بۇگىن قازاق ادەبيەتىنىڭ كورنەكتى وكىلى، كلاسسيك جازۋشى مۇحتار ءماعاۋيننىڭ تۋعان كۇنى. جازۋشى 75 جاسقا تولىپ وتىر. "قامشى" ۇجىمى جازۋشىعا زور دەنساۋلىق تىلەي وتىرىپ، الەۋمەتتىك جەلىلەردەگى اعايىننىڭ قالامگەرگە دەگەن ىستىق ىقىلاستارىن جيناقتاپ بەرۋدى ءجون سانادى.
عالىم بوقاش، شىعىستانۋشى:
بۇل ادام تۇركى-قازاق جۇرتىنا ادەبيەتىنىڭ ورتاعاسىرلىق تاريحىن تانىتتى، كوپشىلىكتىڭ قازىرگى تاريحي ساناسىنا حاندىق داۋىرىنە قاتىستى كەڭىستىك پەن ۋاقىت وبرازدارىن ورنىقتىردى، سوۆەت كەزەڭىندە-اق شابلوننان شىعىپ "مىندەتتى جاعىمدى كەيىپكەردىڭ" جاعىمسىز قىلىقتارى سۋرەتتەلگەن كوركەم شىعارما جازدى، سوزدەن ەپيكالىق كارتينالار سالاتىن جازۋشىلىق زور الەۋەتىنىڭ ارقاسىندا كوزى تىرىسىندە-اق وقىرماندارى كلاسسيك دەپ اتادى، بۇگىنگى قوعامدىق-ساياسي ماسەلەلەر بويىنشا اقىل مەن سەزىم تارازىسىنا ءدال تارتىلعان ءادىل پايعام ايتۋشى انىق اقساقالعا اينالدى. بۇل كىسىنى پوست-سوۆەتتىك الاساپىران شاقتاعى ءداستۇرلى قازاق دۇنيەتانىمىنىڭ ءدىڭى دەر ەدىم. مىنا ءبىر ءوزىم تارتقان سۋرەتتە كلاسسيك جازۋشى مۇحتار ماعاۋين پراگاداعى ءۇيىمىزدىڭ داستارقانىنان ءدام تاتقان سايىن جاسايتىن ىرىمى بويىنشا جاۋىرىن قاراپ وتىر. قۇجات بويىنشا بۇگىن 75-كە تولعان (شىنى قاڭتاردىڭ 29-ى ەكەن) بۇل اقساقالداي قازاقتىڭ بولاشاعىنا قاتىستى وپتيميستىك كوزقاراس ۇستانعان ادامدى سيرەك كەزدەستىردىم. ءوزى جاۋىرىن قاراعان سايىن قازاققا تىلەيتىن بارشا جاقسىلىقتى بۇگىن مۇحتار اتامىزدىڭ وزىنە ارنايمىن. يا، اللا تاعالا، اقساقالدىڭ عۇمىر جاسىن ۇزاق، دەنساۋلىعىن بەرىك، ءتورت قۇبىلاسىن تۇگەل، ءۇش جۇرتىن امان، دوس-جارانىن بەيىلدى، شابىتىن شالقار، كوڭىلىن ورنىقتى، قالامىن قۋاتتى ەتكەيسىڭ!
ايدوس سارىم، ساياساتتانۋشى:
بۇگىن مۇحتار ماعاۋين اعامىز 75-كە تولىپ جاتىر ەكەن. ءجۇز جاساسىن كەمەڭگەر اقساقالىمىز! ءسوزدى كوپىرتپەي-اق قويالىق. ەڭ بولماسا مۇحاڭنىڭ ءبىر دۇنيەسىن وقىپ شىعالىقشى بۇگىن. ءوز باسىم "قازاقسىز قازاقستاندى" وقۋعا كەڭەس بەرەر ەدىم. باسقاسىن وقيمىن دەگەندەرگە شەكتەۋ جوق. جازۋشىعا ەڭ ۇلكەن قۇرمەت، ەڭ باستى سىيلىق - جازعانىن وقۋ، تالقىلاۋ.قاسىم امانجول ۇلى، جۋرناليست:
كەشە تۇرسىنجان شاپاي اعامىزدىڭ، بۇگىن مۇحتار ماعاۋين اقساقالدىڭ تۋعان كۇنى. ادەبيەتتەگى ەكى بۋىننىڭ ەڭ ۇزدىك شەبەرلەرى - قوس اعامىزدىڭ دا دەندەرىنە ساۋلىق پەن قۋات بەرسىن، جازارلارى تاۋسىلماسىن.
