كەشە الماتىدا «الاتاۋ» مەيرامحاناسىنا جينالعان جۇرت جازۋشى جاقسىلىق ءساميتۇلىن ەسكە الدى. قايتقانىنا ون جىل بولعان مارقۇمگا جۇبايى - ماكيلا، ۇلى -زاڭعار جانە قىزدارى ارناپ اس بەرىپ، قۇران باعىشتادى. بۇل تۋرالى اقىن الماس احمەتبەك ۇلى جازدى.

جاقسىلىق ءساميت ۇلى اسا تالانتتى، ليريك جازۋشى بولاتىن. ول جازعان «انا ءسۇتى» باستاعان اڭگىمەلەرى ءبىزدىڭ ستۋدەنت كەزىمىزدەگى(1980ج)ادەبيەت تانىتقىش وقۋ قۇرالى بولىپ ەدى. ال، سول ستۋدەنت شاقتاعى اۋىلدى ساعىنىپ ايتاتىن «تۋعان جەر» ءانىنىڭ اۆتورى دا وسى جاقسىلىق بولاتىن.
«تۋعان جەر ءنارىن بەرگەن،
دارىن بەرگەن.
بارىن بەرگەن.
ءوزىڭنىڭ تەنتەگىڭمىن ءالى دە مەن».-دەپ كەلەتىن ءاندى بۇل كۇندە قازاق توپىراعىنىڭ شەت –شەگىندەگى جۇرتتىڭ ءبارى بىلەدى. 
ول جازۋشىلىعىمەن قوسا وتان سۇيگىش ازامات بولاتىن. قازاقستان تاۋەلسىزدىك العان كەزدە ءبىر توپ قالامگەر ىنىلەرىن باستاپ، ازات ەلگە قونىس اۋدارعان العاشقى كوشتىڭ باسشىسى ەدى، سەركەسى ەدى. ءبىز دە سول جاقاڭ باستاعان كوشتىڭ قۇرامىندا كەلىپ ەدىك. 
جاقسىلىق قازاقستانعا التى بالاسىن جەتەلەپ، اسىعىپ كوشتى. قازاقستان تاۋەلسىزدىگىنىڭ العاشقى كۇندەرىنەن-اق ەلىندە - جوعارى وقۋ ورىندارىندا، باسپاسوزدە قىزمەت ەتتى. سويتە ءجۇرىپ، ءىرى كولەمدi پروزالىق ەڭبەكتەر قالدىردى. ءۇش تومنان تۇراتىن «قاھارلى التاي» بۇكىل التاي جۇرتىنىڭ حح عاسىردىڭ العاشقى جارتىسىنداعى كۇرەسىن، قارۋلى قارسىلىقتارىن بەينەلەدى. وندا وسپان باستاعان باتىرلاردىن بارلىعىنىڭ جانكيار بەينەسى جاسالدى.
وسى كىتاپتىڭ تۇساۋ كەسەرىندە قابەڭ - قابدەش ءجۇمادىلوۆ تەبىرەنىپ، ءسۇيىنىپ، ءسۇيسىنىپ ايتىپ ەدى: «جاقسىلىق تالانتتى جازۋشى. ءبىز قاپتاعان تالانتسىز جازۋشىلاردىڭ ساعى سىنباسىن دەپ «تالانت» دەگەن ءسوزدى قولدانباي ءجۇرمىز. ال، بۇگىن جاقسىلىقتىڭ كىتابى تۋرالى سويلەگەندە «تالانت» دەگەن ءسوزدى قولدانباسقا شارامىز جوق - ول تالانتتى جازۋشى.......التايدا وتكەن باتىرلار باقىتتى - وزىنەن ۇل تۋىپ، ول سۋرەتكەر بولىپ، ول تالانتتى بولىپ، ول مىقتى پروزاش بولىپ، تاۋەلسىز قازاقستانعا قونىس اۋدارىپ، ولار تۋرالى ۇلكەن ەڭبەك جازدى جانە باتىرلاردىڭ بەينەسى وسىنشاما تالانتتى سۋرەتكەردىڭ قولىنان سومدالدى. بۇل - التايدىڭ وسپان باستاعان باتىرلارىنىڭ باقىتى» دەگەن ەدى. ءبىز دە وسىعان كەلىسەمىز
جاقسىلىق قازاقستان تاۋەلسىزدىك العاندا "اسىعىپ كوشتى" دەدىك قوي ، ونى اسىقتىرعان التاي جۇرتىنىڭ تاۋقىمەتتى تاعدىرى ەدى. سول تاعدىر تۋرالى تومدار ەدى. سول تاعدىر تۋرالى ازات ەلدە ەركىن سىلتەيتىن مۇمكىندىك ەدى. ەر جاسى ەلۋگە ەندى كەلگەن جاقاڭ سول ءۇشىن اسىقتى ەلگە، سول ءۇشىن اسىقتى ەركىندىككە！ وسىلاي اسىعىس كوشكەنىنە قاراي ول مۇراتىنا جەتكەن جازۋشى.

سوڭعى كوشتىڭ سەركەسى ەدىڭ، جاقسىلىق،
سۇلۋ ءسوزدىڭ ەركەسى ەدىڭ، جاقسىلىق.
جارماسقان عوي تاعدىرىڭنىڭ قىرسىعى،
ەتەگىڭە ەرتە سەنىڭ، جاقسىلىق!

قاندى التايعا قانىعىپ ەڭ ، جاقسىلىق،
تاعدىرىنا تارىعىپ ەڭ، جاقسىلىق.
«قاھارلى التاي» قالامىڭنان قان قۇسىپ،
ماڭدايىڭنان جارىلىپ ەڭ، جاقسىلىق.

«تاعدىر جۇگىن ارت» دەسەتىن جاقسىلىق،
«ازات ەلگە تارت» دەسەتىن جاقسىلىق.
كۇلەر بولسا شالقاسىنان شاشىلىپ،
شامىرقانسا شارت كەتەتىن، جاقسىلىق.

ەركىن ەلدە ەرۋلەدىڭ، جاقسىلىق،
تالانتىڭا سەنۋلى ەدىڭ، جاقسىلىق.
قازاق ەلى ازاتتىعىن العاندا،
بار بولعانى ەلۋدە ەدىڭ، جاقسىلىق.

ساۋىر تاۋداي ەڭسەڭ بولعان، جاقسىلىق،
تون جاعاسى سەڭسەڭ بولعان، جاقسىلىق.
تاعدىر ءبىتىپ تاۋسىلعاندا ۋاقىتى،
تاۋقىمەتى توم -توم بولعان، جاقسىلىق.