سەنبى كۇنى اپاتقا ۇشىراعان «ۆيكينگ سكاي» كرۋيز لاينەرى مولدە ايلاعىنا كەلىپ جەتتى، دەپ حابارلايدى Qamshy.kz اقپارات اگەنتتىگى ♦inform.kz سايتىنا سىلتەمە جاساپ. 

كەمە ەكيپاجىنىڭ مۇشەلەرى داۋىل كەزىندە اياق استىنان ىستەن شىققان كەمە قوزعالتقىشىن ءوز كۇشىمەن جوندەۋدى ءبىر ساتكە دە توقتاتقان جوق. ءسويتىپ ولار قوزعالتقىشتى ءىشىنارا وتالدىرىپ، بۋكسير كاتەرلەرىنىڭ كومەگىمەن مولدە جاعالاۋىنا جەتىپ جىعىلدى.

ەسكە سالا كەتەيىك، ەۆاكۋاسيا جۇمىستارى ءتۇنى بويى جالعاستى. تولقىنداردىڭ بيىكتىگى ءۇش قاباتتى ءۇيدىڭ بيىكتىگىمەن بىردەي بولدى. كرۋيز لاينەرىنىڭ جولاۋشىلارىن تىكۇشاقپەن تاسىمالداۋعا تۋرا كەلدى. توتەنشە جاعداي كەزىندە كوپ ادامنىڭ بويىن قورقىنىش بيلەپ، بۇرىن مۇنداي جاعدايدى كورمەگەندىكتەن قاتتى ۇرەيلەنگەندەرىن جاسىرا المادى.  

ناتيجەسىندە 463 ادام اۋە تاسىمالى ارقىلى جاعالاۋعا جەتكىزىلدى. نەگىزى كەمە بورتىندا ەكيپاجدى قوسقاندا بارلىعى 1373 جولاۋشى بولاتىن.  سونىمەن قاتار، ەكيپاج مۇشەلەرى اراسىندا قازاقستاننىڭ ەكى ازاماتشاسى بار بولىپ شىقتى. بۇل اقپاراتتى قازاقستاننىڭ نورۆەگياداعى ەلشىلىگى دە راستادى. ەلشىلىكتىڭ مالىمەتىنشە، بۇل ماسەلە ءبىزدىڭ ديپلوماتيالىق ميسسيانىڭ ەرەكشە باقىلاۋىندا.

«ۆيكينگ سكاي» بورتىنداعى ءبىزدىڭ ەكى ازاماتشا وقىس وقيعادان كەيىن ۇيرەنشىكتى رەجيمدە جۇمىسىن جالعاستىرعان. ولار بىزدەن كومەك سۇراعان جوق»، - دەدى ەلىمىزدىڭ وسلوداعى كونسۋلى ازات ماتەنوۆ.

ونىڭ سوزىنشە، ديپلوماتتار وقيعا تۋرالى ەستي سالىسىمەن بىردەن جەرگىلىكتى بيلىك وكىلدەرىنە حابارلاسقان.    قازىرگى ۋاقىتتا الاڭدايتىن ەشتەڭە جوق. «ۆيكينگ سكاي» جولاۋشىلارى مەن ەكيپاجى جەرگىلىكتى قوناق ۇيگە جەتكىزىلگەن. ول جەردە بارلىعىنا ءتيىستى كومەك كورسەتىلەدى.  

ۇسىنعان: ماقپال سەمباي