ەلىمىزدە جاڭا وقۋ جىلىنا ساناۋلى كۇندەر قالسا دا، وقۋلىق توڭىرەگىندەگى شۋ ءالى باسىلماي تۇر. ءبىلىم ءمينيسترى اسلان ءسارىنجىپوۆ جىرى بىتپەگەن وقۋلىققا قاتىستى تاعى مالىمدەمە جاسادى. بۇل تۋرالى "قامشى" اقپاراتتىق پورتالى  كتك ارناسىنا سىلتەمە جاساي وتىرىپ حابارلايدى.

“ەلىمىزدە جىل سايىن ءتورت سىنىپقا عانا جاڭا وقۋلىقتار ساتىپ الىنادى. ياعني، بيىل جەرگىلىكتى بيۋدجەتتەن اقشا ءبولىنىپ، 4، 5، 6 جانە 11-سىنىپتارعا تولىقتاي وقۋلىق الىندى. ال، الدىڭعى جىلدارى باسقا ءتورت سىنىپقا ساتىپ الىنعان بولاتىن. ءبىراق ول كەزدە قارجى جەتىسپەي كىتاپتىڭ ءبىرازى الىنباي قالدى. سوندىقتان سول سىنىپتارعا وقۋلىق جەتپەي قالۋى مۇمكىن”، – دەيدى ءبىلىم جانە عىلىم ءمينيسترى اسلان ءسارىنجىپوۆ.

مينيستر مىرزا كىتاپ قورىنىڭ از بولۋىنان وقۋلىق  جەتپەي قالعان وقۋشىلاردىڭ اتا-انالارىنا قاراجاتتى قالتالارىنان شىعارىپ، ساتىپ السىن دەيدى. 1 قىركۇيەككە دەيىن ەلىمىزدىڭ مەكتەپتەرىندەگى كىتاپحانا قورى تاعى جاڭا وقۋلىقتارمەن تولىعاتىنىنا سەنىمدى.  ءارى اتا-انالاردى مەكتەپتەن كىتاپتى قازىردەن بارىپ الىپ الۋعا شاقىرىپ وتىر.

بۇدان بولەك، مينيستر تومەنگى سىنىپ وقۋشىلارى ءۇشىن ءبىلىم ورداسىنداعى تۇسكى اس تۋرالى دا ءسوز ەتتى. ەسكە سالا كەتسەك، بيىلدان باستاپ مەكتەپتە بەرىلەتىن تەگىن اس تەك جاعدايى ناشار وتباسىنداعى جانە جارىمجان بالالار ءۇشىن عانا بەرىلەتىن بولعان. وسىلاردى ەسكەرە كەتسەك، بالاسى ءبىلىم ورداسىندا وقيتىن ءار اتا-انانىڭ  قالتاسىنا سالماق بۇرىنعىدان دا ەداۋىر تۇسەتىن بولدى.

گۇلدەن ءابدىباقىت