الماتىداعى كوميۋنيتي ورتالىقتاردا «جاستار ىسىراپشىلدىققا قارسى. ۇنەم – سانا – مادەنيەت» جوباسى اياسىندا جاستارمەن كەزدەسۋلەر مەن پىكىر الماسۋ جيىندارى باستالدى. بۇل تۋرالى قالالىق جاستار ساياساتى باسقارماسىنىڭ وكىلدەرى حابارلادى.
باستاما جاستار اراسىندا سانالى تۇتىنۋ مادەنيەتىن، رەسۋرستارعا جاناشىرلىقپەن قاراۋدى جانە قارجىلىق جاۋاپكەرشىلىكتى قالىپتاستىرۋعا باعىتتالعان.
جوبا اياسىندا ارتىق شىعىن، اتاق-داڭق ءۇشىن نەسيە الۋ، الەۋمەتتىك جەلىلەردىڭ اسەرى، سونداي-اق سۋ، ەلەكتر قۋاتى، ازىق-تۇلىك پەن وزگە دە رەسۋرستاردى ءتيىمدى پايدالانۋ جايى كەڭىنەن تالقىلانۋدا.
«كەزدەسۋلەر بارىسىندا قاتىسۋشىلار كۇندەلىكتى ومىردە كەزدەسەتىن ماسەلەلەردى ينتەراكتيۆتى فورماتتا تالقىلاپ كەلەدى. اتاپ ايتقاندا، سۋ مەن ەلەكتر قۋاتىن ۇنەمدەۋ، قارجىعا سانالى كوزقاراس قالىپتاستىرۋ، اتاق-داڭق ءۇشىن نەسيە الۋدان باس تارتۋ جانە الەۋمەتتىك جەلىدەگى «جۇرتقا كورسەتۋ ءۇشىن ءومىر ءسۇرۋ» تۇسىنىگىنەن ارىلۋ ماسەلەسىنە ەرەكشە نازار اۋدارىلىپ وتىر. بۇگىنگى ترەنينگ «ۇنەم»، «سانا» جانە «مادەنيەت» اتتى ءۇش نەگىزگى باعىتتى قامتىعان تاقىرىپتىق كارتوچكالار نەگىزىندە ءوتتى. قاتىسۋشىلار ومىرلىك جاعداياتتاردى سارالاپ، ولاردى شەشۋدىڭ ناقتى ءارى ءتيىمدى جولدارىن ۇسىندى»، — دەدى الماتى قالاسى جاستار ساياساتىن دامىتۋ مەملەكەتتىك قورى ديرەكتورىنىڭ مىندەتىن اتقارۋشى، «QAMQOR CHARITY» قوعامدىق قورىنىڭ ءتورايىمى باعدات اناربايەۆا.
باسقارما وكىلدەرىنىڭ ايتۋىنشا، بۇگىنگى تاڭدا جاستار ساناسىندا ۇنەمشىلدىكتىڭ جاۋاپكەرشىلىك پەن پاراساتتىلىقتىڭ، كەمەل كوزقاراستىڭ كورىنىسى ەكەنىن ورنىقتىرۋ اسا ماڭىزدى.
جاستاردىڭ پىكىرىنشە، مۇنداي كەزدەسۋلەر كۇندەلىكتى ومىردەگى ادەتتەرگە جاڭاشا كوزقاراسپەن قاراۋعا، شىعىن مەن تۇتىنۋ مادەنيەتىن قايتا سارالاۋعا مۇمكىندىك بەرەدى.
«كوبىنەسە اقشامىز بەن رەسۋرسىمىزدىڭ قالاي جۇمسالىپ جاتقانىن اڭعارا بەرمەيمىز. وسىنداي كەزدەسۋلەردەن كەيىن قاراپايىم كۇندەلىكتى ارەكەتتەردەن باستاپ وزگەرتۋگە بولاتىنىن تۇسىنەسىڭ»، — دەدى قاتىسۋشىلاردىڭ ءبىرى.
كوميۋنيتي ورتالىقتاردىڭ بەلسەندى جاستارى چەللەندج ەستافەتاسىن جوعارى وقۋ ورىندارى مەن كوللەدجدەرگە جولدادى. يگى باستاما الداعى ۋاقىتتا الماتىداعى وقۋ ورىندارى مەن جاستار ورتالىقتارىندا جالعاسادى.
