«كۋا بول» ستۋدياسى – كوپتىڭ كوز ايىمىنا اينالىپ جۇرگەن قىتايداعى ءىرى ونەر ورتالىعى. سونداعى قانداستارىمىز قۇرعان كومپانيا بۇگىندە كەرەگەسىن كەڭگە جايىپ كەلەدى. جۇمىسىن جاس جۇبايلاردىڭ توي سۋرەتىن تۇسىرۋدەن باستاعان ورتالىق بۇل كۇندە بەينەباياندار مەن فيلمدەردى دە ءتۇسىرىپ ءجۇر ەكەن.
«كۋا بول» ستۋدياسى 2009 جىلى ءساۋىر ايىندا ءوز جۇمىسىن باستاعان،-دەيدى ورتالىقتى قۇرۋشى ىقىلاس ورازباي ۇلى. سودان بەرى قانشاما جاس جۇبايلاردىڭ ءساتتى دە، ءتاتتى نەكەسىنە كۋا بولىپ، اق وتاۋلاردىڭ تورىندە ادەمى تۋىندىلارىمەن جارقىراپ، التىن البومدارمەن قاستەرلەنگەن ستۋديا فيلم تۇسىرۋمەن دە اينالىسىپ كەلەدى ەكەن. اسىرەسە، قىتايداعى ەڭ ۇلكەن قازاق تەلەارناسى – شىڭجاڭ تەلەارناسىنىڭ «جولاۋشى»، «اۋىل اياسىندا»، «گۇلدەر-اي»، «بايتەرەك»، «جۇلدىزدى ءسات» جانە «شاشۋ» سياقتى كوپتەگەن باعدارلامالارىن ءتۇسىرىپ، بارلىق تەحنتكالىق جۇمىستارىن دا ىستەپ ءجۇر.
سونىمەن قاتار، شىڭجاڭ كولەمىندە وتەتىن ۇلكەن كونسەرتتەردىڭ باسى-قاسىندا جۇرەتىن ستۋديا قىزمەتكەرلەرى ساحنالىق بەزەندىرۋدى دە ءساتتى ورىنداۋدا. شىڭجاڭنىڭ تۇكپىر-تۇكپىرىندە ءتۇسىرۋ جۇمىستارىمەن اينالىسىپ كەلە جاتقان توپ قازىرگە دەيىن 10-نان استام بەينەباياندى دا دۇنيەكە اكەلگەن. «كۋا بول» تۇسىرگەن بەينەباياندار ەلىمىز تەلەارنالارىندا دا جۇرت نازارىنا ۇسىنىلىپ ۇلگەرگەن. دالەل رەتىندە ق ر قورعانىس مينيسترلىگى ورتالىق ءانسامبلىنىڭ كوركەمدىك جەتەكشىسى، ءانشى، سازگەر ەرمۇراپ زەيىپحان ۇلىنىڭ «عاپىل دۇنيە» اتتى بەينە بايانىن اتاۋعا بولادى.
10-عا تارتا قىزمەتكەرى عانا بار ورتالىقتىڭ كوتەرىپ جۇرگەن جۇگى اۋىر. قازىرگە دەيىن 1000-عا جۋىق شاكىرت تاربيەلەگەن ستۋديا قىتايداعى عانا ەمەس، قازاقستان، موڭعوليا ەلدەرىندە دە ءوز ورتالىقتارىن اشۋدا.
«الداعى ۋاقىتتا ءبىز قىتايداعى قازاق ءومىرىن بەينەلەيتىن دەرەكتى فيلمدەر جانە كوركەم فيلمدەر تۇسىرسەك، مۋلتفيلمدەر جاساساق دەگەن ماقساتتا جۇمىس جاساپ جاتىرمىز. كەرەگەمىزدى كەڭگە جايىپ، وركەندەپ، بولاشاقتا اتاجۇرتقا بارىپ ىرگە تەپسەك دەگەندى دە كوزدەپ وتىرمىز»،- دەيدى «كۋا بول» كومپانياسىنىڭ ديرەكتورى ىقىلاس ورازباي ۇلى.
مايگۇل سۇلتان، BAQ.KZ
پىكىر قالدىرۋ