سەمەي قالاسىندا قارۋدان باس تارتقان كۇنگە وراي تۇيەمويناق ارالىندا 15 000-عا جۋىق ادامنىڭ قاتىسۋىمەن «بەيبىتشىلىك اكسياسى» ءوتىپ، جاپونيادان اكەلىنگەن سالماعى 100 كەلى، بيىكتىگى 3 مەتر قۇرايتىن «حيروسيمانىڭ بەيبىتشىلىك تاسى» ەسكەرتكىشى ورناتىلدى. بۇل تۋرالى «قامشى» پورتالى  شقو-نىڭ اقپارات ورتالىعىنا سىلتەمە جاساي وتىرىپ حابارلايدى

         قالا تۇرعىندارى، ايماق قوناقتارى قاتىسقان اكسياعا سونىمەن قاتار، قازاقستان رەسپۋبليكاسىنداعى جاپونيانىڭ توتەنشە جانە وكىلەتتى ەلشىسى كاماحارا ءماساوسي جانە «بەيبىتشىلىك تاسى» اسسوسياسياسى سىندى حالىقارالىق ۇيىمداردىڭ وكىلدەرى كەلدى.  

         – ەلباسىمىزدىڭ تاپسىرماسىمەن بۇگىنگى كۇنى پوليگوننىڭ زارداپتارىن جويىپ، حالىقتىڭ دەنساۋلىعىن جاقسارتۋ ءۇشىن مەملەكەت تاراپىنان ءبىراز ىستەر اتقارىلىپ جاتىر. وسى ورايدا ق ر تۇڭعىش پرەزيدەنتى قورىنىڭ قارجىلاندىرۋىمەن  ساۋىقتىرۋ ورتالىعىنىڭ قۇرىلىسى جوسپارلانۋدا. تۇرعىندار دەنساۋلىعىن جاقسارتۋ ماقساتىندا شەتەلدىك ارىپتەستەردىڭ، سونىڭ ىشىندە جاپونيا ۇكىمەتىنىڭ اتقارعان جۇمىسى زور. ءبىز يادرولىق قارۋ زارداپتارىن جاقسى بىلەمىز جانە بولاشاقتا سونداي قيىنشىلىقتاردىڭ بولماۋى ءۇشىن بىرلەسە جۇمىس جاساۋىمىز قاجەت. وسى ورايدا، اكسياعا قاتىسۋشىلارعا، قالا تۇرعىندارىنا،وبلىس باسشىلىعى اتىنان العىس بىلدىرە وتىرىپ، ميتينگ جۇمىسىنا تابىس تىلەيمىن، – دەدى جاقسىلىق ومار.

         تۇيەمويناق ارالىنا ورناتىلعان «حيروسيمانىڭ بەيبىتشىلىك تاسىن» جاپونيانىڭ «كيودو سۋشين» اقپاراتتىق اگەنتتىگى جانىنداعى «حيروسيمانىڭ بەيبىتشىلىك تاسى» ۇكىمەتتىك ەمەس قورى حيروسيما مەن ناگاساكي قالالارىنداعى جارىلىستىڭ 70 جىلدىعىنا وراي سەمەي قالاسىنا اكەلگەن. ەسكەرتكىشتە بەيبىتشىلىك نىشانى كاننون قۇدايىنىڭ كەلبەتى بەينەلەنگەن.

         سونىمەن قاتار، شارا بارىسىندا قوناقتار ۇلتتىق يادرولىق ورتالىقتىڭ وبلىستىق تاريحي-ولكەتانۋ مۇراجايىنىڭ كىتاپحاناسىندا ساقتالىپ كەلە جاتقان مۇراعات قۇجاتتارمەن تانىستى