مادەنيەت جانە سپورت ءمينيسترى ارىستانبەك مۇحامەدي ۇلى رەسەيلىك "گولوس. دەتي" جوباسىندا ەكىنشى ورىن العان ەرجان ماكسيممەن كەزدەستى دەپ حابارلايدى Qamshy.kz اقپارات اگەنتتىگى sputniknews.kz  سايتىنا سىلتەمە جاساپ.

قازاقستاندىق ءانشى ەرجان ماكسيم "گولوس. دەتي" شوۋىنىڭ اينالاسىندا تۋىنداعان جانجالعا قاتىستى پىكىر ءبىلدىردى. 

"ەرجان باۋىرىمىز "گولوس.دەتي" بايقاۋىندا ەكىنشى ورىن الدى. وسىعان دەيىن جاس تالانتتار كونكۋرستارعا قاتىساتىن. ءبىراق فينالعا شىعا المايتىن. ءتىپتى، فينالعا شىقتى دەسە قۋاناتىنبىز. وزدەرىڭىز كوردىڭىزدەر، ەرجان سۋپەرفينالعا شىقتى. ناتيجەسىندە ەكىنشى ورىن الىپ، ۇلكەن جەتىستىككە جەتتى"، - دەدى مينيستر.

مينيستر جاس انشىگە IPad mini پلانشەتىن سىيعا تارتىپ، شىعارماشالىعىنا تابىس تىلەدى.

كەزدەسۋ بارىسىندا جۋرناليستەر ەرجاننان "گولوس. دەتي" بايقاۋىنىڭ قورىتىندىسىنا كوڭىلىڭ تولا ما، ءبىرىنشى ورىن الماعانىڭ ءۇشىن وكپەڭ بار ما؟" دەپ سۇرادى. 

"جوق، ءبىرىنشى ورىن الماعانىم ءۇشىن ەشكىمگە وكپەلەمەيمىن. ءبىر جاعىنان، ءبىرىنشى ورىن الماعانىم دا جاقسى بولدى. ەگەر مەن بايقاۋدا ءبىرىنشى ورىن السام، ءبارى مەنى قۇتتىقتايتىن ەدى. ەندى ەكىنشى ورىن السام دا، ارتىستەر تانىپ، الەۋمەتتىك جەلىدە وقىرماندارىم كوبەيدى"، - دەدى ەرجان ماكسيم.

سونىمەن قاتار، جاس ءانشى قازاقستاندارعا ءوز العىسىن ءبىلدىردى.

"گولوس. دەتي" بايقاۋىنان سوڭ كوپ نارسە وزگەردى. بۇرىن مەنى ورال حالقى عانا تانيتىن. ەندى قازاقستاننىڭ جارتىسى تانيدى دەپ ويلايمىن. Instagram جەلىسىندەگى وقىرماندارىم كوبەيدى. وسىلاي قولداۋ بىلدىرگەندەرىڭىز ءۇشىن سىزدەرگە راقمەت ايتامىن. مەنىڭ ويىمشا، "گولوس. دەتي" بايقاۋى ءادىل ءوتتى"، -دەدى ول.

ايتا كەتەيىك، 26 ساۋىردە رەسەيدىڭ ءبىرىنشى ارناسىندا "گولوس. دەتي" شوۋىنىڭ فينالى كورسەتىلدى. داۋىس بەرۋ قورىتىندىسى بويىنشا ءانشى السۋدىڭ قىزى ميكەللا ابراموۆا جەڭىسكە جەتتى. ال قازاقستاندىق ءانشى ەرجان ماكسيم ەكىنشى ورىن يەلەندى. ءبىراق كورەرمەندەر فينال ءادىل وتپەگەنىن ايتىپ، شۋ شىعاردى. كوپتەگەن رەسەيلىك ارتىستەر قازاقستاندىق انشىگە قولداۋ ءبىلدىرىپ، ونى ناعىز جەڭىمپاز دەپ بىلەتىنىن ايتتى. 

وقي وتىرىڭىز، ♦ەرجان ماكسيم تەگىنىڭ نەگە "ماكسيم" ەكەنىن ءتۇسىندىردى

ۇسىنعان: ماقپال سەمباي