اقبەرەن ەلگەزەك، اقىن:
اۋىلدا مۇحتار ماعاۋين تۋرالى كوپ ەستيتىنمىن. الماتىدا مۇحتار دەگەن مىقتى اعاڭ بار، كەزىندە اكەڭ باۋىرى بوپ قاسىندا كوپ ءجۇردى دەگەن سەكىلدى سوزدەر قۇلاعىمىزدا قالىپ قويىپتى.
ايا ءومىرتاي، جۋرناليست:
بۇگىن ، ەكىنشى اقپان جازۋشى اتامىز مۇحتار ءماعاۋيننىڭ تۋعان كۇنى. مەرەيلى 75 جاس. تولقىتادى، سۇيىندىرەدى، قۋانتادى. سونىمەن جازۋشىنىڭ جاقىندا عانا "كوكبالاق" رومانىن وقىدىم. وقىمادىم دەۋگە ۇيالىپ جۇرەتىن ەدىم. ونەر تاعدىرى، ومىرشەڭ ۇلت رۋحى جايلى اۋىسپالى ءداۋىر كەزەڭىن سيپاتتايتىن شىعارما 1978 جىلى 25 مامىردا باستالادى. جازۋشى بۇل كەزدە وتىز سەگىز جاستا عانا. اراعا ءبىر اي سالىپ اۆتور سوزاقتى كورۋگە جولعا شىعادى. سونداعىسى "الاساپىران" (سوزاقتاعى كەڭەس) رومانىن جازۋ ءۇشىن جەر بەدەرىن بايقاستاۋ. ءسويتىپ 25 شىلدەدە قايتا جالعاسىپ، قىركۇيەك ايىندا ءتامامدالادى. شىعارما قوي ۇستىنە بوزتورعاي جۇمىرتقالاعان بەيبىت زامانداعى مامىراجاي، بەيعام ساحارا جۇرتىنىڭ ءان مەن كۇيگە اۋەستىگىن سيپاتتايدى. سال مەن سەرىنىڭ ءومىر سالتىمەن بەتپە بەت جۇزدەستىرەدى. اق پەن قىزىلدىڭ سوعىسىنان زامان ءبىر مەزەتتە وزگەرىپ سالا بەرىپ، حالىق قاراقان باسىن كۇيتتەپ كەتكەن ۋاقىتتا قارا دومبىرا دا كۇمبىرىنەن جاڭىلا جازدايدى. سونداعى زامانىندا داۋلەسكەر كۇيشى بولعان توقسوبا قارتتىڭ جان كۇيزەلىسى، نەمەرەسى كىشكەنە نارىكتى ونەرگە باۋلىعانداعى جاندى سۋرەتتەر لەگى كوز الدىمنان شۇباتىلا ءوتتى. نە كەرەك، شىعارما سوڭى وزگە دە تۋىندىلارى ءتارىزدى ۇمىتكە سۇيەنە،اتار كۇنمەن بىرگە كەلەدى دەپ بىلەتىن جاقسىلىققا، ىزگىلىككە سەنۋمەن اياقتالادى. وقىرمان الدىندا ارى تازا، قۇرمەتتى جازۋشىنىڭ تۋعان كۇنى قۇتتى بولسىن. ءتاڭىر قۋات بەرسىن!
