوگو سنوۆيدەنيا» اتتى فيلم ءتۇسىردى. 2007 جىلى فيلم BBC تەلەارناسىنان كورسەتىلدى. 2006 جىلى «موتور روللەر» ۆلاديمير شاحرينمەن بىرلەسىپ «ۋترو ۆ دەريەۆنە» كومپوزيسياسىن جازادى. كەيىننەن بەينەكليپ رەسەيدىڭ تەلەارنالارىنان كورسەتىلدى. سونىمەن قاتار، 2009 جىلى «پەسنيا و ۆوينە» انىنە بەينەكليپ تۇسىرەدى. ارتىنشا ءان ورىس، اعىلشىن، ۋكراين تىلدەرىنە دە اۋدارىلدى. 2010 جىلى توپ نەمىستىڭ «Die Toten Hosen» توبىمەن الماتىدا ءان كەشىن بەردى.
1991 جىلى كيريلل لي «ميلاشكا-مالولەتكا»، «پويدەم سو منوي»، «پودرۋگا»، «كارينا»، «تام» سياقتى بىرنەشە حيت اندەر شىعاردى. كوپتەگەن حيت اندەرى ءۇشىن كيريلل «قازاق ەستراداسىنىڭ گەنەرالى» اتاندى. الايدا 2002 جىلى تەليەۆيدەنيەدەن كورىنبەي كەتتى.
«Tristar» توبى 1998 جىلى Dr.Fox اتىمەن تانىمال سەرگەي چيك، ينگا رۋفف، الينا العاشقى «ۋحودي» اتتى ءانىن جازعان كەزدەن جۇمىسىن باستادى. سەرگەي چيكتىڭ ايتۋى بويىنشا توپتىڭ اتى كورەي تىلىنەن الىنعان جانە كەرەك جەردە، كەرەك ۋاقىتتا دەگەن ماعىنانى بىلدىرەدى. 1998 جىلى توپ اييا اتتى دەنس-كلۋبتا جەكە كونسەرتتەرىن بەردى. وسىدان كەيىن توپتىڭ جۇمىسى قىزا ءتۇستى. ينگا مەن الينا بۇرىنعى جۇمىستارىن تاستاپ، تولىقتاي ونەرگە بەت بۇردى. «Tristar» توبى AMM پروديۋسەرلىك ورتالىعىنا كەلەدى. كەيىننەن «انگەل» اتتى انىنە بەينەبايان تۇسىرگەن. ول بەينەكليپ متV ارناسىنان دا كورسەىلىپ ءجۇردى. 1999 جىلى العاشقى «يگرا» اتتى البومى جارىق كوردى. ارتىنشا توپتان الينا كەتتى. ورنىنا يۋليا رومانوۆا كەلدى. 2000 جىلى ءساۋىر ايىندا توپ جاڭا قۇراممەن شىقتى.
الەكساندر سوي اۆتور، ءانشى، «تانگو» توبىنىڭ جەتەكشىسى. ونىڭ «گۋليا»، «دينارا»، «ناكلوننىي گورود»، «سالو» اتتى اندەرى تانىمال بولدى. 1997 جىلى «حابار» اگەنتتىگىنىڭ ۇسىنىسىمەن «دينارا» اتتى ءانى «جىلدىڭ ۇزدىك بالالار ءانى» اتاندى. 1997 جىلى «ناكلوننىي گورود» ءانى رەسپۋبليكا بويىنشا الماتى جايلى جازىلعان ۇزدىك ءان اتانىپ، باس جۇلدەگە يە بولدى.
Baistars.kz
پىكىر قالدىرۋ