ل.ن. گۋميليەۆ اتىنداعى ەۋرازيا ۇلتتىق ۋنيۆەرسيتەتىندە "رۋحاني جاڭعىرۋ-Spiritual development" ۆولونتەرلىك كلۋبىنىڭ اياسىندا "ۇلى دالا ۇلاندارى" اتتى باعدارلامالىق كەش ۇيىمداستىرىلدى. بۇل جاستاردىڭ ۆولونتەرلىك كلۋبى حالىقارالىق قاتىناستار فاكۋلتەتى شەتەل تىلدەرى كافەدراسى جانىندا قىزمەت اتقارادى.
كلۋب جەتەكشىسى – اعا وقىتۋشى سالييەۆا دينارا وڭعارباي قىزى. اق داستارقان جايىلىپ، ونەرپازدار ۇلتتىق ناقىشتاعى كيىمدە ونەر كورسەتتى. جوعارى دەڭگەيدە ۇيىمداستىرىلعان كەشتە مىڭ بۇرالعان بيشىلەر، كۇيشىلەر، كۇمىس كومەي انشىلەر، قازاقتىڭ ءتول ونەرى ايتىس، ءسالت-داستۇر،ويىن-ساۋىق – بارلىعى بولدى.
كەشتىڭ قادىرمەندى قوناقتارىنىڭ اراسىندا گەرمانيادان كەلگەن پروفەسسور – مايكل نەدەر، يسپانيادان – حۋليو نوۆيللو، پولشادان – ەديتا دەنست-گارسيا جانە حالىقارالىق قاتىناستار فاكۋلتەتى، تاريح فاكۋلتەتى مەن جۋرناليستيكا جانە ساياساتتانۋ فاكۋلتەتىنىڭ باسشىلىعى جانە وقىتۋشى-پروفەسسورلىق قۇرامى مەن ستۋدەنتتەرى بولدى.
كەش بارىسىندا جۋرناليستيكا جانە ساياساتتانۋ فاكۋلتەتىنىڭ 1-كۋرس ستۋدەنتى ريسپانبەتوۆ قايرات پەن اقپاراتتىق تەحنولوگيالار فاكۋلتەتىنىڭ 1-كۋرس ستۋدەنتى وعاسپايەۆ مۇحتار ساحنا تورىنە شىعىپ، ايتىس ونەرىن جاڭعىرتىپ، سۇبەلى ءسوز بەن ونەگەلى وي ايتتى. ال، ەراسىل مامىر مەن سارسەنبەك ارۋجان اۋەزدى ءان ايتىپ، قۇلاقتىڭ قۇرىشىن قاندىرىپ، كورەرمەندەردىڭ كوڭىلىن ءبىر كوتەردى.
مەرەكەلىك شارانى "دالا سازىنان" كەلگەن ونەرلى قىز-جىگىتتەر قىزدىرا ءتۇستى. "ناعىز قازاق قازاق ەمەس، ناعىز قازاق- دومبىرا" دەمەكشى، جينالعان قاۋىمعا "اداي" كۇيىن ورىنداپ، قۇرمەت- قوشەمەتكە بولەندى. قايماعى بۇزىلماعان قازاقيلىقتى بويىنا سىڭىرگەن كلۋبىمىزدىڭ مۇشەلەرى – "شاڭىراق" تەاترىنىڭ ارتىستەرى ۇلتىمىزدىڭ سالت-داستۇرلەرىن كورنەكىلەپ كورسەتتى. سونىمەن قاتار، ارنايى قوناققا كەلگەن شەتەلدىك پروفەسسورلارمەن "قارا جورعا" ءبيى بيلەنىپ، ۇلتتىق كيىمدەرىمىز سىيعا تارتىلدى دەپ حابارلايدى Qamshy.kz اقپارات اگەنتتىگى ماسساگەت سايتىنا سىلتەمە جاساپ.
جاستاردىڭ ادەت-عۇرىپقا قانشالىقتى جاقىن ەكەندىگىن سىناۋ ءۇشىن ويىن ۇيىمداستىرىلىپ، "باستاڭعى، ەسىك اشار، باتا بەرۋ، ءتىلاشار دەگەنىمىز نە؟" دەگەن سۇراقتار قويىلىپ، دۇرىس ءارى تولىق جاۋاپ بەرگەن كورەرمەنگە كادە سىي ۇسىنىلدى. قازاق ونەرىن، قۇندىلىقتارىن دارىپتەۋگە باعىتتالعان ءىس-شارا ەلىمىزدىڭ باستى اندەرىنىڭ بىرىنە اينالعان، قادىر مىرزا ءالي اتامىزدىڭ سوزىنە جازىلعان "ءوز ەلىم" ءانىن بارشا ونەرپازداردىڭ ورىنداۋىمەن اياقتالدى.
قازاقستان – كوپەتنيكالىق مەملەكەت، قازاقتىڭ ۇلتتىق قۇندىلىقتارىن ەلىمىزدىڭ وزگە ۇلت وكىلدەرى دە قۇرمەتتەپ، دارىپتەيتىندىگىن ۋكراين قىزى ليەۆچەنكو الينا دالەلدەدى. ول وتانىنا دەگەن ماحابباتىن "تۋعان جەر" اتتى انمەن جەتكىزىپ، ءسالت-داستۇردى جاقسى مەڭگەرگەندىگىن كورسەتە ءبىلدى. قورىتا كەلگەندە، ۇلتتىق قۇندىلىقتار مەن ءسالت-داستۇردى ۇلىقتاۋدىڭ ماڭىزدىلىعىن باسا ايتامىز. بولاشاق – ەلىن سۇيەتىن، حالقىنىڭ قۇندىلىقتارىن سىيلايتىن جانە ءوزىنىڭ الەۋەتىن تولىق جۇزەگە اسىرا الاتىن وزىق جاستاردىڭ قولىندا. وسى ورايدا، كەشتىڭ اۋىز تولتىرىپ ايتارلىقتاي دەڭگەيدە وتۋىنە ۇلەس قوسقان بارلىق بەلسەندىلەرگە العىس بىلدىرەمىز.
ۇسىنعان: ادىلەت مادەنيەت
