اتىراۋ وبلىستىق ىشكى ىستەر دەپارتامەنتىنىڭ باسشىسى ايان دۇيسەمبايەۆ مينسك وبلىسىنداعى كازينودا تۇسىرىلگەن داۋلى ۆيدەوعا قاتىستى پىكىرىن ءبىلدىردى، - دەپ حابارلايدى Qamshy.kz اقپارات اگەنتتىگى Tengrinews.kz سايتىنىڭ دەرەگىن نەگىزگە الىپ.

"زاڭگەر رەتىندە مەن وسى جاعدايعا قاتىستى ۆيدەونىڭ ءتۇپنۇسقالىلىعىن انىقتاۋ ماقساتىندا ساراپتاما جۇرگىزۋ قاجەتتىگىن ايتىپ، قانداي دا ءبىر پىكىر بىلدىرۋدەن باس تارتا الار ەدىم. الايدا مەنىڭ ومىرلىك ۇستانىمدارىم دوستارىمدى ۇستاپ بەرۋگە قۇقىق بەرمەيدى. ءيا، بۇل ۆيدەودا مەن جانە ماحمۇد مەرالييەۆ تۇسىرىلگەن. ۆيدەو 2014 جىلى تۇسىرىلگەن، ول كەزدە مەن زاڭدى تۇردە العان ەڭبەك دەمالىسىندا بولعان ەدى. سوندا مەن ەكى دوسىممەن وتباسىلارىمىزبەن تۇركياعا دەمالۋعا باردىق. شامامەن ءبىر اپتادان سوڭ ءبىز مەرالييەۆتىڭ ۇسىنىسىمەن بەلارۋسكە بارىپ قايتۋدى شەشتىك. ونىڭ تانىسى حابارلاسىپ، ءبىزدى قوناققا شاقىردى. ول سونداعى كازينو يەلەرىنىڭ ءبىرى ەكەن. سودان قوناقۇيدە وتىرعانىمدا ماعان ماحمۇدتىڭ ايەلى دوسىن ۇيگە الىپ كەلۋىن سۇراعان. مەرالييەۆ ماس بولعان. مەن وعان جەتكەنشە ول ەكى رەت ۇتىس تىگىپ ۇلگەرگەن. ءبىراق كەيىن ول ماس بولعاندىقتان وعان ويناۋعا رۇقسات بەرمەگەن. ايتىلعان بالاعات سوزدەر جايلى ايتاتىن بولساق. ۆيدەونى مۇقيات كورسەك، وندا مەنىڭ مۇلدە سويلەمەگەنىمدى بايقاۋعا بولادى. كوبى دوسىمدى مەن دەپ ويلاپ قالعان"، -  دەدى ايان دۋيسەمبايەۆ.

اتىراۋ وبلىستىق ءىىد باسشىسىنىڭ ايتۋىنشا، دوسىنىڭ كازينوداعى اقشاسى جەلىدە ايتىلىپ جاتقان ساندارعا قاراعاندا از.

"مۇنداي سوماداعى اقشانى مەملەكەتتىك شەكارادان ەشبىر كەدەرگىسىز الىپ ءوتۋ دەگەندى قالاي ەلەستەتەسىزدەر؟ ونىمەن قوسا، كازينونىڭ ەشقانداي دا يەسى ويىنشىلارعا وسىنشاما اقشانى قارىزعا بەرمەيدى. بۇل ساندىراق ءسوز. مەرالييەۆتىڭ 100 مىڭ جايلى ايتىپ جاتقانىن ەستىدىم. وسىعان دەيىن ءىىم وكىلدەرى 2014 جىلى جۇرگىزىلگەن تەكسەرىستىڭ اقشانىڭ كازينوعا مەرالييەۆتىڭ ەسەپشوتتارىنان جانە كارتاسىنان اۋدارىلعانىن مالىمدەگەن ەدى"، - دەدى ايان دۇيسەمبايەۆ.

ەسكە سالا كەتەيىك، مۇنىڭ الدىندا ءىىم وكىلدەرى كازينودا تۇسىرىلگەن ۆيدەوعا قاتىستى تۇسىنىك بەرگەن ەدى. "سول كەزدە اتىراۋ وبلىستىق ءىىد باسشىسىنىڭ ءبىرىنشى ورىنباسارى قىزمەتىندە بولعان دۇيسەمبايەۆ دوسىمەن بىرگە مينسكىدە بولعان. ونىڭ دوسى ويىن مەكەمەسىنە ءوزىنىڭ تانىسىن ەرتىپ كەلگەن. ال دوسىنىڭ ايەلى ونىڭ بۇل ارەكەتىنە قارسى بولعان. ونى توقتاتۋ ءۇشىن ايەلى دۇيسەمبايەۆتان كازينوعا كەلۋىن سۇراعان. دۇيسەمبايەۆ ءوزى ويناماعان. وعان 2014 جىلدىڭ قازان ايىندا جۇرگىزىلگەن تەكسەرىس دالەل بولا الادى"، - دەگەن ەدى ق ر ءىىم رەسمي وكىلى الماس سادۋبايەۆ.